Cement leh Rod zuartute hi...

Mizo te hian sum­dawngte hi tun hma aṭang tawhin kan u en a, an thil zawrh hi a man dik tak (printed prize) a ni em tih lam pawh kan chhui zui ngam meuh ṭhin lo.

A bikin hardware zuar leh motor parts zuar zingah printed prize thai chhia-in anmahni duh zat ziah mai hreh lo an awm a, to ti chung chungin sawisel ngam si loin kan lei a, chutiang chuan kum tam tak kan kal tawh. Hetianga mipui bum hi sim a hun a, mipuite pawh kan harh a ngai. A ṭul chuan Consumer Forum lamah thlen zel mai tur.

Vanglaini June 2 chhuakah khan ‘Dal­mia, Star, Topcem, Best cement-te Mizoram chhungah zuar rih dawn lo’ tih a lo lang a. Ka rilruah thil pakhat a lo lang ve nghal a. All Mizoram Cement & Iron Rod Dealer’s Association (AMCIRDA) te mipuite hamṭhatna ngiata an thil zawrh ṭhin Dalmia, Star, Topcem, Best cement-te an zuar lo ngam kha an fakawm ngawtin ka hria.

Sumdawngte hi mipuite hian kan ngai sual ve fo awm e. Mi tam ber chuan kan sumdawngte hian sum an hmuh phawt chuan an lungawi mai turah kan ngai ang a, mahse an thil zawrh ṭhin ho company lamin a man an tih san tak em avanga Mizo mipuite thlavang hauh nana an han zuar lo ṭhak ngam kha thil chin dan mawi tak niin ka hria; sumdawng dangte pawh hian entawn se ka duh hle.

Mizo sumdawng tam zawk chet duh dan chu kan hre tawh a, mahni hnam puite pawh dik lo taka ei hreh lo tam tak an awm. Bungrua eng emaw a han vang thut a, an bungraw kawl sa te pawh a man to lo chuan an hralh duh lo ve mai a.

Tichuan, a tuartu mipuite lam ai chuan anmahni hlawkna tur lam chauh an ngaihtuah avangin zah pawh dawn loin an bungraw lo kawl sa te chu a man an ti to sauh a, Mizo mi­puiten harsatna an tawh denchhenin hlawkna a tam thei ang ber lo tel an tum ta ṭhin a ni. Kristian ramah hetianga ti duh hi sumdawng tam tak an awm tih kan hriat kha!

Cement, balu leh iron rod te pawh hi dik takin zuar se. Balu leh cubic lung meter thlengin a tling lo a awm fo ṭhin a, hetiang buk tling lo a lei hi Mizo mipuite hian thil nih dan tur pangngai emaw kan ti hial tawh niin a lang. Eng thil mai pawh hi mipuite hian a man pangngai (printed prize) ang thlapa kan lei a hun a, chu chu kan dikna chanvo pawh a ni bawk. Cement, balu, brick, cubic lung leh iron rod te pawh, eng thil mai pawh hi a man dik tak leh buk tling ngeiin zuar ṭhin tawh ang u.

Cement, balu leh rod te pawh hi buk tling ngei chauhin hralh ṭhin ang u. Chutianga dik taka kan buk a ni tih kan customer ten an hriat a, rilru dam taka bungrua kan in lei a, kan hralh theih nan digital weighing scale hman pawh in tihhmuh zel ang u.

- Zo Hmangaiha