Russia-a World Cup en thu leh a behbawm (9 Days & 8 Nights In Russia Plus FIFA World Cup Match)

June 14, 2018 a lo her chhuak a, khawvel ram hrang hrangin Russia khawpui - Moscow lam a hawi ṭhup a. A chhan pawh eng dang vang ni lovin, khawvel ennawm ropui ber- ‘The Greatest Show On Earth’- FIFA World Cup neihna hmun tur a nih avang a ni. Keini pawh CMS Holidays kaltlangin World Cup en tur hian mi 6 (mipa 2 leh hmeichhia 4) Delhi Airport aṭangin Russian Airline - Aeroflot hmangin Moscow kan pan a. June 22-ah India panin kan let leh a, Russia kan cham chhunga kan thil tawn ṭhenkhat, World Cup a hmuna kan en chanchin leh a behbawm kan tarlang ang (tawi kim thei tura ziak a ni).

World Cup ticket: Zawhna ka dawn tam berte zinga mi chu World Cup ticket man hi a ni. Opening match hi Category 1 man chu USD 550 (Rs. 36300 vel) a ni. Group match-ah hian a tlawm leh deuh a : Cat 1 - USD 210 (Rs. 13000 vel) Cat 2 - USD 165, Cat 3 - 105. Round of 16, Quarter Finals, Semi Finals-ah rate a danglam leh bawk. Final bikah hian a to leh deuh a: Cat 1- USD 1100 (Rs. 72600 vel) a ni a. Ticket man lam aiin ticket chan harsa lai tak hi a buaithlak zawk chu a ni a, Mizoram ang internet ‘satel’ lutuk aṭang hi chuan match duh ang chan a har viau.

Category ṭhen dan: Category 1 hian khel­mual sir tawn a huam. Category 2, 3, 4 chuan goal keeper awmna hnung ve ve a huam.

Keini group World Cup en hi Category 1, Row 7-ah ṭhuin, chhawng 2-na chanve velah ṭhutna kan chang ve hlauh a ni. Kan ṭhutna aṭang hian en nuam tawk tak a ni.

Fan fest: World Cup tihlutu zinga pakhat chu Fan Fest hi a ni awm e. Kum 2002-a Japan leh South Korea-in an inthlen ṭawm khan Public Viewing Areas (PVAs) Japan-in an siam a, mipui hlut a hlawh hle. South Korea lam pawhin hetiang hmun hi siam ve lehin mipui maktaduai 7 zetin South Korea Public Viewing Areas aṭang hian an en a ni an ti.

Kum 2006-a Germany-in World Cup an thlen ṭum kha chuan Organising Committee lamin World Cup hmasa lama thil thlen dante thlirin ruahmanna felfai tak nen Fan Fest hi World Cup khelhna khawpui apiangah Fan Fest an buatsaih ta a. Mi maktaduai 20 chuang zetin an chhim nghe nghe. Heta ṭang hi chuan mipuiiin Fan Fest an hlutzia hriain World Cup an nghahna khawpui apiangah Fan Fest Programme hi neih a lo ni ta ziah a ni.

Fan Fest-ah hian World Cup khelh ni apiangin hun hman a ni a, concert leh culture thil hmuhnawm tak tak en tur buatsaih ṭhin niin match awm hunah big screen-a enho a ni ta ṭhin a ni. Russia-ah pawh hian Fan Fest neih ṭhin a ni.

Fan Fest leh khawlai velah hian ram tenau zawk aṭanga lo kal hi football-a ram ropui anga kan ngaih ho aiin an pawr zawk tlat mai! Columbia, Mexico, Tunisia, Peru-te chu boruak nei lian pawl an ni tlat! Argentina, England, Germany, Brazil, Portugal etc erawh khawlaia inhawr khawm tuau tuau an nei ve meuh lo (ka hmuh ve chinah).

Fan Fest-ah hian mi 20000-30000 zet te an pung khawm ṭhin. Chutih rualin zu rui buai te, au khek ruai ruai te an awm ve lo va. Kil khata lo insual leh lo incho khu khu te hmuh tur an awm hauh lo.

