"CENTRAL YMA HRUAITU I THLANG VE DAWN A NIH CHUAN…”

Mizorama tlawmngai pawl lian ber leh thiltithei bera ngaih Young Mizo Association (YMA) Gen Hqrs. (Central YMA) hruaitu thlan a lo hun leh ta. A thlang thei chin i nih chuan ngaihtuahna fim tak hmang turin ka duh tak zet che a, vote i thlak hma-in heng te hi i lo ngaihtuah tel hram dawn nia:

1. Zofate hi Israel fate ang maiin Sorkar hrang hrang awpna hnuaiah awm darhin kan ṭawng leh nunphungte lo danglam viau tawh mah se Pathianin hnam khat anga min dinchhuahtir a tum a ni ngei ang; unau hmelhai kal pelin inunauna leh insuihkhawmna lam kan hawi mek a. Pawl hrang hrang, ZoRO, MZP, MSU, Zofa Global Network (ZGN) te hmalak tawhnate’n rah ṭha chhuahin a thiltithei ber CYMA pawhin he lam hawi hian ke a pen ve ta ruau ruau a nih hi. Hetiang lam veitu leh ngai pawimawhtu ngei CYMA hruaitu atan i lo thlang hram dawn nia. Mahni unaute diriam a, hmusit a, hnuaichhiah ching mi chu thlang lo hram ang che.

2. YMA Motto pathum zinga Pahnihna, ‘Zofate hmasawnna ngaihtuah’ tih hian a huam zau viau awm e. Mizo tih mai duhtawk lova kan Zohnahthlak unau zawng zawng huam tura duan, YMA thiltum hian khawi hmuna awm pawh ni se, Zohnahthlak an nih phawt chuan chung mite hmasawnna tur chuan YMA chuan theihtawp a chhuah tur niawm tak a ni. YMA Motto hrechiang leh ngaipawimawh mi i lo thlang hram hram dawn nia, “Eng a?” hmang ve lote hmusit ching ni lo.

3. YMA Kumpuan Thupui-a kan hman ngun ber chu, 'Ram leh Hnam Humhalh' tih a ni. Ram leh hnam chuan Zofate ram luah chin zawng zawng leh Zohnahthlak hnam peng hrang hrangte a huam a ni. YMA hi Zofate zawng zawng khaikhawmtu, ‘fa u ber’ chan chang kan ti ṭhin. Mizoram mai ni lo, Zohnahthlak hnam hrang hrangte luah chin, ram dang leh state danga mi (Burma, Bangladesh, Tripura, Manipur, Assam, Meghalaya, etc.) ramte leh anmahni Zohnahthlakte dikna chanvo (anmahni hual veltu hnam dangte’n an chim ral mai loh nan) YMA chuan a humhalhpui tur a nih hmel. Chutiang ngaihpawimawh nachang hre pha chu CYMA hruaitu atan i lo thlang hram hram dawn nia.

4. Ṭawngkalam-a “Burma ram aṭanga rawn chhuk, Manipur aṭanga rawn phei leh khawthlang lam aṭanga rawn chhote hi Mizo dik tak pawh ni se an phakar, an sual, an rilru a ṭha lo, ‘Eng a?’ hmang lo lek phei chu mi ṭha an awm lo,” ti zut zut lo a, heng mite seilenna environment chhe tak leh hnam dang kara survive hram hram tura an beih nasatziate hrethiama lo kuahkhawm thei tur mi i lo thlang hram hram dawn nia.

5. YMA Dan Bu, Bung I, Chang 10-na 'Kaihhruaina'-a kan hmuh, (Sub No. 3) “Thudik ngaina leh ṭan tlat mi” a tih ang hi i lo thlang hram dawn nia, dawta mi hèk ching ni lo.

