Happy Father's day
Pa te tluka innghahna ban tlo leh rinawm an awm lo va, pa te tel loa hun chhiar hi a kim thei lo. Pa te u, fate tân an khawvêl rohlu in ni. Mangan harsat, chhiat ṭhat engkimah pa te hi an hlu zual.
Naupang chumchiap, hmalam hun thlira kawla nitin hringnun hmang mek tan hian pa te hi an hlu zual a, han damloh hnihkhat pawha ka pa tih tur te, hei hi ka duh ka pa, han tih ve theih te hi a va ropui em. Ka pa kha pa a ni bik a, vawiinah pawh hian pa te avanga khawvel nuam ti ber thlang dawn ang ni se, chung mite zingah chuan ka tel ngei ang le.
Pa te hi an hausa emaw an rethei emaw, eng mi pawh nise, pa an nih hlutna hi a nep chuang dawn lo. An dam rei zawh poh leh pa nihna a hlu ting mai a lo ni. Vawiina i pa lo kha, khawvelah hian pa dang i nei lo va; i pa tluka pa ropui an awm lo - zah la chawimawi fo rawh.
Ka pa hian tihian min fuih ve ṭhin, "Khawvêlah mi ropui nih a ngai lo va, thil ropui tak tih tum mai tur a ni," tih thu hi min fah fo va. Chu thu chu ka ngaihtuah chet cheta a hlu a, a tlo a ni. Pa te hmangaihna hi a kim lovin kan hria a, kan la hre fiah tawk famkim thei lo.
Pa te hi (Father's day) June 17 a lo thlen hian, ka pa kha ka ngaihtuah nawn leh ṭhin, kei leh chhungkaw tan hian chuan kan 'Hero of my life' a tih loh theih loh. Kan pa hi kan khawvel tan a hlu em a ni.
Ka pa hi tunah kum 67 vel kal mekin a hmelṭhatna a la ngai reng mai. A vun te chu a zur ṭan an ti a, mah se, pawma harsa ka ti - ka pa hi a la tar chhe te eih lo; kum 90 pawh nise, ka pa hi a tar ka phal ngai lo vang.
Hman ata tawh min hmangaihna a la ngai reng a, ka tan a ṭhat dan a la pangngai reng bawk. Ka pa kha a thawhrim avangin a vun a chuar ve ṭan a, mahse, ka tan chuan a vun te chu a zur lo va, a la nel thap reng a, a nupui, a tu leh fate tan hian a hlu zual zel mai.
Ka tana pa nih tlin leh fak phu, a ko-a mawhphurhna lum tawh phawt chu tlanchhiat san mai lo va, hmachhawn mi, ka tâna pa nih tling, he leiah hian vawi hnih piang nawn leh thei ngai pawh ni ila, ka pa tho hi - ka lei Pathian ni tura ka pa ni kumkhua turin ka thlang nawn leh tho vang. Ka tan ka pa a ni a, a hlu a ni.
Pa te hi zawng an lo ropui a ni e. Hei vang hi a ni ang khawvel hian pa te hi an lo zah a. Ram ropui Germany phei chuan an ram an sawi dawn apiangin 'Fatherland' tiin an sawi kher ṭhin. Pa te hi lalram an ni a, an áwpna hnuaia chhungkuaa awm te hi an him bikin an thla zar hnuaia awm te hi a manhla ṭhin.
Chhungkuaa pa ber te hi chhungkua inthlamuanna ber an ni a, chhungkaw chhiat ṭhata chhungkaw chahbi vawng nunga kawl him tlattu an ni. Pa te thla zarna hnuaiah fate an thlamuang a, an nupui te an hahdam ṭhin.
Pa te lalram pawh hi khawvel tiata ram zau a ni. Pa te tluka han ngaihsan tur thil dang ka hre tam lo hle. Pa te avang hian khawvel hi a hlu a, a chhunga chengte kan him phah asin.
'A damlai ngeiin i pa hmangaih rawh.'
- LH.Hauheng, Nghilhloh Rûn