Review: Vice President of India M. Venkaiah Naidu visit Mizoram University

Mak angreng tak chu security mawlh kha. BJP mi un/ hlun (veteran an tih ang chi) a nih vang nge maw ni. A aia lal zawk President kal ta Pranab Mukherjee lo zin ṭum khan hetiang em hian security a nasa lo. Tun ṭum zet zawng hall (auditorium) chhungah ball point pen takngial pawh ken luh zu han phal lo a! Cell phone switch off vekin pawnah mahni bag chhungah hnutchhiah tur, zirlai ten mahni ID card ken ṭheuh tur, zing dar 10 ah chuan mahni seat luah tawh tur (dar 10 ah chuan prog kan la ṭan chuang lo) tih vel hi an protocol rawn hman duh zawng a ni daih mai.

Kan mi nghah ber a rawn thlen dawn tak tak chuan tumah nuih rik pawh an phal lo, security palian fe fe an tei fua fua a... kan thaw ngam ṭawk a ni. Heti taka security an duh uluk hian chhan ṭha tak zawng a nei chiang mai, a aia lal zawkah pawh hetiang ang em hian an uluk ngai lo. Mizoram hian BJP kan âwn vak loh vang a nih duh hmel. Christianity leh BJP Hindu in hmelmak ang maia kan sawi chamchi hian a ti hlauthawng ve te pawh a ni mahna le.

Programme ṭan chiah a zai bawk a ni leh pek! ‘Kan Zotlang Ram Nuam’ tih hla kha zirlai rualin an lo sak khum a, hrethiam ve tak maw. A hrethiam vak lo ni ngei tur a ni, dinglama ṭhu kan Governor Nibhay Sharma leh a vei lama ṭhu kan Finance Minister (zahawm tak) Pu Lalsawta te a zawt ru su su mai. Kan hnam hla lo sak khum hi ka ngaisang lo a, ka endawng a, ka mausam lam a ni hauh lo; hetiang programme hlu uchuak takah hian zai kan vawr daih ṭhin hi ka lo ui ṭhin zawk a ni.

Rimawi hi a hlu lo a ni lo, a dik tak chuan rimawi (music) hi Greek mi fing hmasa te phei chuan mihring te thlarau (soul) nen inzawmna nei turah an lo ruat hial a ni. Rimawi hian ṭhalai thaza rual, sahâwk chiam tur a thawi dam thei a, lungleng a hnemin beidawngte tan beiseina leh hlimna thlentu a ni fo ṭhin. Taksa sawizawina lam thil (gymnastics) hi mihring te taksa tan a pawimawh ang chiah hian rimawi (music) hi mihringte thlarau lam chaw ṭha tak a ni ve reng a ni tih hi mi tam tak pawm dan pawh a ni. Rimawi, zai tih te hi ka hnualsuat e tih na a ni lo. Hnualsuat hauh si lo hian a hun lo takah kan lek lam fo erawh hi chuan kei ang maia rinna pan te thlarau nun a ti khawlo zo takngial dawn!

Vice Chancellor thusawi
Thlarau chu thlarau, rimawi chu rimawi ni sela; kan Vice Chancellor thar Pu K.R.S. Sambasiva Rao thusawi (keynote address) mawlh mai kha ni. Address kha a ngah lutuk. Stage a ṭhu pha chin, heng - Vice President, Governor, Finance Minister leh kan Registrar te ho leh mipui kha min address se a tawk mai, tumah kan vui vai ṭalh duhin ka ring lo. ‘PS or PA to chumi khami’ tih zawng zawng nena address vek a tum khan hun a heh a, tih fo loh chi a ni. A thusawi a ngaihnawm si. Mizoram University mai ni lo Mizoramin kan mamawh thil tam tak a sawi a; chung zinga lar zual te chu Health care facility changtlung zawk neih te, South Campus neih dan tur te leh Airport kilkhawr tak kan neih mek te a duh khawp lohna te a sawi kha chuan zirlaite lung a dum hmel hle mai.