6. YMA Dan Bu, Bung I, Chang 9 “YMA Thuthlung”-in a sawi, (Sub No. 9) “Mahni ṭanghma chauh thlir lovin midang hmakhua ka thlir fo a ṭul a, midangte ngaihdan zah a, zawm thiam mi ka ni tur a ni,” a tih pawh pawisakna nei miah lo, mahni ṭanghma hai duh vang ringawta CYMA hruaitu ni chak zek zek ang chi, tlawmngaihnain a phût chhuah ni lo, lalna leh thuneihna thlahlel tlat ang chi kha chu lo thlang lo hram ang che.

7. CYMA hruaitu Nominee zinga Sub-Hqrs., Group leh Branch hruaitute be kual peih deuh, ngaihsak deuh anga lang, Campaign tih dawna ni chiah si lo angho kha i hruaitupuite’n ‘thlang ang u’ ti mah se nang chuan lo thlang lo hram ang che. A chhan chu maw, tlawmngaih vang ni lovin thuneih leh lansarh chak vanga YMA kalphung palzut hreh lo mi i thlang palh ang tih ka hlau a ni.

8. YMA-in ruihhlo a do denchhena mi dinhmun tleu laklawh hriatthiamna nei map lo, lainatna tel miah lova kut lek ching i hria a nih chuan chutiang mi chu CYMA hruaitu atan chuan lo thlang lo hram ang che.

9. YMA hruaitu nihna denchhena mirethei leh thiltithei lo, chhantu nei ve lote chunga inlek ching, milian leh thiltithei deuhte chu hmachhawn ahneka be ṭha leh huam huam ang chi kha thlang lo hram ang che.

10. Tlawmngaihna avang liau liaua chelh tur, CYMA hruaitu nihna hi thuneihna leh lansarhna duh vanga Campaign chingte thlang chhuaka i lo chelhtir ṭhin a nih chuan nang pawh i inenfiah ve fe a ngai ang. Mi ṭha leh ṭha lo hre hrang reng chunga “Ani hian kan sub-Hqrs. min ngaihsak, ani hian kan Group min hre ṭha, ani hi kan Branch-in kan nel deuh, etc.” tih vang mai maia thuneihna leh lansarh thlahlel deuh i lo thlang chhuak a nih chuan nang khaw pakhat, veng pakhat YMA hruaitu ve lem chuan i hruai YMA Member-te’n Mizoram Legislative Assembly Election-ah therhlo ho te te ûma mi ṭha lo an lo thlang ṭhin a nih pawhin dem lo ang che.

11. A ruka zu in ve thei tho, a nih loh pawhin milian leh thiltithei deuh chu ama bula zalen taka in tir phal, hmun danga zu haw deuh anga lang leh si ang chi kha i hria a nih chuan CYMA hruaitu atan thlang lo hram ang che.

12. Eiruknaa fihlim lo leh a hna (sorkar hna or private business)-a Sorkar duhsakna uchuak dawng ṭhin emaw, dawn tuma phe phe ṭhin ang chi kha i hria a nih chuan CYMA hruaitu atan thlang lo hram ang che. Chutiang mi i lo thlang chhuak hlauh a nih chuan i vote hlu tak kha i kaihhruai YMA Member te hamṭhatna atan a hman beisei suh, ama hamṭhat nan bak a hmang chhunzawm chuang lo ang.

13. Tu emaw Politics zinkawng sialsak mai mai turin hruaitu i nihna Sub-Hqrs., Group, Branch zahawmna kha tihmelhem lul suh.

14. CYMA hruaitu thlanna-a i vote thlak dan azirin YMA zahawmna leh ropuina i vawnghimin i tichhe thei tih hre reng ang che. Chu chu YMA Member te’n Sub-Hqrs., Group, Branch-a hruaitu ni tlaka an ngaih chhan che a ni bawk.

15. CYMA hruaitu atana mi ṭha lo i thlang chhuak a nih chuan “YMA vul reng rawh se” tih ṭawngkam hi tun hnu-ah chuan lo hmang ve tawh lo mai rawh aw.

- James Ramdinmawia