Tuirial bawlhhlawh paina hi

AMC kan neih hnu hian kawng tam takah hmasawn tura ngaih kan ni a, veng chhung step leh tui luankawr ilo siam leh rawng han hnawih thar vel kawngah phei chuan hma pawh kan sawn ve viauin a lang.

Hetih lai hian khawpui chhung bawlhhlawh kan sawngbawl danah duh khawp lo lai ka lo nei ve a. A bikin bawlhhlawh ṭawih thei leh ṭawih thei lo min han thlir hran tir a, chutah bawlhhlawh paihna tur bawm te pawh sum tak tak sengin UD&PA lamin an rawn sem thlap bawk a ni.

Kan bawlhhlawh bawm dawn te kha ṭhenkhatah chuan tui thal nan te hman a ni a, a ṭangkai zaw mah awm e. Bawlhhlawh han paihna thama lian a ni bawk si lo.

Chutihlaiin harsa taka bawlhhlawh kan thliar hran ve ṭauh ṭauh hnuah AMC lam zawkin bawlhhlawh paihna hmun lamah an lo thliar hrang leh si lo nia lang lai hi ka rilru tibuaitu chu a ni!

Bawlhhlawh paih­naah Congress party mi leh sate zu kalin bawlhhlawh hi thliar hran a ni em tih an zu en fiah a, mahse bawlhhlawh an lo paih pawlh leh vek si a, bawlhhlawh ṭawih thei leh thei lo te pawh hmun khatah paih vek a ni leh si tih an sawi khan AMC laka beiseina ka lo neih ve ṭhin a tichhia a, min ti hnual hle a ni.

Tunah hian bawlh­hlawh hi thliar fel a ni tawh reng em le? Congress party mi leh saten an zu en fiah a, paih pawlh a nih thu an sawi khan AMC lam hian an la thliar fel hman loh thu kha an sawi deuh ni ta in ka hria a, kha in sawi fiahna kha thil pawm awm tak ni pawhin ka ngai lem lo. A chhan chu AMC hi Aizawl khawpui free wifi pek an tum an pamṭul tak ṭhak chhanah pawh in sawi fiahna tur an lo nei tawh a, khawpui an enkawl danah hian thil tih tura an sawi tih loh an lo nei tawh tlat a ni.

Bawlhhlawh sawngbawl hi thil pawimawh tak a ni a, bawlhhlawh a nih avang namnul mai mai chi a ni tlat lo. Bawlhhlawh hi ngaih pawimawh tur a ni a, kan sawngbawl dan a dik loh chuan ṭul loah mipui min tihbuai chu thuhran mihring hriselna khawih pawi thei thil a nih avangin ngaih pawimawh hle tur a ni.

Kan AMC hian bawlhhlawh hi an thliar hrang tawh reng reng m le?

Tuna a dinhmun tâk hre turin bawlh­hlawh paih leh sawngbawlna hmuna luh hi a harsa hle in an sawi a, thil awm dan dik mipui hriatah puan ni se.

Faina Hapta kan hmang zo chauh a, kan bawlhhlawh paih dan ni lo, kan bawlhhlawh paih khawmnaa bawlh­hlawh sawng­bawl dan tak hi mipuiah han puangzar thei se. A phunchiar deuhin bawlhhlawh hi a paihna hmunah an thliar lo tih hi thu belhchian dawl lo ti ti mai mai nge a nih a, thil tak tak tih hi sawi chian theih ni se a lawmawm ngawt ang.

- Vohbika pu, Zemabawk