SEX LEH SUAL

Sex in sawi in sawi mai, tawitein ka’n sawi ve teh ang. He Adama thlah mihring hi a nun chhung chuan sex hi a nung reng dawn, mi pangngai leh pangngai lo-ah pawh. Chuvangin, sex hi tumah inzirtir kan ngai lo va, inkhap beh theih pawh a ni hek lo. Insawiṭhaih, khap nasat leh a hremna tihnat avangin sex hi a bo thei lo va, a thawh dan a danglam phah lo va, tu ch^kna mah hi a bo phah lo va, tuman an sim phah chuang hek lo.

A hman dan tur, a tih dan leh a hnathawh dan leh a nawm dante pawh inzirtir kan ngai lo va, mihring hmasa Evi leh Adama aṭang khan vawiin thleng hian mihringte hian kan pianpui a ni a, a awmzia hi kan hre em em vek a ni. Mihringte leh thilnung tinrengah hian sex kher hi chu zirtir kan ngai lo. Intifing taka chhui kuala sawi sawi leh, eng eng rawtna emaw siam avanga a nihphung leh a kalphung hi tihdanglam theih a ni lo. Tihniama tihsan theih lah a ni hek lo. Sex hi mihring nunah hian a hmatawng leh a lai lum luahtu nung ṭha em em reng a ni. Lal Isua lo kal leh hma chuan a awm reng ang ang a, a nasa tulh tulh ang a, a huangtau tial tial ang a, a zak thei lo telh telh ang. Tunah pawh hian a hre duh tan chuan mahni leh midangah hian a lansarh tawh em hi. Hei hi hun hnuhnunga thil awm dan tur a ni miau si a.

Sex hian - “Min duh lotu an tam em mai, min sawi chhe nasa em mai, kawng an zawh nasa em mai, an au ring em mai, min hremna tur an tina em mai; khawnge ka’n insum deuh teh ang, kan biru bo daih teh ang, khawvelah hian ka tan hmun a awm ve ta lo a nih hi; hremhmun lamah ka’n hawsan daih teh ang,” a ti reng reng lo. Kan sawi pung a, kan au phur a, kan khap thinur a, kan ti-huaisar a, a nung ṭha tulh tulh a, a hnathawh duh hunah chuan eng khapna dan, eng penal code mah a hlau lo va, sex hian mihringte dan siam leh Pathian dan hi a pawisa lo va, a bawhchhe nitin zantin tho a nih hi. He Adama thlah mihring hi he leia a dam chhung chuan chu chu thil awm dan tur a ni si a.

Tisa ch^kna leh sex hi sual leh thlemna a ni lo va, mihring leh ransate hian kan pianpui, kan neih sa, kan ta, kan kawl sa reng a ni. He khawvela roreltu, Thim lal Setana hian chu chu remchanga hmangin keimahni thil neihsa hmang chuan min control ta ṭhin a, kan inrin loh lai leh kan hriat loh lai hian sual leh mualphona leh natnaah thiam tak leh awlsam takin min lo hruai lut leh mai ṭhin a ni. He hmanraw hmanga min thlem hi chu Setana pawh hian awlsam a ti lutuk a, a hmang ṭha duh lo zawk ni hian ka hre ṭhin. Thil dang tam takah, kan hriatthiam mai loh hian Setana hian fing tak leh rim tak hian keimahniah hna a thawk char char reng zawk a ni. Chumi kar lakah chuan sex hmanrua hi chu awlsam tak hian a rawn hmang leh zauh ṭhin zawk a ni.

Sex hman khawloh hnu leh a pawi hnu, mualpho hnua inchhir leh lo leh pawiti lo hi tumah reng an awm lo. Mahse, chu pawi tihna leh thil ṭha lo, mihring leh Pathian pawisawina a ni tih hriatna chu a hma khan khawiah nge a awm? Engatinge sual na na na chu ka lo tih luih ṭalh? Engatinge ka lo hneh mai loh? Engatinge, engatinge, a va pawi tak em a va pawi tak em! kan ti leh vawng vawng ṭhin si a nih hi.

A chhan chu maw- he Adama thlah mihring hian ama ta, a neih sa leh a kawl sa reng sual leh sex hi amah chuan hriatfiah theihna, huat theihna, do theihna leh hneh theihna a nei tlat lo alawm. Chuti chu engtinnge kan tih tak ang?

A chhanna chu hei hi a ni - sex leh sual reng reng, Pathian lawm tlak lo tawh phawt hriatfiahna, huat theihna, do theihna leh hneh theihna awm chhun chu Krista Isua chauh hi a ni a. He Adama thlah mihring hi Isua ruala Kros-a khenbeha, a thih a, phum boa a awm a, Isua ruala a thawhleh a, englai pawha Isua kianga a awm hunah chung zawng zawng, sex leh sualte chu amah, Adama thlah ni tawh lovin, Isua’n a hnehsak zel tawh zawk dawn a ni. Chu chu Pathian thutiam a ni.

Nitina Isua hnena awm tur chuan ni tina Isua hnena Kros-a kan inkhenbeh a, ni tin kan thih a ngai. Englai pawh leh khawi hmunah pawh Isua nena leng dun tur chuan englai pawh leh khawi hmunah pawh Isua ruala kan thihna Kros kan put reng a ngai a ni.

He Adama thlah mihring hi a thih phawt loha a nun chhung chuan sex leh sual hi khap vak leh sawi bawrhbanin awmzia a nei lo va, sawi mawi pawh a ṭul hek lo. Thil nungsa em em, chak tak a nih avangin a hnathawh duh hunah chuan a thawh ṭhulh phah lo va, a duh hunah chuan pawisak leh zahpah a nei lo va, mihring dan leh Pathian dan engahmah a ngai lo va, eng ang hremna nasa, eng penal code mah a hlau hek lo, a kal ngaiin a kal miah miah a, a lian tual tual zawk a nih hi.

Chuvangin, sex leh sual hi sawi sawi lo leh, a dona hmanrua Isua tel loa, a hanga do do lo hian he sual awmtirtu Adama thlah mihring hi Isua ruala Kros-a tihlum ve-in, kan thihna Isua Kros Chanchin Ṭha chauh hi i sawi luai luai tawh zawk ang u.

Engkim hriatfiahna, tihdikna leh famkimna chu - dik taka tianthara - englaipawha Isua rilru nunpui hi a ni.

- K. Hmingthankaia