CYMA HRUAITU THLAN TUR NGE TERM PAWH SEI TUR?
Kumin hi tuna CYMA hruaitu in mek te term tawp hun a ni ta a, kan zoram khawvel boruak lah kan heti nuaih mai si. Inthlan loh a, hruaitu dinglaite term pawhsei mai tur nge ni ang, inthlan hram tur ni ang? CYMA hi Mizo khawtlang nunah a pawimawh em em avang leh kan hnam sukthlek thleng pawha awmze nei thuk thei tak a nih avang hian, hruaitute hawiher lo inthlak theihna, hruaitu thlan pawh hi thil pawimawh tak a tling a ni.
Tuna hruaitu dinglaite lu pawh hai maithei. Chu chu inthlan theih hram dan zawn leh mumal taka chhuanlam siama inthlan rih loh ngaihtuah a ngai miau dawn si a ni. Hetiang dinhmun a nih lai hian Branch leh group te Sub Hqrs ten hruaitu thar neih dan an zawn hram hram a, YMA inkaihhruaina dinglai pawh kal pelh hret a ṭul huna in hriatthiamna nena inthlang hram hram deuh vek a nih te hre telin CYMA hian hma a lak ve hram a pawimawh dawn a ni.
CYMA inkaihhruaina dinglai ang thlap chuan General Conference leh Inthlan hi a buatsaih thei kher lo ang tih chu mi pangngai chin chuan kan ngaihtuah thiam vek awm e. Nimahsela, Branch leh Group te, Sub Hqrs tam zawk pawhin Covid 19 hrileng karah inthlan hram dan an zawng ang khan CYMA hian a duh chuan kawng a zawng thei a ni.
Inthlan theih loh chhan tur ni theite :-
1. Hruaitu dinglai term tawp tawh mai turten chhuanlam ṭha tak Covid 19 hrileng denchhena inthlan theih loh a nih chuan term pawhsei hmangin CYMA an la khalh leh rih thei a, chu thil hlu tak anga ngaitu a awm theih. Mimal puhchhiatna tur lam ni lovin, thil awm palh thei a ni.
2. Branch leh Group te, Sub Hqrs ten inkaihhruaina dan pawn deuh hreta hruaitu inthlang hi lo awm nual bawk mahsela ‘CYMA meuh chuan tih ve loh a ṭha e’ tia thu mawi leh pawm nahawm hmel tak chhakchhuaka term pawhsei tih tluk pui khut theih a ni.
Hengte hi hruaitu dinglai chuan inthlan an duh lo hle a nih loh chuan, a solution ngaihtuah chhuah chu an mawhphurhna dik tak niin alang. Chuvangin inthlan theih dan kawng zawn hi chu, kalchhuak mai tawh tur tan phei chuan thil pawimawh tak zawk a ni ang. Inthlan theih dan kawng awm thei te han thlir leh ta ila :-
1. CYMA hian Branch tam ber leh Group, Sub Hqrs hruaitu dinglaiten inthlan hram dan kawng an zawna, an kawngzawh ang khan inkaihhruaina dinglai hi ṭhattlanna kawng a kawh tho chuan, her rem ve rih lawk sela, “Dan a ni lo e” tia beilettu an awm chuan term pawhsei pawh bei lettu an awm tho theih dawn a, inthlan chu a theihdana tih mai a ṭha lo'm ni aw?
2. Mizoram sawrkar phalnain Synod khawmpuite pawh kaldan in her rem hretin inkhawmpui neih a lo ni tawh tho a, in her rem ve hret chu duh lam neih a len vanga sawihnawm a nih ngawt loh chuan hripui karah kan pawm thiam tlang viau mai thei.
3. Vote thlak tur number tihtlemin zangkhai takin Group leh Sub Hqrs ah vote a thlak ṭheuh theih bawk ang. Vote thlak nan hian CYMA ngat phei hi chuan electronic voting machine pawh an hawh chhuah theih hial a rinawm.
4. Tunlai technology hmang ṭangkai hian, Returning Officer fel leh rintlak ruat a Postal Ballot emaw email, whatsup/ surveyheart format siam pawhin inthlan a buatsaih theih ang.
A theih dan kawng dang pawh a tam ang. Tuna kan khawmpui hminga ‘General’ tih a tel avang hian, General deuha kalpui huau kher hi a remchan lo ang e tia rilru siam a, inthlan pawh remchang ta lo bura ngaihna a lo awm palh a nih pawhin, YMA ten kan hun tawng ṭheuh en hian, chu ngaihdan chu a dik ber lo thei. CYMA hruaitute hian hruaitu term tawp (thlan nawn theih tawh loh te pawh tiamin) pawhsei sak ngawt lova inthlana felfai tak neih a, hruaitu tharte kuta he pawl zahawm tak a awm ngei theih nana hmalak hi a dinglai te mawh a ni. Pawl zahawmna hum zel tura thutlukna dik an siam ngei i beisei teh ang.
Lalrammawia