Khati khawpa Zoramin kan mamawh kan ram lalber dawttu Vice President hmaah a sawi sak sak ngam kha ṭha ka lo ti ve riau.

Governor thusawi
Kan Governor a lo ding ve leh a; hun rei tak ata Governor nei mumal loa BJP sawrkarin min siksawi hnuah Governor kan nei ta bawk a (BJP nen hian an in hnimhnai viau nge maw ni), a thusawi a ngaihnawm khawp mai. Zirna ngaisang mi tak tak (academician) a ni tih a hriat a, a thusawi ṭan phat aṭangin facts and figure nen a rawn che a. A thusawi tichiang turin thil tak entir nan a rawn hmang nghal zel thei kha fakawm tak a ni.

Mizo te hi 90% vel ziak leh chhiar thiam kan ni a, mah se 20-30% vel chauh hian hna thawh tur mumal kan nei thung! Hnamdang ten hetiang an sawi hian mi an chona (challenge-na) hian rilru a hneh lehzual. Kan Governor neih tawh te ang lo takin he kan Zotlang ram nuam chhawrpial run iang kan tih hi a fak mawi thiam riau lehnghal. A ma sawi dan tak phei chuan ‘ka ṭhiante Mizoram lo tlawh ve tur hian ka sawm ṭhin a - boruak chhia a awm lo a, in chuap te lo ṭhuah fai turin lo zin ve rawh u’ ka ti ṭhin a ti, tak tak ni maw.

Vice President thusawi
Governor in ṭhuthmun a remfel chiah a, Vice President chu a rawn ding ta.A enga mah hmain a rawn inla hnam hnuaihnung em em ringawt. Mawlmang zetin puan a rawn veng a, vai chapel naran a bun. Philosophy, theory, thought tih velah tawnhriat a ngah tawh hmel takzet a ni. Rin ang ngei ngeiin a thuam mawlmang chhan te a sawi fiah chho a. M.K. Gandhi ka ngaihsan em em chhan ang chiah kha a ni, Vice President (VP) ni mahse ka thuam leh incheina thlak ka mamawh lo e, ka chenna hmun chiah thlak ka ngai a ti mauh mai, pui tak a ni.

A dinhmun hi luah ve ta chiah ila chuan uchuak tak takin kan inchei fo a rinawm, mawlmang tak chuan a inchei reng bik lo ang tih chu a rinawm. Nimahsela mawlmang taka a inchei luih ngamna thinlung khan zirlai te a hneh takzet a ni. Kan nun ka in en let a, kan inchei dan leh kan thuam inbel te ka thlir let a, M.K. Gandhi-a’n ‘wear it with dignity’a tih kha min ti hre chhuak a, ka zak ngawih ngawih mai.

Thu tak leh hmasawnna
Kan ram politician-ten an tlakchham ber nia lang chu an ngaihdan mumal in sawh nghehna tur philosophy, theory leh thought an nei lo hi a ni. Zozial zu kan nuih zat a, Khumbeu khum kan hmu hmanlai a, thingtlang mi kan en hrang bawk. Thul pawh hre lo hian zoṭawng dik ziktluak lo hmanga mahni hnam zia leh kalphung nuihzatin facebook leh instagram-ah thlalak holam ve tak tak hmanga fiamthu thawh kan nuih pui a. Hnam boral zia ava han ni teh lul em.

Tu hnam mahin Mizo hnam hi min chawisan sak lo ang a, eng hnam mahin min rawn ngaisang tawp hek lo ang. Keimahni leh keimahni social media-ah kan in nuihzat chhung chuan Zoram hian nuihsawhtu a neih belh zel dawn. Lalsangluaia Renthlei hlaa ‘Kan hlimthla dik tarchhuak tu mausam ching’ a tih ang kha kan tam ta deuh a, kan buai phah leh si.

