Tuirini Lei chim leh kan moral

Lei dawhlai chim a awm leh mai ṭhin hi a van­duaithlakin a pawi ngawih ngawih mai. Mihringin nunna kan chan phah hian a pawi dan a tizual. Mihring thi-ah pawh a hnathawktute an nih chuan a la hriatthiam theih. Hnathawktu ni lo vantlang zinga mi an nih hian kan fimkhur lohzia a tilang zual.

Mizoramah hian kan fimkhur loh vanga hetiang hmuna thihna thleng a awm leh zauh ṭhin, a pawi takzet. Hman kumah Electric Lift dahna tur, Lift dah hmain in chhawng sangah a luhna kawngkhar hawn theih maia hnutchhiahah mi pakhat a tlahlum tawh a. Hetiang deuh hi hmun hrang hrangah chanchin hriat tur a awm leh zauh ṭhin. Hetiang thil chetsual theihna ang chi reng rengah hi chuan hlauhawm chhinchhiahna dah zel tur a ni a. Chumi dan chu kan zui miah lo tihna a ni.

Hei hi ram changkangte kan phak lohna leh kan hmasawnna tur pawimawh tak a ni. Khawilaiah pawh thil la siam peih loh tlak mai theihna leh hlauhawmah reng reng chuan ‘Hlauhawm chhinchhiahna’ chiang kuang tak, langsar takin dah zel tur a ni. He dan hi In a ni emaw, Lei a ni emaw, kawng a ni emaw construction hna thawk reng reng chuan zui zel nise a ṭha.

Tuirini Lei dawhlai chim chungchangah pawh a hnathawktu ni lo, pawn lam mi, kaltir hi thil pawi tak a ni. Vairam lam abikin South India-ah chuan In sak lai reng reng hi hung phui vek a ni ṭhin. Kal mai mai theih pawh a ni lo. Private in pawh an hung vek mai a ni. Israel te hnenah Pathianin an in sak thar chu thisen chhuahna in a nih loh nan a chung te pawh hung kual vek turin a hriattir (Deuteronomy 22:8).

Lei dawhlai chim tih hrim hrimah hi chuan lainatna tel hauh lova kan in diriam zui vak leh politics khelh nana kan lo hmang vat ṭhin hi a pawi hle. Hei hian kan kristian standard a tichhe ṭhin. Tu chungah pawh thleng thei a ni tih hriat a ngai. Nikum 2017 chhung ringawt khan khawvel hriat tham Lei dawh lai chim pakua a awm:

9 March-ah Italy-ah a chim a; 11 March-ah leh 30 March-ah USA ve veah a chim a; 18 May-ah khan Goa India-ah a chim a; 26 June-ah Kenya-ah a chim a; 9 August-ah South Africa-ah a chim. 14 August-ah Israel-ah a chim a, 10 September-ah Greece-ah a chim a, 2 December-ah Czech Republic-ah a chim a. Kumin 16 January-ah pawh Colombia-ah a chim a, mi 9 an thi a, panga an hliam.

Lei dawhlai chim hi tuma duh dan a ni lo. A dawhtute pawhin a ṭha thei ang bera dawh an duh, chuchu an hmingthatna a ni. Amaherawhchu, kan duh hauh loh chhiatna hi tu chungah pawh thleng thei a ni a, khawvela sawrkar ropui ber berte Lei dawh leh in sak te pawh a chim fo mai zawng a nih hi. Chuvangin, heng ang thil a lo thlen hian in diriam zui mai lo va, lai natna nen kan kristian standard kan vawn reng a ṭha.

Esauva thlah (Edom ho) ten Jakoba thlah te an haw em em a, Babulon-in Jerusalem an tihchhiat nia diriam taka ‘tichim rawh u, tichim rawh u, a lungphum lam pawh kar chhiat sak vek rawh u’ an lo ti ang maia (Sam 137:7) in diriam tur kan ni lo ve.

Commissioner Lalkiamlova