'KEJRIWAL TLEM TEL RAGHAV CHADHA'

Zanin chu September thlaa The Times of India-in Delhi MLA pakhat chet velna an ziah hi ka chhiar a, a ngaihnawm ka ti mang e. Chu pa chu IG leh Twitter ah pawh ka follow ngat a ni.

Chumi chu Aam Aadmi Party MLA, Delhi MLA Raghav Chadha a ni. He MLA hi a duhawm reuh ngawt mai. Mizoram tan hian Raghav Chadha te ang MLA naupang tak, mi thiam, rintlak, rinngam, huaisen, dik si, smart si hi thehchhuah tur zawn a ṭha ngawt mai.

Hmanni lawka September thla laihawl vel khan Seemapuri leh Sunder Nagri Area ah Tui bill diklo chungchangah thil fel lo a awm nual nia sawi a nih vangin Surpise visit a nei hmiah mai te kha a ṭanawm teh e. Zonal Revenue Officer lah chuan Tui bill Complain tute chu zah lo taka a lo chhan avang leh a lo vau avangin an boruak a sang hman hle.

A hmunah Chadha hian va kal chilhin, mipui vanga hetiang hna hi thawk thei i ni a, engvangin nge i vau ngam? a ti hmiah mai. Meter reader 2 te thil ti dik lo pawh a hmun ah a ban nghal hmiah. ZRO (Zonal Revenue Officer) pawh amah ngei ke ngata kal kual a, tui bill check ṭha vek turin kar khat hun a pe a, chumi chhunga a ti fel lo a nih chuan a hna atanga bam a ni ve tur thu huaisen takin a hrilh hmiah mai.

Kumina kan electric bill dik lo lutuk te kha hetiang rap rap hian dikna duhin mipuite tan nghet leh huai taka ding ngam MLA leh Minister kan nei ve lo chu a ni phawt mai a. Rualawh a na ṭhin e.

Chadha hi Vice Chairman of Delhi Jal Board a ni mek, kum 32 mi, Chartered Accountant, Rajinder Nagar Constituency atanga hneh taka thlan tlin a ni a. A bial chhung mi nih thlamuan thlak thu bak mipuiin sawi tur an hre tawh lo an ti hial.

Kejriwal sorkar, Delhi sorkar khu chuan huai takin, "Kan hnathawh en ula, in mit a tlung loa, kan ṭha tawk lo a nih chuan min Vote suh u," tiin huai takin an hnathawh hmangin mipui an cho ngam.

Hetianga huaisen taka Campaign ngam, Arvind Kejriwal a kaihhruai AAP khuan nikum febuary thla khan a vawi thum nan, hnehtakin India ram khawpui Delhi ah Rorelna chu an chang leh ta reng bawk a ni.

Ringlo mi ang Delhi Chief Minister khuan, Isua in kawng a kawh hmuh angin ram kan hruai, tiin a sawi a. 'Kalphung Thar' tlawr taka nakina tih atana khek lovin, sorkarna kan siam hma daih tawh aṭangin kan kalphung a thar a, kan nitin hnathawhah kalphung thar mipui a takin kan hmuh tir a ni, a ti.

Amah Kejriwala hichuan lan ropui viau a tum lem loa, thawmhnaw manto leh changkang pawh a in bel ngai lo, kawrlum pakhat Kamis a ha a, pheikhawk or vawthlep a bun leh mai a. A in chei danglam ve ber ṭumi Muffler a awrh a ni mai a. Chuvang chuan "Muffler-Man' tiin an ko bawk.

MLA Car leina senso vel pawh a lungkham ve lem loa, Santro Old Model Car leh Wagon R a neih sa chu rei tak a hmang a. Tuna a pen hmanlai pawh cheng 10 hman chi, kum 9 chhung ngawt a hnang tawh.

Kejriwal hi ni16 August 1968-ah Sivani, Haryana, Delhi aṭanga km 150 vel a hlaah a piang. Gobin Ram Kejriwal leh Gita Devi te nupa fa 3 zinga upa ber a ni. A naupan lai hun tam ber hi Sonipat, Ghaziabad leh Hisar-ah a hmang. School pawh Sonipat-a Christian Missionary School leh Campus School, Hisar-ah a kal.

Thluak ṭha tak a ni a, topper a ni deuh ziah bawk. IIT Kharagpur aṭangin Mechanical Engineer Degree a zo thung. Kum 1989 khan Jamshedpur-a TISCO-ah a thawk a, Heta a thawh lai hian Civil Service exam turin a in buatsaih phah reng bawk.

Civil Service chu vawi khatnaah a paltlang a, IAS erawh a hmu lo, a exam leh a tling zui leh nghal mai. Mahse IAS a hmu ta chuang lova, tichuan, 1992-ah IRS chu a zawm ta. Kan rama Pastor pakhat, IAS nih chak deuh, mahse tling zo si lo, Pastor lama kal ta, dengkhawng tak taka thuziak vak vak ṭhin pakhat nen chuan an in ang lo deuh a nih hmel.