VP hian thil tam tak a sawi a, Politician a nih angin fiamthu a thawh bawng bawng a, a zinkual nasat luat vanga a in leh lo a tlawh khatzia a sawi phei chuan MZU Professor rual an nui hawk hawk hlawm mai. Kan ramah danglamna te, hlawhtlinnate thlen tur chuan thil ṭhenkhat kan chân (sacrifice) a ngai tih a tilang nasa. In leh lo hmu hman lo leh ûap hman lek loin nikum 2017 August thla aṭang khan a la buai hle ni tur a ni, he a thil sacrifice hian danglamna engawmaw tak India ramah thlen se tih hi a duhawm khawp mai. A dik a ni, eng thil emaw chân huama hna kan thawh tak tak loh chuan hlawhtlinna tak tak hmuh a har a, chân nei loa kan lo hlawhtling ta a nih pawn a hlutzia kan hrethiam phak lo fo ṭhin.

Culture, nature for better future
Mizoram lo thawh a thusawi tawh reng rengin an sawi uar ber ṭhin chu kan culture leh nature hi a ni fo. Kan ram thing leh mau te, ramhmul damdawi hausakna kan neih te leh kan hnam zia rang tih hmasawn a chumi hmanga changkanna lam pan ve hi an rawn sawi cham chi a, eng tehûalah kan lo ngai lem hlei lo a. Tun ṭumah pawh kan Vice President-in a rawn sawi uar ber chu “There has to be a combination of culture, nature for better future” tih hi a ni leh tlat. Kan hnam kalphung te chhawmnung chung zela hmasawn turin min fuih a, kan hnam ṭawng, kan hnam incheina, kan hnam lam dan a ni emaw, zai dan a ni emaw, kan hnam ziarang reng reng zah taka chhawm nung zel turin min fuih a ni.

Respect your mother
Point pawimawh tak tak a sawi zingah ‘never forget mother who has given you beautiful birth’ tih hi a ni. Mother a tih hian ‘nu’ chauh a sawina a ni lo; amah V.Naidu sawi ang deuhin ‘mother includes father also’. BJP sawrkar hian central party dang ang lo takin hmeichhiate dinhmun chawisan leh zah hi a tum viau; nu te dinhmun pawimawhzia leh hlutzia hi hmun dang dangah an sawi fo mai. India ram lui lian hming ṭhenkhat te pawh hmeichhe hming an put deuh vek thu pawh an sawi cham chi a ni. Heng Narmada, Ganga leh a dang te pawh hmeichhe hming an ni a, hetiang hi hmeichhia te kan chawisan dan tur kawng a ni tih hi an auhla pakhat a ni.

Never forget your homeland: Go, learn, earn and return
Khawvel hnam zawng zawng tana pawi­mawh deuh pakhat chu kan pianna ram ṭheuh hi a ni. Chumi pawimawhna chu hriain kan Vice President pawh hian a sawi uar ber chu kan ram tan ṭheuh tha leh zung thawh ve tura fuihna a ni. Communitarian zingah chhiar tel ve a la ni thuai ang.

Kan hausakna te, kan finna leh thiamna te, kan thiltihtheina te hi Pathian leh kan khawtlang (society/ community) aṭanga kan dawn vek a ni. Thawhrimna, inpekna, taimakna te a pawimawh ta lo tihna a ni lo; kan thiam thil tam zawk hi Pathian leh kan khawtlang min pek a nih angin pek let ve hi kan tih tur a ni. Tu mihring mah mahni chauha khawsak theih thu a awm lo a, (Aristotle rin danin ‘a solitary man is either a beast or God’) tu pawh hian kan khawtlangah leiba kan nei vek a, chu kan leiba rulh nan chuan kan khawtlang ṭhatna tur kan thiam leh theih tawkin hna kan thawk ṭheuh tur a ni.

