Maldives-ah Football Inkhawmpui

Tui khai aṭanga ṭan a, ball liamte chhar a, player uniform-te su a, football thil a nih tawh phawta phur em em ṭhin tán ram hrang hrang football inkhawmpuia India palai nih hi ka beisei ngai lo.

Hei, tunah chuan ṭhiante thawh rah sengin kei hi a langsarah zel min dah a, India palai niin football inkhawmpui lian ka chhim ka chhim ve ta mai. Khawvel huapah min palaitir a, Asia huapah kan palai lawp lawp tawh a, tun ṭuma Maldives-a South Asian Football Fede­ration (SAFF) inkhawmpui - SAFF Congress-a ka palai dan erawh ka pawimawh ve ber ṭum a ni awm e.

Eng inkhawmpui nge?
Football inkhawmpui hi a hmingah 'congress' tih an hmang châwk a, tuna mi hi chu Asia khawmualpui chhim lama awmte football inkhawmpui a ni. Ziakah chuan India bakah Bangladesh, Bhutan, Maldives, Nepal, Pakistan leh Sri Lanka kan ni. Pakistan hi FIFA hremlai an ni a, Bhutan hi Covid-19 avangin an ram chhuahsan a la harsa a, ram panga aiawh chiah kan kal khawm thei. Heng ramten football-a hma an sawn theih dan tur sawi khawmna hun a ni a, kum khat chhunga hnathawhte pawm­pui leh nemngheh hun, kum lo kal tura football kal dan relna hun a ni.

Ram hrang hrang aṭangin an ram football association president leh secretary bakah palai dang pakhat an kal deuh ber a; Asia chhim lam rama football hruaitu liante kal khawmna a ni a, chutah chuan ka awm ve kûk a ni!

Pawimawh thar thut
Zêp tur a awm lo. FIFA Congress leh Asian Football Confederation Congress-ah kha chuan a ram mal angin sawi ve vak tur kan nei lo a, thusawina remchang pawh a awm hek lo a, iPad aṭanga an thurel tawh pawmpuina lo hmeh zeuh kha kan tih theih tawk a ni deuh mai - ram tinin iPad pakhat ṭheuh kan kawl a, agenda tawpah kan duh nge duh lo iPad kalhlangin kan vote mai a ni.

Tun ṭum chu ka kalpui tur AIFF General Secretary Kushal Das a nuamsam lo thut mai a, airport ka awm tawh hnuah min rawn bia a, a zin tur a ṭhulh ta - mawhphurhna zawng zawng ka kuta a hlan thu leh SAFF hruaitute pawh a hrilh thu a rawn sawi, a nemnghehna email a rawn thawn zui zat bawk. Ram tinin palai pathum an tir thei a, General Secretary-in a ṭhulh takah chuan kei leh AIFF Finance Committee member Kosaraju Gopalakrishna chiah kan ni ta a ni.

General Secretary aiawhin a hmaa ka telna tur ni lo, committee member ni sate chiah rorelna SAFF Executive Committee meeting-ah ka tel phawt a, a nihna takah chuan hei hi a kalphung pawimawh tak tak relna hmun a ni. Hetah hian thil tam tak ka zir a, football inkhaidiat chhoa FIFA aṭanga sum lo kal dan leh an inchuh dan, a hman dan leh sem zai dana ngaihdan inang lo, competition thlengtu nih inchuh dante a takin ka tawng - ka hriat lohzia leh ka hriat tlemzia ka hriat belh ṭeuh bawk!

Zawhna zawng zawng deuhthaw chhang thei AFC hruaitute an awm a; SAFF Secretariat lam lah an smart em em bawk a, hei hi kan la sawi belh ang.

Inkhawmpui hma inkhelhpui
SAFF Congress hi SAFF inkhelh­pui ber SAFF Championship final en pah thei tura duan a ni. SAFF Championship-ah hian India-in final an lut hlauh mai a, India team-ah hian Mizo tlangval Lalengmawia (Apuia) chiah kan thawh ṭum mah ni se a phurawm dan a nep chuang lo.

