Compensation la tura Revenue Pass dil chungchang kha
NH 06/306 kawng zauh hna thawh neitute dik lo taka thun tuma compensation lak tum an awm tih, ZPM MLA Lalduhoma'n a sawi ka lo hriat ve dan kan sawi lang ve ang e.
Mizoram sorkar Revenue Department-in thuchhuah a siam anga Kawnpui huam chhunga ram neiten Valid Pass an dilna a dik lo anga pass nei tura thunluh tuma an puhna awmah hian hetiang hi an hmalakna an kalpui dan nia ka hriatte chu a ni.
Kolasib District chhung, a bik takin he NH-06/306 kawng chei ṭhat turah hian thu a tam a, MoRTH hian Notification an siam zulzuiin kawng siamṭhatin a ei chhiat tur ramah Revenue Dan angin Valid/ Revenue Pass ni lo VC Pass nei an tam a. Heng VC Pass neitute list hi Bhoomirashi Portal-ah MoRTH hian 3(A) angin update/ dah a ni. Heng zingah hian sorkar ram (Government Land) Mimal LSC, House Pass leh P.Patta lo neisa tawh mi engemawzat an awm ve tho bawk a, chutih rual chuan VC Pass lo neite hian an ram leh huan hi hun rei tak aṭanga eizawnna atan leh an pi leh pu aṭanga an huan rochun an lo neih ve te a ni hlawm tho bawk a ni.
Hengte hi tih chhiat tur a nih tak avangin zangnadawmna (compensation) an dawn turah hian thil felhlel tak tih tuma puhna ram hruaitu MLA-in a sawi chhuak hi dik ber niin a lang lo nia hriatna ka lo nei a.
Ram neitu dik takte dan anga pass siamsak hi sorkar pawhin a tih turah ka ngai a, hetah hian dik lo taka ram P/Patta lem siam tum lo awm ta pawh nise sorkar hian thil dik lo titu chu a hrem thei a, chutiang ti ngam chu an awm ka ring lo bawk. Helai hi tlem han sawi zua deuh ila. Sum leh pai thilah hian mihring rinawmna hi a lo chak lo viau ve thei tho bawk a, kan ram hruaitu lu te ngei ngei pawhin 'Compensation Hnam' kan ni te pawh an lo ti hial reng a ni.
Chutiang bawkin chhim lam kawng laih zauh hna KMMTTP road a zangnadawmna lak tumnaah hian Mizoram aia zau mah ram lak (aquired) a awm niin MLA ten session-ah pawh an sawi chhuak hial a. Hetiang hi kan dinhmun mek te pawh a lo ni ve zel bawk a ni.
Engpawh nise tuna 4th Lane kawng zauh hna thawh tur bikah erawh Mizoram sorkar Revenue Dept. hi an fimkhur viau niin a lang. MoRTH lam duhdan leh acquisition kalpui dan turah heng VC Pass neite hian ramhlutna (land value) hi an dawng thei dawn lo nia a lan tak avang hian, Revenue Department chuan notification chhuahin Valid/Revenue Pass nei loten Valid/ Revenue pass an neih theihna turin thuchuah a siam ta a. 3(A) hnuaia awm lo erawh Notification 27th May, 2021 a chhuahah hian belh leh khawih danglam a remtih loh avangin ram neitu dik tak ni lote chuan ram pass dilna an thehluh ngam a rinawm lo bawk. Hetianga 3(A) Portal anga Notification chhuaha ram neitu pass teh mek/ dil mekte hi fresh allotment anga ram teh sak ngawt an ni lova. Ram enkawl ṭha sa leh in sak sa, 3A Gazette Notification a VC pass anga ziah luhte an ni hlawm a ni.
He National Highway siamṭhat chungchangah hian tlangdunga khaw awmte zingah, dan leh dun hrethiam em em lo tam tak an awm nia hriat niin zangnadawmna (compensation) lak tumna ah hian dan lam hremi ukilte leh aiawh hmala tur (cosultancy) rawiha anni te nen a insiam rem a. An sum lak tur aṭanga chanvo (percentage) hauha inremna neia hmalak tum pawh an awm bawk niin hriat a ni leh zel bawk.
Hetiang a nih avang hian thu dik lo leh sawrkar anga hmalakna, Revenue Department dan pawhina a sawi loh thu leng vak a tam em em a, tin 3(A) Portal a Notification-in a chhhuah ram neitu VC pass neite valid pass sorkar hian lo pe chhuak ta pawh nise an ram hlutna sum zangnadawmna (compensation) hi an la thei kher ang em tih pawh zawhna tam tak awm thei a ni thei tho bawk.
Lalnunzira Chawngthu