Krismas hlim takin ni hmang ang u

Hripui leng avangin krismas chu kum khat kan han hmang thei tawh lo va, tunah hian a kum hnihna atan Krismas hi kan hmang thei lo mai ang tih hlauhawmin kan ding mek a ni. Krismas leh Mizote inkungkaihna thûkzia kan hriat tlan avangin he hunpui lo thleng tur hi hlim taka kan hman theihna turin hripui leng karah hian eng tin nge kan tih ang? tih hi kan ngaihtuah tlan ngai lai tak chu a lo ni ta a ni.

A pakhatnaah chuan Krismas hlim taka kan hman theihna tur thil Ṭul tak mai chu Kohhran Inkhawm buatsaih hi a ni a, Kohhran inkhawm kan buaitsaih na na na chuan a boruak pawh a Krismas dawn a ni. Bazarah mipui kan intawllen hut hut a, Vanapa hall ah pawh Programme kan hmang awl lo va, chuvangin Krismas-a Kohhran programme hman hi thil tih ngei ngei tur a ni a, inkhawm a awm phawt chuan mipui 50% hi chuan Krismas hi hlim takin kan hmang thei dawn a ni.

Krismas hlim taka kan hman tlan theih dan awm leh chu Zu leh Ruihhlo khapna a taka kenkawh hi a ni awm e. MNF an sorkar chiah khan Minister pakhat mai ni lo; inzui dum dum tham khan Rangvamual leh Phunchawng an tlawh tih kha a ziak pawhin a la hmuh theih a, kha'ng Minister rualte kha han Ṭang thar leh se, tunlaia Vaivakawn kawngpui kama zu lei sa man khawm mai mai lo hian an zu lei tur tak hi an sakna hmun ramhnuai leh an zawrhna RV leh Phunchawng aṬang hian zuk man chhuak ngam law law se, chumi hmang chuan ruihhlo dang pawh an man tel nghal dawn a ni.

Pathumnaah chuan 'Family Krismas' tiin han rawt ta ila, chhungkuaa Krismas hman khawm hi kumin chu i uar ang u. Mizoram tih loh khawvel hmun dang hi chuan Krismas hi a huhovin an hmang nasa vak lovin a lang a, keini hi zaikhawm, inkhawm leh tih khawm hi kan ngah a, hripui avangin kum dang angin tih khawm a lo tam ta lo a nih pawhin chhungkuain hun hmang tam ila, chumi tur chuan tun aṬangin Family Krismas Programme hi duang lawk ila, he krismas hi hlim takin i hmang ang u.

- Lalruatkima (Maruata)