MNF tan tlin ngei ngei a ṭul

Mizo ṭawnga 'ṭul' kan tih hi chu a thlen loh chuan a pawi dawn tihna tluk a ni a, chu chu tuna Tuirial Bial Inthlan awm tura MNF tana tlin a ṭul kan tih hian a tichiang ber ang.

MNF tan chuan Ruling Party ni chunga a zawna Bye Election a chak loh hi chu 2023-a inthlan lo awm leh mai tura tla chiang sa tih signal a nih tawh avangin a siruk laa thawh chhuah a ngai a ni.

Serchhip a an chetsualna kha MNF tan inzirna tham a tling. Serchhipah khan an rawng huai an ser pawp a, Pu Vanlalzawma MNF Politician zinga mi hming ṭha leh hming hliauna nei lo, thiamna lama MA leh khawtlang rawngbawlna lamah chuan Central YMA President hial pawh kum tam tak ni thei, Kohhran lamah pawh zahpuiawm lo tawk ni phak leh Politics lam experience ah pawh term hnih lai mai Lok Sabha member ni thei kha an rawn vawrh chhuak a. A tlin loh nasat dan em em kha amah Pu zawma thiam loh ni lovin a MNF pumpui hnawlna a ang zawk tlat a ni.

Campaign ṭawng­kam chheh sual kha a tuar bawk a. Chief Minister leh MNF President-in Mizoram chhunga khaw pakhat ve tho Rangvamual lam hmu hniam tak zawnga tehkhin thu a sawi leh Serchhip bial chu MNF an thlan tlin loh chuan MNF lamin an hmuh hniam turzia a rawn sawi chhuak kha mahni lama pet goal an tih ang hi a ni ta a ni.

Tin, Chief Minister zui hnem bertu Sports Minister Pu Robert Romawia te pawh kha an campaign ṭawngkam kha a hawihawm lova, "Khawngaihin kan candidate hi lo vote rawh u," tih lam aia, "Kan candidate in thlan tlin chuan chu chu in nei ang a, in thlan tlin loh chuan in nei lovang," ti ang chi kha an sawi nasa tlat.

Hming lam chhuah loh Minister dang pawh kha an ṭawng dan dik lovin an ṭang ulh a, Pu Duhoma a tling leh ang tih an hlauh luatah an ṭawng sual ve nasa a, MNF tan a mualpho thlak ta a ni.

Tunah hi chuan bul ṭan thar leh tur an ni a, hawihhawm takin campaign tawh se. MNF an vote loh avanga Bial mipui vanduaina tur lam sawi tawh lo se vote a hui zawk ang. Tlawm takin an candidate vote sak hram turin sawm se a dik ang.

Ruling nih chhuang taka, "Ruling MLA in neih chuan chu chu kan tih sak ang che u, in vote loh chuan in nei lovang," tih hi a thawk na lo tih Serchhipah hmuh a ni tawh.

Lungdai hi Oppo­sition (ZPM) bial a ni a, an kawm chhak maiah Sihphir Ruling-ah pawh CM ngatin a bial an awm. Sihphir nihlawh zawkna leh Lungdai vanduai zawkna hi hmuh tur a awm chuang miah lo. Chuvangin, MNF tan pawh Ruling nihna zuar lova tlawm taka vote zawn hi a ṭha zawk ang.

MNF tan chet sual a thiang tawh lova, an tlin ngei ngei a ṭul a ni tawp mai.

- Lalremruata