RUIHHLO DO

Kan ram zim te min runtu lian ber chu ruihhlo hi a ni ti ila kan tisual lovang. Ruihhlo avanga chhungkua leh khawtlang kan rum nasat dan ngaihtuah hian a rapthlak a; min kiansan a hnehin zual lam a pan tial tial emaw tih tur a ni lehnghal vei nen. YMA lam pawhin kum puanah an lo nei fo tawh a. Do rem tih ni erawh a awm lem lo thung.

Kan thiam ang ang leh theih ang angin ruihhlo kan do a, kan SRS lam te pawh an thawhrimzia ngaihtuah hian an fakawmin an khawngaihthlak zawk letling hial.

Heti taka ruihhlo kan do chung pawha lukhawng a nei chau si hi ngaihtuahna thar sen a va hun em! Ruihhlo kan do danah hian dik tawk lo lai kan nei em aw tihte ka ngaihtuah fo ṭhin. Ruihhlo tih hian rukruk, dawt sawi, mi bum leh buaina a keng tel a; a tuartu chhung­kua leh khawtlang tan chuan tawrhhlelhawm tak a ni. Chu buaina lak ata kan fihlim theihna tur atana ruihhlo ngaite khawi Home-ah emaw kan han nawr luh mai hi a ṭhat viau rualin a la famkim tawk lo. Ruihhlo do kan tih hian in um bo te, in vaukhan te leh in hrem ringawt a kawk lo va, taksa, rilru leh thlaraua dinthar lehna leh siamṭhatna hna a thawh tel si loh chuan awmzia a awm thui lo ṭhin.

Ruihhlo supply titlem tura tlawmngai pawlte ṭha­hnemngaihna te, khawtlang himna tura tha leh tui senga an inpekna te leh mahni in lum pawh thlahlel thei lova zankhaw tairek thleng thleng an han duty mai ṭhinte hi an fakawm em em. Hetih mek lai hian kan ngawlvei man khawmhote hi Home-ah emaw Jail-ah emaw kan inthawn liam piah lamah hian an sim hlen theihna tur leh rilru ngaihtuahna hrisel tak a thara an put leh theihna turin a enkawlna lamah hian tan kan lak a ngai hlein ka hria.

Home emaw Centre-ah emaw khuahkhirhna hnuaia an awm rikngawt te leh tih tur a awm loh avanga an tih loh rikngawtte hian an nun a siamṭhat phahin an saltanna ata a chhuah zalen chuang lo va. Addiction hian taksa mai ni lovin rilru leh ngaihtuahna thui tak a khawih chhiat tawh avangin zawi zawi leh thiam taka mithiam kaihhruaina hnuaia seilian tur an ni tih hi kan hriatpui a ngai. Ruihhlo an tihṭan kuma an rilru bak hi an puitlin belh tehchiam lo an ti ṭhin; chutiang tak chuan an rilru ṭhan a ṭhuttir a. Naupang ṭhang lian mek kan kaihhruai ang maia kan kaihhruai an ngai a. An thuawih loh avanga an ruihhlo tihte avang tein kan thin a ur fo va, a dik lutuk. Mahse, a ngawl an vei tawh miau si chuan inpawng huata inhrem ngawt ai chuan chhanchhuah an ngai a ni tih hi kan hriat a pawimawh hle.

Kan ngawlvei enkawlna Home leh Centre-te hi an chhangchhiain, facilities ṭha leh inenkawlna duhthusam pawh kan nei mang lo va.Taksa tihhriselna tura hmunhma

ṭha leh damdawi lam thiamte enkawlpuina pawh a awm ṭha lo fo. Rilru lama an harsatna leh an saltanna ata pui thei tur mithiam leh counsellor

ṭha han thutchilhtu an awm lo fo a. Home-a kan indah lut ta sa sa sa a nih si chuan an ṭhat hlen theihna tura kan Home leh Centre-te thawm ṭhat lamah hian ṭan i la tlang teh ang u.

Kan ruihhlo dona kawngah, a do hrim hrim te, ngawlvei thununa man te, a zuar ṭhin man kawngahte chuan kan tiṭha viau a; mahse, an sim theih tak takna tura anmahni siamṭhatna kawngah hian tuna kan ruihhlo enkawlna hmunte hi tihchangtlun deuh dan i ngaihtuah ang u. Veng tin tlawmngai pawlte pawh hian chhung tin aṭangin kan phal ang zat ṭanpuina te hi khawn mai chi a ni ang em? Tuna kan Centre neih sate bak hi ngawlvei siamṭhatna hmun dang kan nei si lo va; an pachhe hle si.

C.Tea, Durtlang Venglai