Kejriwal-a nupui Sunita hi IRS tho a ni a, IRS an trainning-na Nagpur-ah inchharin kum 1994 khan an innei. A hna chelh hmasak ber chu tuna Chief Minister a nihna state Delhi-ah niin kum 1995 khan Assistant Commissioner of Income Tax post a chelh a ni.

Mizorama kan hman lar leh kan hman ṭangkai tak em em RTI dan kan neih theihna tura theihtawpa hmalatu a ni, RTI dan a sual chhuah avang hian Ramon Magsaysay Award 2006 pawh hlan a lo ni tawh a, hemi kum vek hian a hna IRS Officer a nihna bansanin Social activist ni turin a hun pum a hlan ta zui a. RTI dan leh dun chuan eiru te a hailang a, mahse mi corrup-te a hrem thei silo, tiin India Against Corruption tih chu a tlangau pui leh.

Kum 2011 leh 2012 khan Anna Hazare te ho nen Corruption do in hma an la a, Lok Pall Bill atan nasa takin bei ho a. Chung zingah chuan Puducherry Lieutenant Governor hlui Mizoramah pawh lo awm tawh Kiran Bedi pawh a phusa pawl a ni.

An pawl aṭang ngawt chuan a beisei hlawhtlinna hmu mai turin a hre loa, a Anna Hazare lmte lak aṭanga kal chhuakin Aam Aadmi Party (AAP) chu kum 2012 khan a din ta zawk a.

A hlawhtlin tak meuh meuh. Flagship programme nei lem lovin Delhi khawpuia cheng te chu tui man te, eng chhit mante a titlem a, Delhi zirna chuan khawvel hmun hrang hranga mite zir chian hlawh khawpin hma a sawn a. Tun hripui lengah pawh an hmalakna chuan khawvel hma tih khawpin an che ṭha a ni. Delhi mipui tan khuan ava thlamuan thlak dawn tak.
India rama politician hriathlawh, mi ropui leh mi bik te bupui Delhi khawpui roreltu a ni a.

Thil kan tiam loa, tihhlawhtlin tur kan puang a ni, an ti a. Nikum Delhi inthlana khan hengte hi mipuite pek an tum tih an sawi a.

1) Delhli khawpui tan 24x7 Delhi khawpui chhunga electric pek. Hei hi an intiam anga kalpuiin an chhunzawm zel a, unit 200 chin thleng a free in an pe.

2) Tui thianglim in tur chhungkaw tinah pipe hmanga zawm chhuaha pek vek. Darkar 24 englai pawhin tui a haw reng bakah Litre 20,000 thleng a thlawnin an pe.

3) World class education an kalpui. Hei pawh an hlawhtling eltiang. Delhi khawpuia sorkar zirna in chu mipui ten an bawh nasa em ema. Zirlai pawh private aiin an tam zawk zel tawh.

4) Hriselna lam thuah hmanraw ṭha zawk leh changkang zawka thuam belh. Hei pawh hlawhtling tak an ni. An hlawhtlinna chu Covid-19 ah pawh a takin kan hmu.

5) Biggest and cheapest transport city - Delhi khawpui hi vei na kawng ṭha, kal velna man tlawm tih pawh a takin an kalpui. Bus 11,000 aia tam leh Metro pawh km 500 chuang siam belh te pawh nasa takin an ti hlawhtling tawh a. Traffic Jam pumpelhna turin Delhi khawpui traffic Jam tih ziaawmna tur kawngchhawng Seelampur Flyover & Shastri Park Flyover ni 10th Febuary 2019 thlaa lungphum an phum pawh ni 24th October 2020 khan an hawng tawh.

6) Delhi khawpui boruak bawlh­hlawh tihziaawm nana hma lak pawh nasa takin an kal pui. Yamuna luipui then thianghlim pawh an hlawhtlin pui zia a lang mek.

7) Bawlhhlawh paihna bag (carbage-free) a thlawna semna an siam.

8) Delhi khawpui chu hmeichhiate himna khawpuiah siam tumin 'Mohalla Marshals' an din. Hma an la nasa hle.

9) Thingtlang kilkhawr pawhtu kawng ṭha, tui, hriselna bakah CCTV hmangin an thuam.

10) Chenna tur neilo, mirethei tan 'Jahan Jhuggi Wahin Makan scheme' hnuaiah pucca building sak an kalpui.

Kejriwal hian heng hi Manifesto a ni lo. superior to Manifesto a ni, a ti mai. Tunah hian Delhi sorkar kalphung chu Political Party dang pawhin thil ṭha lam sawina atana tehkhinthu ah an hmang ta mek chu a nia. Hnam Runah te, Tuirial bye-election ah te nasa takin Kejriwal ang, AAP angin, Kejriwal aia ṭha zawkin kan ti thei, tihte kan lo sawi ve nasat tak em em hial ni!

- Lalrochhara Chhakchhuak