KL Liana ‘Zion Khawpui ka pan laii’ tih kha midang phuah a ni thei
Dt. 24.4.2018 KL Liana thuziak Zion khawpui ka pan laiin tih hla lo pian chhuah dan kha ka lo chhiar ve a. Pu KL-a thu ziak hi chhiar a manhla in a bengvar thlak ṭhin a, thu dang pawh lo ziak leh ṭhin turin ka duh a ni. Chutih rualin he hla lo pian dan ka hriat ve dan ka rawn ziak ve ang e.
Dt. 4.5.1976 ah North Vanlaiphai aṭangin R. Lalrawna motor-ah Biate panin kan kal a. Saihnuna Sailo sakei kap thei Mualcheng ral E. Lungdar kal tur a lo chuang ve a. A sakei kah dan chanchin ka zawt a. Sakei sawm ka kap a, a ruang kan hlawm tak chu pakua a ni a, pakhat erawh chu thi ngeia ka rin a ruang hmuh zawh loh a awm a ni a ti a.
I hming pui pa Saihnuna Fanai, Leng lal hian hla a phuah thiam si a, hla hi i phuah ve em tih ka zawt a. Hla phuah hi ka tum ve ṭhin a, ka phuah hleithei lo a ni. A hming chuan pahnih ka phuah ve a, pakhat phei chu a thluk ka siam a ni lo a, chu hla chu ‘Zion khawpui ka pan laiin sualah hliamin ka lo tlu a’ tih a ni a. A thluk hi Lungchhuanah ka kal a, Hrangchhuana’n a thluk hi min lo siamsak a ni.
Hrangchhuana hi he hla thluk a siam zawh hnu lawk hian Zuchhip ah a pem ta a ni.
Tin, pakhat leh chu “Khawvel zawng zawng chunga hnam tinreng te, vangkhua kan lawina zau mah sela’ tih a ni. He hla hi chu keimahin a thluk ka siam a ni. He hla pahnih nen hian Leng lal ka u, Saihnuna hnenah ka zin chho a, min midang punin ka nau Saihnuna’n hla ṭha deuh a phuah a, lo zir ho ang u a ti a. Ka cham ta a, hlim takin ka sa ho ta a.
U Saihnuna chuan naktukah Biate ah mualhawi zai thiam deuh deuh an awm a, kan zin ang a, kan sa lar dawn nia a ti a, Biakte-ah chuan kan kal ta a.
Nuthlawi zai thiam deuh deuh mai pahnih Lianpuichhingi leh Hmingliani an awm a, Biate tlangvalho te nen ka hla phuah chu hlim takin kan sa a, chuta ṭang chuan ka hla phuah chu a lo lar ta a ni, tiin a sawi.
- H. Rokhuma, Venghlui