Kawprem tura tuah rem: Art leh Science

Thuhma

Chapchar Kut 2010 Art Exhibiton, Vanapa Hall, Aizawla neih zawh takah khan kan Chief Minister (CM), Pu Zoramthaga lem, Tv Laltlanchhuaha ziah chu MNF ṭhalaite’n an lo la bo daih mai a. Social Networking site lamah sawi zui a hlawh hle. Kei pawhin ka lo hmu ve a. ‘Painting’ pawh hi mihring ṭawng ang thoa thil kan hmuhdan, hriatthiam dan leh a nih dan kan puanchhuahna a ni. Khatia an lak bo sak khan Tv Laltlanchhuaha chu ṭawng thei tawh lo turin a kaah puanchhia an hnawh sak ni maiin ka ngaihtuah a. A telna pawl, Mizoram Art Development Society-in a thlavang an hauh dawn emaw tih laiin thupha chawina leh ngaihdam dilna CM lakah an chhuah daih maite khan ngaihtuahna a tikal thui duh viau a ni. 

Lemziah mai bakah thlalak lam (photo­graphy) ah pawh hma kan sawn a, lawmawm takzet a ni. Lemziak lama tui leh thla lak thiam (photographer) te hi an ril ka ti ṭhin a, an  bula awm pawh a hahdam, an deh pawh a nuam 

ṭhin khawp mai. Pu Tlangrokhuma hi lemziak thiam a ni satliah lova, a chhehvela thil awm, nungcha, thing leh mau te, rante nen thleng hian inzawmna thuk tak an nei a ni. Chuti ang zelin thla la thiamte pawh. 

Mizo-te chu science ngaisang hnam kan ni a. Pawl 10 first division-a pass thei tawh phawt chu science la turin chhungte leh ṭhiante’n an beisei ṭhin. Kei pawh hi Physics zirlai mek ka ni a, chuvang chu a ni mahna science hi ‘art’ lam ai hian ka lo dah chungnung ve ṭhin khawp mai. Mahse, art leh science hi thil thuhmun a nih theih dan ka hmuh thiam hnu khan ka inthlahrung ṭhin ta viau mai! 

Kawprem tura tuah rem

K Hminga hla ‘Ka hringnun diary’ tih hla kha in lo ngaithla ve tawh em? Mi tam tak thil tawn mahse an sawi chhuah thiam loh, hla thu tlemte hmanga awmze nei lutuka a lo sawifiahna a ni. Kan chhehvela thilthleng, kan hriat ṭhin (observe) te nen a tehkhin kual a, mi tam tak tan chuan kha aia chianga hrilfiahna kha a awm leh thei tawh lo maithei. Hla thu bakah rimawi hmangin a thusawi tum chu a sawi belh chhah a, hei hi ‘art’ kan tih chu a ni ber mai. 

Science leh art hian kan chhehvela thil awm leh thil thleng mekte hi hriatthiam an tum ve ve a, midangte hnenah chu chu hrilhfiah an tum ṭhin. He subject (discipline) pahnihte hian tih dan phung (tradition) erawh an nei hrang ve ve kan ti thei ang. Mahse, an tum leh nihna bulṭhut chu: ‘enga ti nge?’ tih leh ‘eng tin nge?’ tih zawhna aṭanga lo inṭan ve ve a ni. Chu zawhna chhanna chu midangte hnenah sawifiah an tum ve ve a ni. Art chuan thu leh hla, rimawi leh lemziak, thlalak te’n hrilhfiah a tum a. Science hian mathematics formula hi a thil hrilhfiah tum nan a hmang nasa a, mah se thu leh hla, rimawi leh lemziak te, thlalak pawh a hmang tho. 

Scientist leh artist-te hian inanna lianpui an nei a. Chu chu mite ngaihtuah ngai loh anga thil thlir emaw thil hmuhchhuah emaw hi a ni. Chu chu a sapṭawng takin ‘creativity’ an ti ṭhin. Scientist chuan lei lung pianken (natural law) in a hrinchhuah thil thar hmuchhuak niin inchhal ta sela mahse chu chu lemziakin emaw mathematics formula-in emaw a puanchhuah theih loh chuan engmah a ni chuang lo. Chuti ang chiah chuan ‘artist’ pawh hian thil ngaihtuah chhuak ta sela chu chu lemziakin emaw a thuin emaw rimawi hmangin emaw a puanchhuah thiam leh si loh chuan a awmzia dawn lo tihna a ni. 

Mizote’n lei hipna kan tih mai, Netwon’s law of gravitation pawh hi a danglamna chu leiin thil dang a hip dan a sawifiah thei hi a ni a. Newton-a’n a hmuhchhuah hnu pawh hian ‘lei hipna’ a awm tih chu kan hre vek alawm mah se engtin nge a hip dan tih lai tak hi kan hre lo thei a ni. Chu chu scientist kan nih lohna lai tak a ni thei tihna a ni ber mai, a chunga ka sawi tumnaah khian. Laboratory leh studio-te hian inanna an ngah a, helai hmunah hian thil lo pawm tawh sa dah ṭhain, dilchhut takin an thiam leh finna zawng zawng sawm khawmin an chheh vela thil nihphung leh nihnate chu hriat chian lehzual tumin an bei ṭang ṭang ṭhin. Hlawhchhamna mawlh mawlhna hmun pawh a ni tel ve ve bawk a, chutih rual chuan mi taima leh peihrei, dawhthei te awmna hmun a ni e pawh kan ti thei ang. 

