KAN LAMA ṬANG CHU A LAMA ṬANG AIIN A CHAK ZAWK SI A (II Chro 32:7)

Min thlahtu, kan pi leh pute ram sah kuak, an rawn tih buai pawh ni lova, kan ram min chhuhsak hlauva inhrosak nana Sap pachal an thah zarah, a rulh letna an dawn, Chanchin Ṭha leh ram luah tur chin ramri kham an hlawhchhuah kha, kha ram ngei kha tuna kan luah ram hi a ni asin.

Finna inthlau: Chu ramri min khamsak chu hauh bur policy hmang thiam lovin, khaw Lal kan neihte tukdawl an nih hnu khan Lal dang kan thlan chhuahte khan ramri khamsa chu a hauhna paper ziah thar zel kha, document ṭha a nihzia an policy-ah telh nachang an hre si lova. Kan ṭhenawmte lah, A, AW, B kan neih hmaa, BA pass ringawt pawh khaw khat daih nei an nih tawh avangin document chhah pui mai, min rawnna tel hauh lovin an lo tiang ul tawh mai bik si a.

Satelite map leh Con­stitutional boundary tan chhana neiin, kan opposer Himanta Bishua Sharma lah chuan, Bangladesh aṭang Hindu lo lutte dah khawm nan, min rawnna nei lova ramri an lo rin ve chu a rawn hmu tai hlur ta mai si a. Central lama a tlaktlumna hmachhuanin, sipai leh sum leh mihring ka ngah alawm tiin. A theihna rawn show dan khan Mizo thisen a ti lum ta tlat mai si a. Kan ṭan thiam ve danin kan lo nawr let ve ta mai a ni e.

A lama ṭang chu...: A ropuina leh thahrui te, thuneihna tlang sang aṭanga min hnuaichhiah thei nia a inhriatna te, ei leh ina min hrek rilṭam a tum dan te, min vau zam tuma commando 4000 rual a sawi fo te, min tih hmingchhiat tuma Burma ral tlan hum nana ram hauhva min puhna te, drugs mafia te nena ṭang anga min tar chhuah a tumna zawng zawng hi, heng a tha tih chaktirtu nia a hriatte hi, a chakna thahrui tun maia a hman chhuah hmasakte an ni. Heng lo pawh hi thil dang a la hmang zel ang, theih nise he ram ngei pawh hi a zavaiin a patta a duh hial ang chu.

Kan lama ṭang: Keini chuan khawvel thil ropui chhuan tur kan ngah ve lo, kan chhuan chu chung Pathian venna leh kan thisen fartir a, he kan ram neih chhun hi, thisen far tawp tlenga humhalh a ni tawp mai.

Hmanah khan he ram chhan nan hian kan nunna te, thisen tam tak, kan in leh lo te, a chan theih ang ang chu chanin, ram tan ke kan lo pen tawh.

Vai sipaiin kan hmeichhiate an nawm an makah hmangin, chhantu nei lova kan hmeichhiate mangang au thawm kha, ṭhangtarte bengah pawh hian a ri a la ring khawp asin. Khatih laia chhantu val rualte vuaka an awm a, an tha chakna hmang thei lova phuar beha an awm a, tan in rip tak chhunga nghaisaka an awmnate kha, thawnthu ang maia hun rei pawh a la ni lo. Khatih laia tuartute khan min la dampui a, an titi chu ṭhangtharte hriat phakin a la ri chhuak thei a, anmahni ngei pawh zahna chibai bukna kut hum lum theihin an la awm asin.

Keini chuan kan chakna Pathian kan au va, kan hnam sipaite leh Reng khawpui val rualte ngei pawh khan, kan duh ngai loh inkahna a thlen meuh kha chuan, chung Pathian hnenah engkim thlenin, "He ram chhan nan hian min ti chak ang che" tiin. An au thawm khan kan Van Pathian beng a thleng ngeiin kan ring a ni.

Ram chhan nan chuan kan tuar ang: He hnam hian India rama mi dang tuar ve loh, tuarna rapthlak a lo paltlang tawh. Hausaa awm dan kan thiam rualin, tuara awm dan pawh kan thiam lutuk. Sem sem dam dam, eibil thi thi ti ṭhin hnam kan ni a, min hrek rei ta deuh a nih pawhin, a neiin nei lote kan lo pe chhuak ve mai ang. Kan neih loh tawpah pawh, "Mi ṭanpuina tur chu, Lalpa, lei leh van siamtu hnena mi a lo thleng ang" tih ringtu hnam kan ni asin. Keini chu buhfai uih leh ram bahra khur laih tur a awm phawt chuan tia inhnangfak thei hnam kan ni e.

Keini chu hlawhchhuah tur sum uma ram chhan kan ni ve lo. 'Hei te hi kan ram neih chhun' tia kan aupui kan ram tan hian, kan thisen fartir kan ui lo, a far kang thleng raka tuar huam kan ni tlat. Huam satliah mai ni lova tuar tawh zawk kan ni a, hnam huaisen tia inchhal, hring ei hman ti ngata an sawi kha kan ni asin.