SATELLITE THLALAK HMANGIN RAMRI A CHINFEL THEIH EM?

Satellite thlalak (image) hmanga ramri buai chin fel chungchang hi tun hnaiah Union Home Minister zahawm tak leh Assam Chief Minister zahawm takin an sawi lang ṭhin a. Hun rei tak chhung Satellite Remote Sensing lam ka lo buaipui tawh avangin hemi chungchangah hian kan ram hruaitute leh mipuiin ngaihdan kan neih theih nan tlem ka’n ziak ve ang e.

Tuna kan ram, Assam lamin an ram anga min rawn chuh lai reng reng hi, a tlangpuiin Inner Line Regulation,1933 ramri leh hemi mila North Eastern Area Reorganisation Act, 1971-a ramri an ziah hmanga Survey of India-in ramri a siam ṭan chhana hma an rawn lak a ni hlawm. He an ramri hi keini hian pawm ve ni ila chuan satellite thlalak leh Geographical Positioning System (GPS) nen ground survey rei tak ngai lovin, awlsam taka rin leh chin fel mai theih chu a ni. Chuti ang bawkin, Bengal Eastern Frontier Regulation Notification, 1875 hmanga ram ri hi Assam hian pawm ve ta se, ground survey tlem nen awlsam taka rin fel theih a ni ang.

Amaherawhchu, Assam-in ram ria an pawm hi Mizoramin kan pawm ve lo a, Mizoramin ram ria kan pawm hi Assam lamin an pawm loh avangin ram inchuh a lo awm ta a; chu tak chu a buaina lai a ni ta a ni.

Thil buaithlak leh pakhat chu keimahni lam min rawn lo leh kan pawmpuina tel loa Survey of India-in an map-a ramri an lo siam hi a ni. Tuna Mizoram zau zawng official-a kan ziah ṭhin, 21081 sq. km. hi North Eastern Area Reorganisation Act,1971 ram ri, Survey of India Topographical map aṭanga chhut niin a lang. Heta ramri (demarcation) ang hian satellite thlalak leh SOI map-te hmanga ramri siam a nih chuan tuna Mizovin kan ram luah leh enkawl lai ngei ngeite pawh hi eng emaw zat kan chan thei dawn a ni.

Chuvangin, satellite pawh hmang dawn ila tuna SOI map-a ramri hi chu pawm chi a ni lo, tih kan chian a ṭha.

Ramri hi satellite thlalak hmanga chin fel ngawt chi a ni lo va; a hmanraw pawimawh tak erawh a ni a, rawtna siam nan pawh a ṭangkai hle ang. Ramri rin dan tur hi political level-ah a tlangpuia sawiho hnuah chumi bawhzui chuan satellite thlalak hmangin kan rin chauh ang a; a hmun (ground)-ah pawh kal a ṭul ang.

Mizoram leh Assam hian ramri buai hi tih reh tak tak kan duh a nih chuan a tlangdung leh lui luang awmdan azir te, mihring lo inbenbel tawh dan leh tuna huan lo ram awm dante pawh ngaihtuahin insiamrem ngai chin a awm ngei ang. Kimchang taka ramri duan hnuah, state pahnihte’n an pawm tlan chauhin ramri chu chin fel theih a ni ang.

Ramri rin nan satellite thlalak hman a nih dawn chuan a buaipui tur hian North East Space Application Centre (NESAC), Umiam, Shillong an hmang turah ngai ila. Mizoramah chuan Mizoram Remote Sensing Application Centre (MIRSAC) kan nei a. MIRSAC hi satellite hmanga ram zir leh map siam chungchangah chuan rinrawlah a hman theih ang a. Anni hi lo inbuatsaih ta sela, kum 1875 ramri huam chhung ram hi satellite data, resolution sang hmangin lo zir ta sela, a ṭha khawp ang.

A hmun (ground level)-a ram chin chungchang hrim hrimah chuan Land Revenue & Settlement Department te, Environment , Forest and Climate Change Department leh ramri bawr vela khaw hrang hrang Village Council-te pawh an ṭangkai thei viau ang.