HLIMNA

“Eng vangin nge kan hlim ṭhin?” tih zawhna hi ka in zawt fo a. Hlimna hi eng nge a nih? ‘Mihringin lawmna tur a tawn leh a duhthusam a lo thlen hian hlimna a nei ṭhin’ tiin an sawi fo a, chu chuan mi a tihlim ṭhin niin an ngai. Hlimna, mihringin a neih hi a chunga thil ṭha a thlen vang te emaw, a duhthusam a thlen vang te emaw hi a ni em tih hi ngaihtuah tham a ni. Hlimna hi engtianga kan neih nge a nih tih han ngaihtuah ila.

Pathianin mihring a siam khan a kawm hlim theih turin a siam a. A mihring siam pawh chu kawppui tur a siam sak bawk. Pathian pawh hian kawm hlimtu tur ṭhian a mamawh niin a lang a, mihring pawh Pathian anpuia siam kan nih avangin min kawm hlimtu tur kan mamawh.

Mihringin lawmna leh hlimna a tawn hunah a rilru hlimna chu a bula mi te a hrilh ṭhin a ni. Hrilh tur awm lo ta se, chu hlimna a neih chuan rei a daih lo ang. He thu hi a dik a ni tih lanna chu Pathian khan khawvel a siam khan a thil siam te kha ṭha a ti hle a, a hlim hle ang. Chu a hlimna hriatthiam saktu tur a duh avang leh a thilsiam te entir tur a duh avangin a ma anpuiin mihring a siam ta a ni.

Mihring hian hlimna hi thil tam tak aṭangin kan hmu ṭhin a, kan thil neih leh kan dawn te, kan hmuh leh kan hriat te aṭang a ni thei; mahse, chu chu hlimna min petu tak a ni em tih hi ngaihtuah tham a tling. Kawr thar, ka lo awh em em ṭhin ka nei a, rilruah hlimna a lo lut nghal a, a dawta kan tih leh chu kan bul hnaia awm te hrilh a ni. Kan bul hnaiah hrilh tur leh biak tur awm lo ta se kha kawr khan hlutna a nei lo vat ang a, hlimna kan neih chu minute rei lo te-ah a bo lehnghal mai ang.

Kan mihringpui, kan hlimna min ṭawmpuitu tur kan neih loh pawh a kan hlim viau hian Pathian vanga hlim kan lo ni ṭhin. Chutiang pawh ni lo a la hlim viau chu rilru lama kim lohna nei kan tih te hi an ni. Mihring nun chu chutiang chu a ni. Mahni chauha hlim thei lo, midang mamawhna nun neitu ni tura Pathian siam kan ni.

Kan hlimna leh lawm­na hi kan thil tawn leh hriat te, kan thil neih leh dawn te hian a siam lo a; kan lawmna min hriatpuitu khan hlim­na min pe ṭhin. Kan hlimna leh lawmna te hi keimahni aṭanga chhuak a ni lova, midang lak aṭanga kan dawn a ni zawk. Kan hlim chhan ber kan bula awm chu kan hloh thei a ni tih kan hre reng tur a ni.

Kan hlim lohin kan bula awm te chuan min tihlim tur a ni a, an hlim loh hunah kan tihlim ve bawk tur a ni. Tunah khan i hlimna emaw i tih kha ngaihtuah chiang la, i bul hnaia awm te kha an ni zawk tih i hre thei ang. I hlimna kha tihlim la, a letleh chuan lawmna a siam ang che. Chu chuan inchhir ve-na tur lakah a veng bawk ang che.

- Lalnunpuia, Kawnpui