Ramdanga lehkha zir duh pawh an tam ang, ramdanga sumdawng duh pawh an tam ang, ramdang hmu chak pawh an tam ang, nimahsela a tawpa pawimawh ber chu kan ram neihchhun Zoramah hian let lehin kan ram tan kan theih ang tawk i thawk ṭheuh ang u.

Respect your mother tongue
Kumpinu sawrkar (British) in hun rei tak kan ram min awp bet a, chumi vang chuan kan hnam ṭawng ṭheuh kan hnualsuat a, kan hloh zo tawh. Tunah chuan khang kan thil hloh tak te kha lak let a hun tawh a ni. Kan hnam ṭawng ṭheuh leh Hindi hi kan mit pahnih ang hi an ni a, ṭawng dang zawng (foreign ṭawng chhiar telin) hi kan khaw hmuh fiah zual nana min puitu tarmit ang chauh an ni.

Kan hnam ṭawng ṭheuh leh Hindi thiam loa India rama khawsak chu mit mu kim loa khawsak tum ang chauh a ni. Kan hnam ṭawng thiam leh Hindi thiam bawk a, foreign ṭawng dang dang thiam tel bawk chu tarmit ṭha tak tak kan khaw hmuh tifiah zualtu nei tel ang mai kan ni dawn tihna ni. Foreign ṭawng a tam thei ang ber thiam rawh u, nimahsela in hnam ṭawng hi thiam nasa ber ula, chu chuan in duh tawka in thil vei in sawi chhuah theih nan a pawimawh ber.

Google can never replace Guru!
Tun lai khawvel thiamna changkang tawhah technology-in hma a hruai a. Nimahsela, technology ringawt hian engkim min pe thei lo. Thawhrimna te, tei rei peihna te, zawldawhna te tel lo chuan technology hian hma a hruai thei chuang lo. Ṭhalaite chuan google hmangin an thil mamawh tam zawk chu an hmu thei tawh a. Chuti chung chuan kan Vice President chuan ‘google hian zirtirtu dinhmun a luahlan thei lo’ a la ti tho mai.

Internet-ah kan mamawh tam tak kan hmu a, youtube tutorial mai mai pawh thil zirna ṭha tak a ni; nimahsela, internet-in min zirtir theih loh pakhat a awm, chu chu moral a ni. Thil dik leh dik lo thliar hran dan te, thil tih awm leh tih loh tur te, kalphung dik leh dik lo te, thil zahawm leh mawihnai te, thu tak nun dan kawng te leh chhia leh ṭha thliar hran kawngah te hian internet, google etc., te hian min pui tak tak thei lo. Mihring nun min kaihruai theitu ber chu zirtirtu (vai hoin ‘Guru’ an ti) hi a ni. Chuvang chuan zirtirtu zah leh chawimawi hi mitin tih makmawh a ni.

Work hard, dream big: Dr. APJ Kalam
Thusawi tawp dawna ruai-ah ama tawnhriat a sawi chhuak chauh. Hlawhtlinna kawng tam tak zingah thawhrimna a langsar ber. Thawhrimna piah lamah beiseina sang tak neih a pawimawh tel bawk. Kan President hlui boral ta Dr. APJ Abdul Kalam pawh kha chanchinbu sem a inhlawh ṭhin a ni a, tuna kan Prime Minister Narendra Modi pawh thingpui sema inhlawh ṭhin a ni.

Tuna kan Vice President pawh hi ama sawi dan tak phei chuan lo neia chhungkaw eizawng ve mai an ni, an chhungkuaah han zir sang viau an awm hmel loh. “Sikul pang­ngai, sawrkar sikulah pawh ka zir ve thei lo a, khawlai leh kawtthler sikul siam chawpah ka kai ve ṭhin” a ti. Chuti chung chuan India ram Danpui bu a inziak hna sang ber dawttu Vice President dinhmun a la luah thei tho! A chhan ber chu thawhrimna leh taimakna, dawhtheihna leh thu tak nena nun a ni.

- Engkima Chawngthu, Chhiahtlang