I ta ka ni

TV hi kum 4 vel kalta aṭang khan ka en mumal tawh lo a. Ka en ve chhunah pawh football hi ka en deuh ber a. News leh thil engemaw deuh chauh ka en hman a, tunah phei chuan Hostel-a kan awm avangin TV ka en lo leh zual.

Kum 2016 Krismas dawna kan ina ka awm laiin LPS ah hian Lalngengpuii Tochhawng hi a lo zai a. Amah hi Mizo hmeichhe zaithiamah chuan ka duh ber pawl a ni a, hemi ṭuma a hlasak 'I TA KA NI' tih phei hi chu ka vawikhat ngaihthlakna aṭangin ka duh nghal em em a. TV-a a zai zawh veleh a hla sak chu You Tube-ah ka zawng nghal a.

A satu hian a sak thiam bakah a thlûk hi nalh ka tiin a thu mawlh mai hian min hneh a. Khatih laia ka nun chau leh ro em em mai kha he hla hian a puang chhuak chiang em em a. Chung ka nun harsatna leh buaina, ka beidawnna leh ka dinhmun zawng zawngte chu hreawm hle mah se Lal Isua ta ka nihzia leh Lal Isua rinchhana hneh theih a nihzia he hla hian min puanchhuahsak chiang hle.

He hla phuahtu Joy Zairemmawia chu a hla thu-Lyrics hi ka va dil a, a ni'n phal takin min lo pe a, a chungah ka lawm hle.

Mihring kan nih chhungin hun harsa tak kan paltlang fo a. Kan nun a chauin a rûm fo a, pan lam tur leh kalna tur hre loin kan awm fo ṭhîn. Chutih lai chuan Kristiante kan vanneihna êm êm chu Lal Isua kan nei tlat hi a ni. Kan mangan lai leh kan harsat lai takin Lal Isua'n kan dinhmun tawh mêk chu min hriatpui a, chu chuan kan nun chau leh hreawm tak chu a thlamuan a, thla­muanna leh hlimna kan nei ṭhin a ni.

Kan nunah engthil pawh lo thleng se - thihna, mualphona vawrtâwp pawh - Lal Isua ta kan ni. Chung harsatna vawrtawp pawh chu Lal Isua kianga kan awm tlat chuan hnehin a lo awm leh nge nge ṭhîn a ni tiraw?

Kan rinna kawngah te, kan rawngbawlnaah te Setana'n min tih­chhiat tumin min bei a. Kan rawngbawlpui te, kan mi rin êm êm te'n kan chhiatna tur an ngaihtuah châng te lo awm mah se Lal Isua ta kan nih chhûng chuan kan hneh zêl dawn a ni.

Kan nunah hian harsatna te hi lo thleng lo se chuan Pathian hi kan mamawh lo in kan hnaih loh phah fo ang. Hlimna leh lâwmna, hlawhtlinna te kan chan lai hian chung zawng zawng min petu Lal Isua hi theihnghilhin a awm fo a ni tiraw?

Kan nuna harsatna hmangin Pathianin Amah hnaih turin min ko a, Amah kan kalbosan hlen lohna tura heti ang harsatna kan tawk ṭhin te hi kan va vannei êm tiraw? Chuvangin, engkim kan chunga thleng hi min hmangaih vang a ni tih hi hre nawn fo ila. Amah kan neih tlat theihna turin engkim kan chungah a thleng a ni tih hi kan hriatthiam phawt chuan lawmthu sawi mawlh mawlh tur kan lo ni.

He khawvelah piah­ah zawk kan nunna hi thuhruk a ni tih kan hriat chian phawt chuan he khawvel buaina, harsatna leh lungngaihna te hi tawk ṭhin mah ila kan nun a ti chhe zo tak tak lo a ni.

Lal Isu, keimahni mai chuan kan kal thiam lo fo ṭhin a - i ta ni tur hian. He khawvel harsatna leh buaina te hmang hian Setana'n min ti buai fo a. I ta kan nihna lakah hian chhuhsak che tumin a hmanhlel êm êm a. Chatuana i ta kan nih zel theih nan kan hnungah min chhawm la, kan hma min hruai sak la, min chelh tlat zel ang che.

Keimahni maia kal dan tur leh i ta nih zel dan tur kan hriat tawh loh hun a lo thlen chang pawh hian min nei tlat la, i ta kan nih ang ngeiin chatuana i ta kan nih theih nan i hmangaihna kutin kan dam chhung leh kan thih hnu thlengin, chatuanin i taah min siam ang che.

- Rinfela Zadeng