Apuia nen a hma aṭangin kan inbe reng a, final an luh chuan Maldives-ah kan inhmuh theih tur thu ka hrilh a, amah lah chuan bul an ṭan chhe deuh chung pawhin, "Final chu lut turah ngai ang," a rawn ti sam êt.

A nihna takah chuan tun ṭum India camp zawm tura a chhuh dawna Mizorama RTPCR test tur buaipui aṭanga buai dun tawh kan ni a, MFA hruaitu dangte kan pûr buai bawk a - hei pawh hi thawnthu hran nei tham a ni tiraw Apui!?

Champion nomawi nen
Tichuan, Apuia chu zawlnei a ni a, game hmasa pahniha point hnih chiah an hmù chungin a hnuhnung pahnihah point 6 hmuh belhin final an lut ta - a hmunah ka en thei dâwn ta.

October 16, 2021 - final khelh ni a ni. India an chak. An champion. Banah khelmualah zuk chhukin Apuia chuan min rawn hmù a, a rawn tlan phei a, kan in chibai chiah chu, "Hlawl mai a... Helaiah kan inhmuh hlawl chu," a ti a; minute 90 a khel tluan lo a vui lek lek a, nimahsela keiin yellow card a hmuh tawh vangin red card hmuh a hlauhawm avanga lâk chhuah a nih ka rin thu ka sawi a, amah pawhin a pawm dan tho chu a ni.

Lawmman sem hun a zo a, khelmualah ka lut leh a, thlà an la sap sap a, a sirah ka ding. Final-a India coach an hrem avanga team enkawltu India assistant coach Shanmugam Venkatesh nen kan inkawm reng a - ani hi hun rei tak lo inhmelhriat tawh kan ni a, youth development pawimawhna leh India team-a naupang lama beiseina a neih thute a lo sawi nual a, ama team enkawl bik Indian Arrows lamte pawh kan sawi.

AIFF Media Manager Nilanjan Dutta chuan min rawn ko a, "Sir, thlà va lakpui rawh. Nomawi kha keng la, Apuia nen khan la rawh u," a rawn ti a; dik tak chuan player pawh ni lo, team management-a tel ve loin mi nomawi lâk sâ thlà lo lakpui ngawt kha ka hreh deuh. Châk deuh si, hreh angreng siin ka awm a, nimahsela hetiang hun hi ka tawng remchang tawh lo mai thei a, India team pet chhuah champion nomawi thlalakpui turin ka phei ta a.

Apuia'n a ṭhiante hnenah, "Lo kalsan lawk teh u, Mizoramin thlà kan la dâwn," a han ti ngei bawk a!

RTPCR sawi ve teh ang!
SAFF palaite hi SAFF program­me-ah chuan VIP ang veka dawn­sawn kan nih bakah kan sawmna card-ah pawh chu chu a inziak. Final-ah hian Maldives ram President Ibrahim Mohammed Solih a lo kal dawn a, a bul vela ṭhu tur kan nih angin a hma ni-ah RTPCR test neih vek tur a ni a, kan hotel-ah test titute'n an rawn kal chilh.

Kei kha min phone theihnghilh tlat pek a, test tur tih engmah ka hre ve lo. Dik tak chuan zin chhuah dawnah negative certificate an phût avangin ka inhawlh tawh a, Maldives-a test tur min hrilh theihnghilh kha ka vui lo!

Tichuan inkhel kan en a, half time chawlhah stadium chungah VIP room-ah kan châwl. An ram President hoin thil kan ei a, kan chibai a, thlate kan lakpui hlawm a, a bul chiahah ka ding.

A hnua an sawi leh dan chuan, "An ram hotu lu ber a lo kal dawn a, VIP box-a awm tur zawng kha RTPCR test nawn leh vek tur kan ni, negative certificate tel lo chuan luh phal loh," tih a lo ni.

Hre ve ta lo chu bus pakhata chuangin palai zawng kan kal a, hmun khatah kan ṭhu khawm vek a, kei lah President hnung chiahah ka ṭhu an hlauthawn ber angin ka awm a nih tak ber chu!

Inkhelh a zo a, thil awm dan hotel-ah kan han sawi a, "Ka positive chuan kan vai buai dâwn a ni mai. An ram President hoin min quarantine a ngai ang," ka ti chu, Nepal FA President chu za em em mai hian a nui a, Bangladesh FA Secretary chuan, "An resort nuam berah ni rawh se," a rawn ti a, kan ri dár dár a, a hlimawm phian.

