MIZORAM BEAT CONTEST HMASA BER 1975

Kum 46 zet liam ta thil thleng ni tawh mah se a ropui leh a hlimawmzia ngaihtuah let chuan nimin maia thleng ang chauh kha a la ni a. Contest beitute enge maw zatin mual min liam san tawh mahse vanneihthlak takin dam ṭha lai kan la neih te an lung a leng ve ngei ang tiin i han thlir kir leh teh ang.

A hmasa berin he contest 1975 lo irh chhuah dan leh buatsaih chhan pui ber chu hetiang hi a ni. March 1, 1966 ah Mizoram a buai ṭan a. Ngam loh chala chilhnawm an tih ang maiin Sawrkar laipui rawn thawk let chu na tak a ni. Jet fighter bomb, khawhal leh sawikhawm, pawngsual, pawisawi leh pawisawi lo tawrhna zawng zawng kha ngaihtuah let leh ngam loh khawpa na leh rapthlak a ni.

Hun a kal zel a, boruak a ziaawm hret hret a, 1972 ah chuan sawrkar laipui chawm leh hrai dinhmun UT ṭha miah hlankai kan ni ta a. Mahni sawrkar neiin rorelna pawh ministry hnuaiah a piang chho ta zel a. Chuti chungin zalenna sual tia rammute chu India sawrkar chuan helpawl, dan pawna hnawlh leh an nihna invuahte pawh mahni in phuahchawp (self styled) lekah ngaiin a dang chep sawt ta hle mai a. Rawlrala che in in lambun, in rukbo leh inkah a la awm zeuh zeuh tho a, boruak a la ralmuang tak tak thei chuang lo.

India ram state danga la awm ngai miah lo sawrkar hnathawk hotu lu ber atan Indian Police Service pachal, Scotland Yard chhuak ngat Surendra Nath chu Chief Secretary atan a lo chhuak a. A lo chhuah hma hian Ch Chhunga ministry phei chuan dodalna thu an thlen nain an hlawhtling ta lo a ni. He pa hian Information, Public Relations and Tourism Director RL Thanzawna chu a rawn thawhpui nghal chat mai a. Mizoram dinhmun leh boruak thlirin ngaihtuahna fim leh hmathlir thui tak neiin an thawh dunna pawh a ṭha viau reng a ni.

Ramhnuaia ṭhalai eng emaw zat la rammu te chu man leh veh kual mai lo zawnga thlem chhuah dan kawng dap in khawpui nun chu ṭhalaite tana nuam leh hlimawma siamin chu chuan ṭhalai rammu mekte a koh chhuah ngei an ring tlat a ni. Chuvang chuan Aizawl khawpuiah intihhlimna hrang hrang Christmas Fair/ Fete, on the spot painting, Recitation, Cultural Programme, Tableau te huaihawtin a hmasa ber atan Mizoram Beat Contest pui tham tak buatsaih an rel ta a ni.

Kum 1977 ah Aizawl sipal lammualah Thingtang concert huaihawt a ni chho ta zel a. 1978 kum tira Beat Contest buatsaih leh phei chu a nghahna hmun Theatre Hall-in a dawl zawh tak ngial loh avangin a chhunga leng lo mipui sosangin an chim chhe zo ta a, chhunzawm tluantling lovin a ṭil ṭiak ta nghe nghe a. Hei hian Vanapa Hall sak bul ṭan a hring chhuak ta hlauh zawk a ni.

Mizoram chanchin ziak a hmasa ber 1975 Beat Contest chu chawhnu her aṭangin zan curfew dar 6:30 bawh buai lo tawkin ni thum chhung mipui dawl zo ber tura ngaih AR Cinema Hall-ah buatsaih a ni ta a. A bul ṭan ni Ningani, April 29 ah chuan hun tan hma hauh aṭangin lammual leh a chhehvelah mipui an pungkhawm a. A chhunga leng ve phak lo a let tam takte chuan Lammual pangper an bel ta ngawt mai a ni. Woodstock vanglai a ni hawt mai.

