Anthurium-in chhungkaw tam tak a chawm

Anthurium pangpar hian Mizoram sik leh sa-i a lo mil hle tih hmuhchhuah a ni tawh a, khawvel ram tam takin Mizoram tharchhuah hi an lo duh bik nia sawi a ni bawk. Kum 2002 aṭang khan Horticulture department hmalakna-in chhungkaw tam takin eizawn nan an lo hmang tawh a ni.

Mizoram sik leh sa-in Anthurium a ngeih tih Horti­culture department hotute chuan hriain kum 2002 khan Anthurium chingtu tur (grower) 24 a thlang chhuak a, department puihna-in chhungkaw 24 chuan an ching chho ta a ni. Zo Anthurium Growers Society chu Zo Anthurium Growers Co-operative Society (ZAGS) tiin an hming thlakin Cooperative Society-ah an in register a, tunah hian member 100 vel an ni.

Anthurium hi pangpar changkang (exotic flower) an tih zinga chhiar tel a ni a, pangpar thawn chhuah theih chi (export item) a lo nih avangin Zo Anthurium Growers Co-operative Society chuan Zopar export Pvt. Ltd. kaltlangin state pawn mai ni lo, India ram pawnah pawh an lo thawn chhuak ṭan a, pangpar changkang tia sawi a nih vangin mamawh (demand) hmun thuma ṭhena hmun khat pawh thawn chhuah tur an la thar lo hial a ni.

Anmahni enkawltu Horti­culture department chuan Anthurium chinna tur hmun siam nan te, green house leh a ṭiak mai bakah leiṭha thlengin an mamawh a tumsak tam hle a, training te pein theihtawpin a chawikang a, a chingtute nen thawhhona ṭha tak neiin inthurual takin an kal chho mek a ni.

Zo Anthurium Growers Co-operative Society chuan anthu­rium te state pawna thawn chhuak tam turin hma a la a, kum 2012 khan Mizo tlangval pakhat kaltlangin Delhi-a pangpar zawrhna hmunpui Ghazipur Phool Mandi-ah zawrha theihin hma an la hlawhtling ta a ni. Mizoram aṭanga thawn chhuak tur hian uluk taka fun leh enkawl a ngai a, chuvangin a tirah chuan Ramhlun South-ah mimal in luahin heta ṭang hian an thawn chhuak ṭhin.

Aizawla collection centre an neih theih nan Horticulture department chuan theihtawp a chhuahpui a, Ramhlun LAD office bula Commerce & Industry department building floor khat chu he Society luah theih tur hian phalsak an ni. Horticulture department chuan RKVY sum hmangin he building floor khat hi cheng nuai 43 zet sengin a siamṭhat (renovate) sak a, he collection centre-ah hian pangpar vawn-

ṭhatna turin cold storage room te pawh a siamsak a ni.

He collection centre cum cold storage hi ZAGS chuan an hmang ṭangkai hle a, pangpar chhe mai tur vawnṭhat nan te, hmun hrang hrang aṭanga Anthurium lokal dahkhawm nan te an hmang mek a ni. ZAGS report aṭanga a lan danin kum khata pangpar an hralh chhuah hi kuang nuai nga vel a ni a, a pawisaa chhut chuan cheng nuai 50 vel bawrah an ngai a ni.

Anthurium chingtute chuan kum 2012 aṭang khan Del­hi-a Ghazipur Phool Mandi-ah Ningani apiangin thlawhtheihna hmangin an thawn ṭhin a, a thawn man hi kg khat Rs. 100 vel niin kuang khat thawn man hi Rs. 2 vel tihna a ni a, an thawn aṭanga tun thlengin flight cancell a awm lo niin an sawi.

Mizorama tharchhuah Anthurium hi hmun dang aiin a tle nalh bik niin ZAGS report-ah chuan tarlan a ni a, Karnataka leh Kerala thar­chhuah ai chuan Mizoram tharchhuah chu an thlang zawk niin tarlan a ni bawk. Delhi leh hmun danga an thawn chhuah reng reng a bo a bang awm loa hralh vek zel a ni a, chuvangin a ching duhte pawh ZAGS chuan theihtawpa puih an inhuam thu an sawi bawk a ni.

- Lal Rinmawia