RTPCR sawi takah chuan haw dawnah test nawn leh vek kan ngai a, Pathian zarah kan haw dawn tuka result chhuakah ka negative leh hlauh. A chhe ber dawnin lo positive palh ta ila Maldives-ah khan ni 10 min khung dâwn nge, tunge awm man pe ang, tih mai mai ka ngaihtuah a...

Inkhawmpui thu leh hla
Executive Committee meeting neih zawhah, October 17 tlai lamah a SAFF Congress bera chu kan nei ta.

Sawi tawh angin Executive Committee thu rel pawmpuina a ni ber tawh a, inkhawmpui hnu­hnung ber leh tun inkara SAFF Secretariat hnathawh thlirna leh sum hman tawh auditor-te en tawh pawmpuina hun a ni bawk.

Chutih rualin Bahrain FA, Sir Lanka FA leh Nepal FA President-ten sawi tur an ngah thei hle a; SAFF President leh Bangladesh legendary footballer Kazi Ahmed-a Sap ṭawng thiamzia te, zawhna khirhkhan a chhan thiam ziate leh a rûk taka Bangladesh FA tana ṭha tura tlema awn lam a neih dante pawh hmuh hmaih theih a ni lo.

AIFF aiawhin ka ngaihdante ka sawi ve luam a; General Secretary ber a kal si lo a, a tawpah ka tel ve miah lohna India team aiawhin tournament thlengtu Maldives FA chungah pawh lawmthute ka sawi a, kawng hrang hranga min thlen danah kan lawm hle tihte ka sawi - team lam kha lawm tak maw?!

SAFF office (secretariat) hi Bangla­desh khawpui Dhaka lama awm a ni, chuta an staff panga chu inkhawmpui leh a inkhelh huaihawttu ber an ni a, an fakawm ngei mai. An zinga pathum hi UK lama lehkha zir an ni a, an thiamna a säng a, an Sap ṭawng a nalh a, an che vêl a professional em em - kei niin Vaiah rau rau pawh Bangladesh Vai kan ngaihsan ṭhat duh loh nen, zirnaa säng na nâ nâ chu an lo nep lo. Tlema thlen hlat hian keini ram hi zirnaah kan ṭan a ngai tih a lang chiang hle, rualawh a na duh.

South Asia FIFA Development Manager, ka ṭhianpa Prince Rufus a lo awm a, ani a awm tawh hi chuan kan leng halh zel. Nepal FA lamin FIFA Forward Project hnuaia Maldives FA hnathawh an en duh a, Price hian a endik pah dawn a, kal ve tura min sawm angin ka va kal ve a - Maldives FA hmunhma kan tlawh thu hi chu a hranpaa sawiah dah mai ang.

Ka lawm e
Tichuan, a tawpna siam a hun ta. Duh duhin India palai a nih ngawt theih loh, ka nih theih chhan chu MFA lama ka ṭhiante leh District FA hrang hranga ka thawhpuite vang a ni. AIFF lam hian Mizoram thil tihte hi lo hmùin min rawn duhsak leh ṭhin a, duhsak tlaka kan awm chhan erawh chu kan zavaia thawhona rah chhuah a ni.

A ṭhen chu a hah zual leh hna hrehawm thawk - a hling an ni a, a ṭhen chu a kungpui tak tak a kula taia ṭang an ni a, kei hi chu a tawpa a langsara pho chhuah, a rose par chauh kha a ni. A kung hi tliak teh se - ka par miah lo ang tih hi ka chiang a, lang lo lama phum bo a zung hi awm lo se ka par thei dawn lo.

Thawhpuite zarzoin football khawvela inkhawmpui lian, India miin an tel theihna ang chi chu ka tel kim ve ta - hengte hi 2003-a a vawikhatna atana Mizoram team enkawl tura MFA hruaituten min thlan laia ni sa hnuaia ball liamte pawh kan um hnak hnak lai khan ka ngaihtuah phak ngai lo!

- Lalnghinglova Hmar