Zaipawl 10 zetin hun an hmang a, zaipawl hrang hrang Creation Flame, Silk, Athanga te (Zotinkhuma te ṭhianza ho), Diamond Cross leh Waving Beat hote chuan vansang boruak awmna china leng vel ni ta mai awmin chung a ngaithlatute chu a chawk phur hneh hle a ni. An hla sak ṭhenkhat 'See me, feel me, touch me'- Creation Flame, 'Born to be wild' 'Day after day'-Silk, 'While my guitar gently weeps' - Athanga te, 'I am, I said' - Diamond Cross leh a dangte chu a lo sa tawhtute sak dan nen danglamna a awm chuang lo.

Jeremy Zobiaka, Creation Flame pawla mi leh Zosangliana Murray, Silk pawla mite chu mipaah chuan a langsar zualte an nia. Jeremy a aw phawi chuan Grandfunk ho aw phawi a zul hle a, Zosangliana Murray aw ve thung chuan Tom Jones leh Engelbert Humperdinck te aw lak kawp a pawl hle thung a ni. Mizo hla an sakah te chuan anmahni duh ang zawngin sap hla an sak ang bawkin thiam takin an sa ve tho mai.

Creation Flame hi ṭhangtharte duhzawng rimawi ri bur bur leh chher chhuai chhuai (heavy metal) vawrh lartu tak an ni a. Saichhunga ṭingṭang zut chiau te chu pui ve tak a ni. Exodus, Crimson Dust hmingpuin an lar zui rei ta viau nghe nghe.

A tukah chuan mipui tam zawk an in hawr khawm leh ta. 'The Vans' pawlte chu sawi lan loh rual an ni lo. An pawlah hian unau mipa pahnih leh an farnute pahnih, ṭingṭang hruaitu leh khuangpu, Mizorama thiam bera puan ni ta nghe nghe, Saithangpuia te ho an ni. An farnute pahnih Vanhlupuii leh Vanlalruati te chu Mizo zinga zaithiam hmingthang an ni. Sial rangin sial rang a hring an ti mathlawn lovin Mizo hla phuah thiam leh rimawi tum thiam mi, Vankhama thlahte an ni a. Vanhlupuii'n 'The last thing on my mind' leh 'Laura' a sak leh Vanlalruatin Olivia Newton John sak tluk hial mai a 'Let me be there' a thlawh chu a mawi takzet mai. 'Wipe out' tih rimawia an rem zet phei chuan tu pawh mai hian zuan thawh lawka han suk tan mai chu an chak ta mai niin a lang a.

Zaipawl dang pakhat The Flaming Splinters te pawh an duai bik lo hle. Vanlalhmangaihi, a zai vawrtu ber leh ṭingṭang remtu ni pah bawk chu an pawla an chhuan tawlawl a ni. An hla sak 'California, Here I come', 'I'll write your name thru' the fire, 'Sally was a good old girl' leh anmahni phuah ngei, he mi Beat Contest atana an hlut bik, 'Mizoram Beat' (Rimawi rem) te chuan an thiamzia a tilangin a ngaihthlak a nuam em em a ni.

Zaipawl dang Lover's Group, The Meteors leh Living Sound te pawh chuan belhchian an dawl hle bawk a. Chhimtuipui District tih ṭhin Kaladan tuipui ral lam mite pawh an ral bang awzawng bik lo. Lai Singing Melody, Chhimtuipui Music Revival te zai chuan a lo dawngsawngtute chu kut an bentirin an ke an lo per thlap thlap mai bawk a ni.

A ṭiak ni, Inrinni chu sawm bikte tana buatsaih a ni a, zai mite pawh chu thlan bikte an lo ni ta. Mizoram Larsap SK Chhibber chuan thu tawi a sawi a, zai mite, buatsaihtute leh a bik takin Chief Secretary, akul ataia a tir aṭanga buaipuitute chungah lawmthu a hrilh. Larsap chuan he Kutpui hi 'Mizoram UT a nih hnua thil thlengte zingah a la ropui ber a ni', a ti hial a ni. He Kutpui hi Aizawl khawpuia Scouts leh Guides te'n Hnam Hla sain tih tawp a ni.

Hripui lengin min kiansan se la, tun dinhmuna zofate zai leh rimawi lama kan san tawhzia pholan leh nan contest ropui tak huaihawt leh theih hun a nghahhlelhawm ta hle mai.

Zothankunga Mission Veng