Fan ID: Kumin World Cup aṭang hian Fan ID hman ṭan a ni. Stadium chhunga lut turin World Cup ticket leh Fan ID neih kawp a ngai. Ticket book fel hnuah Fan ID hi online-a apply tur a ni. Fan ID hmang hian Russian Visa dil ngai lovin World Cup ṭan hma ni 10 leh World Cup zawh hnu ni 10 thleng cham theih a ni. World Cup ticket hi Italy aṭanga thawn chhuah niin Fan ID erawh chu Russian sorkarin FIFA remtihnaa a siam a ni.

Russia sorkar chuan Fan ID hmang hian Football fan-te Public Tranport-ah Free Transportation an pe a, hei hian Fan ID a tihlu zual hle. Fan ID dawng ve lote tan World Cup khelhna khawpui hrang hrangah Fan ID Collection Centre a awm thluah bawk.

Volunteer: Russia sorkar chuan World Cup hlawhtling taka a thlen theih nan player te leh fan-te lo dawngsawng tur English thiam volunteer ṭhalai 15000 zet training pein a lo buatsaih lawk a, arport, metro, bus station, Fan Fest leh stadium-ah te an duty a. Russian mipui nawlpui-in English an thiam loh avangin volunteer te hi an ṭangkai hle.

Fan Shop: Fan Fest hnaivai hmun remchangah FIFA Official Fan Shop buatsaih zel a ni a. FIFA dawrah hian World Cup Souvenir hrang hrang T-shirt, jersey, ball, key chain etc items chi tam tawk tak an nei a; hmun tin maiah dawr hi a lun thei hle.

Russia - rin a ang lo: Russia ram hi khaw vawt em em, vurin a khuh deuh luk, ram bumro leh nelawm lo tak ni tura ngaihna a lian hle. Amaherawhchu, World Cup hunlai hi boruak nawmlai tak a ni a, chhun lamah phei chuan kawr lum hak a ngai lo va, zan lam pawh a vawt lo hle.

Russia kan cham chhung hian Moscow bakah chhim tawp leh hmar tawp, Volgograd (formerly Stalingrad) leh St. Petersburg (formerly Leiningrad) te kan tlawh a. Thlawhna aṭangin chiang takin Russia ram mawizia a lang. Forest ṭha tak tak te, plantation zau leh mawi tak tak te, hmun zawl ṭha tak tak te a hmuh theih.

English an thiam lo: Russian hote hi khawvel ram dang kan zin ve tawhna te nena khaikhin chuan English thiam lo ber an ni hial awm e. An hmel han en mai chuan English pachal ni awm tak tak an ni a, mahse mi tam tak saw English kawi khat pawh hre lo an ni deuh fur mai nia! English-Russian Dictionary nena ka inchhawp chung leh uluk theihtawpa sawifiah kan tum pawhin an fiah zo reng reng lo. Internet pack thun tur ringawt pawhin hrilhfiah rei a ngai khawp mai.

English an thiam loh avangin shopping te hlei hlei hi a buaithlak a, thil man kan zawh lahin Russian vekin min chhang si. A tawpah calculator kan phawrh leh nge nghe ṭhin!

Russia-ah hian English-a thuziak intar hmuh tur a awm meuh lo. World Cup kaih­hnawih thuziak tar tih loh chuan Russia kan cham chhungin English-a thu inziak chhiar tham lek kan hmu!

Mi ṭanpui an taima: Russian hote hi hnam polite leh nelawm tak tia sawi tur an ni lo. Chutih rualin mi dangte ṭanpui kawngah erawh an fakawm hle. Inbiakpawhna lamah harsatna awm mah se ṭanpui ngaite ṭanpui kawngah erawh fak an phu tak zet.

Moscow-a kan awm laiin vawi khat pawh metro-ah kan chuang a, kan kal dan turah kan buai viau mai a, theih ang angin mi kan zawt kual a. Nakinah chuan nu pakhat hi kan bulah lo kalin ṭanpui kan ngai niin a hria ni ngei tur a ni, ‘Ka ṭanpui thei che u ang em?’ tiin min puih huam takin a lo kal a, ani chuan English a lo thiam ve bawk nen, kal dan tur min hrilh ta vek a, a lawmawm duh hle.

