EYE DONATION
Kum tin India ramah midangte tana mit petute chawimawina hun 'Eye Donation Fortnight' hi hman ṭhin a ni a, chu chu 25th August aṭanga 8th September hi a ni. Hemi hun chhung hian Mizoram Eye Bank chuan hmun hrang hrangah awareness campaign nei ṭhinin, he hunah hian mit petu mitthite kha tel thei tawh lo mah se an chhungte hnenah certificate hlanin chawimawi ṭhin an ni.
He Eye Donation Fortnight lo chhuah dan chu hetiang hi a ni - India ram Prime Minister hlui boral ta, Rajiv Gandhi leh a chhungten mitdel khawngaihthlakzia leh lainatawmzia hriain kum 1995 khan mitdelte tan an mit an lo pek tawhna aṭanga lo irh-chhuak a ni.
Mihring taksa bung ṭhenkhat hi mihring taksa vekin a thlak theih a, chung zingah chuan mit (eyes) pawh hi a tel a ni. Taksa dang thlak dawn chuan a petu thisen leh a peka thisen inmil kher nihte a ngai, thil dang pawh ngai a awm mai thei. Chuvang chuan taksa peng dang pe tur chuan a buaithlak bik a ni. Mit erawh chu thisen inmil nih kher a ngaih loh avangin mit thlak hi taksa dang thlak aiin a hlawhtlinna a sang bik.
Kan dam laiin kan mit hi mitdelte tan kan pe thei a, kan dam laia pek nachang kan lo hre lo palh a nih pawhin kan thih veleh kan chhungte remtihnain kan pe thei bawk. Kan chhung leh khat hnaivai emaw, kan ṭhenawm khawveng hmelhriat boral an awm pawhin an mit kha mitdelte tan a pe turin a sawi hmuh theih bawk. Khawlai a ni emaw, mahni in a ni emaw, damdawiin a ni emaw, ruang awmna hmun apiangah mit hi lak nghal mai theih a ni. Damdawiin-a lak kher a ngai lo.
Mit pe tur chuan mi an thih/ hnukchah aṭanga chhiara darkar 8 chhunga mit chu lak hman ngei tur a ni. Tunlai thiamna sang zelah mit pumpui hi lak ni tawh lovin, mit pawnlang fim lai (cornea) chiah hi lak ṭhin a ni, mitmu dang zawng chu a awm ngaiin a awm. Mitthi hmelah hmuh hreawm emaw, mitthi hmelah danglamna emaw engmah a awm phah lo. Mit pawnlang fim tlemte chauh lak a nih avangin a lak chhung pawh minute 10-20 vel lek a ni.
Mit pe tur hian...
1. Kum bithliah a awm lo
2. Thisen inmil a ngai lo.
3. Tarmit power hniam/ sang vuah ṭhinte pawhin an pe thei vek.
4. Zunthlum veiin an pe thei a, zunthlum avanga mitdel an nih pawhin an mit darthlalang a ṭhat phawt chuan a hman tlak vek.
5. Thildang engemaw avanga khaw hmu fiah lo an nih pawhin an mit darthlalang a ṭhat phawt chuan an pe thei.
Kan taksa ṭawih chhe mai tur leh phum bo mai tur hmangin kan thih hnuah pawh midangte tan malsawmna kan la ni thei cheu; Kristiante tana tih awm tak ni pawhin a lang. Kan nitin hnathawhnaah hian mitdelna thlen theitu chi hrang tam tak a awm.
Tuna mit var neite pawh kan hmalam ah eng nge lo thleng dawn kan hre lo, mitdel dinhmuna ding thei vek kan ni. Chuvang chuan hawh u, kan mit ṭawih chhe mai tur hmang hian midangte tan thih hnu malsawmna thlentu nih i tum ṭheuh ang u. Hre chiang duh tan:
Mizoram Eye Bank,
Civil Hospital, Aizawl
Ph: 9436354701/ 2324564
Email: mizeyebank@gmail.com
C Rothuamliana, Mizoram Eye Bank