Hrang tura duan an ni lo

Art leh Science hi hrang tura duan an ni lo. Art leh science kan tih hian zirna discipline zawng zawng hi an huam tel vek a. A hmaa kan sawi tawh angin zawhna inang an nei a, chu chu hriat fiah an tum a. Chu chu midangte tana ṭangkaina lo chhawp chhuah an tum vek a ni. Tunlai khawvel zirnaah phei chuan hetia kan hriat subject-te hi an zir zawm (inter-disciplinary) nasa a. Art subject leh computer science te hi entirna tlanglawn kan hriat mai theih a ni ang; linguistics-ah phei chuan a pui nasa em em a ni. 

Mizoram University lama environment leh life science lama zirbingte pawh hian ‘thalakna’ lam hi an hmang nasa khawp mai. Nungcha, ramsa, thing lehmau chanchin zir chian nan an hmang tihna a ni. Ka subject zir ve mek Physics lamahte hian kan hmang nasa teh e! ‘Eng’ hmanga thlalakna bakah ‘electron’ hmanga thlalakna te, ‘atomic force’ hmanga thlalakna te tel lo hian a tih hleih theih tawh loh a ni ber mai! Chuti ang thlakna hmuchhuaktute pawh chuan Nobel Prize an dawng reng bawk a. 

Art leh science inzawmna avanga zirna (eduation) hrim hrim hi ka ngaihtuah apiang hian thil ngaihtuah chhuah ka nei ve ziah. Chu chu hei hi a ni: civilization lo chhuah ṭanna atana pawimawh em em ‘mei alh’ an hmuhchhuah kha. Hmakhawsang (prehistoric time) a mei an hmuhchhuah kha a rilin a thuk ka ti ṭhin khawp mai! Science leh art tih hming la awm hma a ni. A hunlaia khawsa anginhan insuangtuah chhin la… Mei alh hmuchhuak tur khan ‘art leh science’hi hmang kawp bik riauin i hre ve lo maw? 

Chu ‘mei’ an hmuhchhuah chuan mihring thlah kal zelah pawimawhna leh ṭangkaina a ngahzia chu sawi ngai lovin kan hre ṭeuh ang. Mifing, Philosopher turu tak mai Zarathustra phei chuan thil engkim siamtu ‘element’ pali awm niin a hmuchhuak a, chung zingah chuan ‘mei’ hi a tel a ni. He element palite hi rei tak chhung chu thil tam tak hrilhfiah nan leh hriatthiam nan an hmang a ni. Chu chauh a ni hlei nem, hmanlaia hnam changkang, civilization ropui tak tak neitute khan ‘mei’ hi pathian angin an lo be deuh vek bawk, ‘fire god’ chi hrang hrang tamzia hi hriat sen pawh a ni lo. Sakhuana pawimawhzia leh engnge a nih tih chu kan hre vek awm e. 

Renaissance lamah kai ta ila. Mahse kan sawi kan nasa a, ziah vek sen a ni lo. Renaissance hun lai ami Leonardo da Vincierawh kha chu sawi hmaih chi a ni lovang. Ani kha tunlai ṭawngkam takin Scientist a ni a, engineer a ni bawk a, painting leh drawing a thiam em em a, lem ker thiam (sculptor) a ni tel a, architechture a ni bawk. Mathematics a thiam hle a, thil hmuchhuaktu (inventor) a ni bawk a, a subject thiamna leh hmingthannate kha ka sawi bak pawh hi a la awm ṭeuh a ni. 

Mifing leh thluak ṭha (superhuman intelli­gence) tih a ni a, tin renaissance-ah khan a thawh hlawk em avangin ‘Renaissance Man’ tih a ni hial. Ani khan tunlai thiamna mila kan hriatthiam theih turin ‘art’ leh ‘science’ awmze nei taka lo thlun zawmtu kan hriat lar a ni ang. A bik takin Mathematics leh aerodynamics lamah khan thil lem ziah kha a hmang ṭangkai viau a. Tun hnu thleng hian science lamah kan chin phah hial a ni. Tin, khawvela lemziah lar ber ber, kan hmuh ve fo ‘The last supper’ te, ‘Mona Lisa’ te hi ama kutchhuak dai tawh ngai lo tur kan hriat theih tur a ni ang. Engpawhnise, science kan tih hrim hrim hi art aṭanga lo zi chhuak a ni tih hre hrim hrim bawk ta ila a ṭha ang e. 

Ti tawp ang

Kan ziak thui leh ta viau mai. Science lam hawi ang chi te, tin tuna kan ziah ang chite hi mipui nawlpui zinga sawifiah har ka tih ve em em ṭhin. Eng chin nge kan sawi ang a, eng lam hawi zawngin nge kan sawi ang tih thlan chhung ringawt pawh a rei ṭhin khawp mai. Tute emaw talin an lo ṭangkaipui takin kan ti a, kan han ziak veleh ta rawih a ni. Ziak hi a sawi nen a inang lo va, ‘Art’ chi khat a ni ve a. A harsa viau ṭhin mai.