Hun an vawng dik: Russian-ho hnam ropui an nihna lantirtu pakhat chu hun an vawng dik kha a ni. Russia kan cham chhungin guide eng emawzat kan hrawn hman a. Pick up & drop etc-ah an hun tiam an bawh pelh ngai lo va, hun tiam hma minute 10 aia tlem lovah an lo inpeih hman zel mai.

Khua a thim har: Hmar tawp (North Pole) a hnaih avangin khua a thim hlei thei lo a ni ber mai. Ni tlak hnuah pawh rei tak khua a eng zui ṭhin. Kan zin lai hian Moscow-ah chuan dar 12 velah khua a thim fel chauh a, St. Peterburg-ah phei chuan dar 1-ah pawh khawlai a la eng vek! Zingah hma takah ni a chhuak leh bawk si. India ram nen ni eng awm dan a danglam lutuk a, mut hun pawh kan hre meuh lo! Moscow khaw thim hun chhung hi darkar 3-4 chhung bak a ni lo vang! Chutih rualin Russia ram hi khaw vawhna hmun a nih vang nge night life an nei lutuk lo tlat. Zan dar 8 velah chuan dawr an khar fur tawh a. Khua erawh a la eng viau lawi si.

No ‘Smoking Zone’: A tlangpui thuin ram vawta khawsa te hian meizial an zu nasa. Russian-ho hi an nula te chenin an pet kawh ve va va thei hlawm. Mezial zu nasa viau e ti lovin mei zial erawh an khuahkhirh viau thung si. Russia-ah hian airport 3 kan tlawh a, khawi hmunah mah ‘smoking zone’ an siam lo! Hotel room-ah zuk an phal lo va, Lobby-ah pawh an phal chuang lo!

Driver te an polite: Zebra Crossing awm lohna hmuna kawng kan dawn tum pawhin driver te an hawihawm hle a, kea kal an ngai pawimawh a, an ding mai zel. Min tlan khalh hram an tum ve lo va. Horn an pe tuar tuar hek lo.

Kristiante hnuhma: Russia ram hi Co­mmu­nist kulpui anga ngaihna Mizote rilru-ah a lian hle. Hetih lai hian Kristian Biak In leh Kristian chhinchhiahna ‘Cross’ chuan hmun laili a chang thung. Moscow hmun lar ber pakhat- Red Square bul maiah chuan St. Basil cathedral a awm a. St. Petersburg khawpui lailai takah St. Isaac Cathedral a ding luah bawk.

Volgograd-a ‘Mothersland Call’-ah tih mai, Europe-a hmeichhe milim sang ber (85m) awmna leh Stalin War Memerial, Tourist tam takte tlawhna hmun bul maiah chuan Cathedral a ding luah bawk. Russia ramah hian Kristian 47.4% an awm niin kum 2012 survey-ah tarlan a ni. Heng bakah hian Biak In leh Cross langsar tak tak hmuh tur a awm bawk.

World Cup thleng tura inbuatsaihna: Russia meuhin World Cup a han thleng chu an inbuatsaihna a tha a. Hospitality/ Security-ah pawh sawisel tur a vang hle. Khawpui hmun hrang hrang leh Public places-ah Welcome banner leh Informattion banner/ hoarding hmuh tur a tam hle.

Kan group member zinga pakhat chu Fan ID a dawn ve hman lo avangin email ka thawn a. Fan ID centre aṭangin Russia a luh theihna turin Electronic Fan ID min lo thawn a, awlsam takin Russia kan thlen hnuah Fan ID Centre aṭangin Fan ID kan la chhuak leh mai bawk. An service a ṭhain an che rang hle nghe nghe.

World Cup nghahna hmun hi khaw inkar hla tak tak a ni hlawm a, Russia sorkar chuan Fans te tan Free Transpaortation a siamsak vek bawk. Wold Cup ticket hmangin train service-ah hian a thlawn vekin kal velna a ruahman a, book lawk vek a ngai thung. Keini pawh Volgograd-ah kan cham chhungin Metro, Tram-Train leh bus-ah ticket leh fan Id hmangin Free vekin kan veivak thei a ni.

