INDIA RAMAH CONGRESS PARTY-IN RAL LAM A PAN ZEL
Kum thum liam taah khân "CONGRESS NÎ A LIAM TA" tih thupui hmangin sei tawk takin chanchinbu hrang hrangah thu ka lo ziak tawh a. Ni 5 December, 2021-a AICC President Sonia Gandhi-i'n Pu Lalthanhawla C.W.C member atana a ruat hian India ram pumpuiah Congress Pary-in chhiatna nasa tak a pan zel a ni tih a tihchianzia a tawi thei ang berin i'n sawi chiang teh ang.
Pu Hawla hi India Independent aṭanga vawiin thlenga state khat P.C.C president ni rei ber a ni a, an nupa hian pumrua pawh hleitling tak, inchei thiam leh India ram mai ni lo khawvêl pum huap pawha hruaitu incheinaa inchei thiam leh man to ber ber, hmanraw to ber ber hmanga zahpuiawm lo taka inchei ṭhin an ni. Sâp ṭawng leh vai ṭawng pawh thiam tak a ni a, mahse, Pi Indira Gandhi khan a dam chhûngin C.W.C member-ah a dah duh lo va, a fapa Rajiv-a'n a dah bawk lo. Narashimha Rao-a'n a dah lo tluan chhuak ṭhak bawk a, Sitaram Keshri, AICC president a rawn nih khan Mizoram Congress hruaitute chuan Indira Gandhi te, Rajiv-a te, Rao-a te hnêna an lo ngen tawh ṭhin angin, “Pu Hawla hi C.W.C member-ah min dah loh chuan a zahthlak lutuk tawh, N.E state dang zawng zawng aṭangin C.W.C member dah an ni tawh a. Mizoram chauh hi la dah loh awm chhun kan ni, kan tan a zah pawh a zahthlak lutuk,” tiin an kar a, tichuan, Pu Keshri chuan a dah ve ta a.
Thil bulbal hre ziktluak duh lo leh hre lo tak tak Pu Hawla'n a fuihpawrh ṭhinte chuan C.W.C pawimawhna leh ropuizia sawiin member sawmhnih leh panga (25) zinga India mipui vaibêlchhe za tam tak zinga Pu Hawla ruat a ni ve chu an sawi mâwi thiam hle. Pu Keshri-a kha kum khat emaw hnu lekah Pi Sonia Gandhi-i'n a rawn thlak leh ta a, C.W.C member sawmhnih leh panga (25) zinga pahnih (2) paihin sawmhnih leh pathum (23) te chu a ring chhunzawma, pahnih (2) a paih zingah Pu Lalthanhawla hi zu tel tlat a.
Pi Sonia Gandhi president a rawn nih kum sawmhnih (20) a liam hnu, M.P pawh ui-hãm lek an neih hnu, chaurau êk state tina an thai hnu leh Pu Lalthanhawla pawh tar chak lo, kum 80 chuang a nih hnua C.W.C member-a a rawn ruat ve hi Mizoram Congress mipui tân lawmna chi a ni dawn em ni? India ram pumpuia Congress chak vanglai leh thiltihtheih lai leh Pu Hawla pawh a ṭhat vanglaia C.W.C member-a an ruat duh lo khan, keini Mizo mipuite ai hian phai vaiho khuan Pu Hawla hi ram rorel tlak a nih lohzia an hre chiang êm êm a ni tih a tichiang tawk hle lo maw?
Amah, Pu Hawla pawh hian Mizoram-a Congress Party hi ṭha takin kal se tih a duh tak tak ve tawh a nih chuan C.W.C member-a an ruatna hi pawm lovin, Pu Lalsawta, Pu Hriata Chhangte emaw midang ṭha zawk tur kian nghal se la, politik lammual aṭang hian bang vang vang tawh zawk se la, Congress Party tan mai ni lo, Mizoram tan a ṭha zawk ngei ang tih ka ring a ni.
- MC. Lalrinthanga