Aw Volgogrand!: Volgograd khawpui hi Russia chhim thlanga awm a ni a. Moscow

aṭang chuan km 1000 zeta hla a ni. He khua hi Indopui 2-na laia Joseph Stalin leh German sipaite nasa taka an inbeihna khua kha a ni a, kum 1961 thleng kha chuan Stalingrad tih hming a pu. Tunah chuan mihring maktaduai khat vel an awm niin an sawi. Indian Tourist tan Volgograd hi tlawh phal a ni lo va, World Cup vangin kan tlawh ve thei chauh a ni.

He khaw nuam tak mai hi June 17 khan kan thleng a, Tunisia leh England Match kan enna tur khua a nih avangin kan phur zual hle. Airport kan thleng a, Volunteer nula tleirawl ten min lo dawng sawng a; Airport

aṭang kan chhuak chu ‘Welcome to Volgograd’ tiin volunteer hovin an lo sawi rual dial a, thla a muang sauh mai! Mak deuh mai chu he khuaa Tram/ Bus driver leh Conductor-te hi hmeichhia deuh vek an ni.

Volgograd-ah hian ni 2 chauh kan cham a, chutih rualin he khua hi kan tlawh zinga kan ngaih ber a ni tlat.

Stadium chhung leh a behbawm: June 18 tlai a lo ni a, zan lamah Tunisia leh England inkhel en tur kan nih avangin kan phur tlang kher mai. World Cup ticket leh Fan ID lah chu Mizoram aṭanga kan ken tawh a nih avangin tihbo hlauhin kan hum thlan hluam tawh mai!

Stadium bul kan thleng a, ‘eng vangin nge mipui te chu, hmanhmawh takin an lo kal khawm…’ tih hla ang mai khan, a mak a maka tam mipui an lo tleh dul dul a. Volunteer hovin kal dan tur min lo kawhhmuh zel bawk. Stadium panna kawngah chuan a ṭhenin rimawi an lo tum a, a ṭhen kalchhet sang mangkhengah an lo pen khuau khuau a. A ṭhen an lo lam bawk. Fans-ho an lo inhawr khawm tuau tuau bawk. Stadium hi lui mawi tak kam (Volgo River) a awm a ni bawk a, a nuam kher mai. Stadium chhung lah chu thawm a ri hulh hulh mai bawk si, kan zauthau vek a ni ber e.

Stadium Gate kan paltlang ta, kan awmna tur seat panin chhawng hnihna dawhsan lam kan pan a. Mipui kan phur mur mur a, tute mai pawh chu kan phur em em vek ni mai hian a lang. Chutah kan seat awmna entrance-ah han dak chhuak chu a lo eng ut a, mipui an zi mur mur mai. Stadium kan hmu ve ta! Ka mumang chu a ni si lo.

Nakinah chuan Tunisia leh England Flag lian zet mai chu stadium kil sir aṭangin an lo zawn chhuak a; players te an lo chhuak zui, thawm a va ṭha em! World Cup Stadium chhunga ka han ṭhu ve vang mai chu kan hlimin ka lawm em em a, Pathian hnenah lawmthu kan sawi mawlh mai.

A goal-a an au rinzia leh a boruak nawmzia chu sawn sen a ni lo. Ṭum 3 vel zet chu ‘ban phar rual dual dual (Mexican wave) kan nei bawk a, mipui 40000 chuang zet ban phara kan ding rual dual dual chu a namai lo hle.

Stadium chhungah hian thawm a ri hum hum reng a, goal hlauhawm deuh a awm phei chuan an ding suau suau zel a. England leh Tunisia fans inthut pawlh kan ni a, thawm a chawl lo. Kei erawh chu kan thianten England an tan vek avangin Tunisia ka tan thung a! Vanduaithlak takin hun tawp dawnah England chuan an ti goal leh hlauh mai. World Cup a hmuna kan en ve hmasak ber ṭum hian England 2-1 in Tunisia lakah an chak ta a ni. A hmunah chuan TV-a kan en ai hian an che rang zawk a, match khat khelh chhung pawh TV aiin a rei lo zawk tlat nia!

Pathian zarah kan dam ang a, kum 2022 Qatar World Cup chu a hmunah ngei en ve tum ang che. Pawisa lo khawl tang tang la, ticket book sak i ngai a nih pawhin kan pui thei che!

- C. Lalnuntlinga (CMS Holidays)