Thingtlang mipui te harh a hun ta!

Mizorama Legislative Assembly bial (constituency) 40 lai awmah hian Aizawl khawpui chhungah bial 11 a awm a, a bak zawng chu Aizawl khawpui pawn vek a ni. Chumi awmzia chu Thingtlang khuate’n Mizoram sorkar hi kan siam a ni a, amaherawhchu min bialtute (kan MLA te) hi a tam zawk chu Aizawl khaw pa, intlan (election) dawn hnai a kan mikhual, inthlan zawha min hre ṭha duh lotute kha an ni.

Kan khaw mamawh aia an huan kawng siam ṭhat duh zawk te, kan khua aia an veng (Aizawla an veng) chhung mawmawh hretute leh veitute, kan thlai thar rate ṭha taka kan hralhna tur ngaihtuah aia car man to tak tak lei dan tur ngaihtuah ngar ngar duh zawktute an ni.

Heng te avang hian Aizawl leh thingtlang khua chu changkanna leh hmasawnna lamah rin phak bakin kan kar a zau a, retheihna in in chhung lumah ro a rel avangin, thingtlang mipui te tan inthlan (election) dawna sum sem thei leh sum sem policy nei party apiang kan bawh lo thei lo a ni. Heng kan retheihna bul chu kan chhungkaw (thingtlang) mamawh leh, eizawnna kawnga kan harsatna te, min hriatpui a, min hmuhpui a, min chenpuitu ni lo, kan mikhual pa kha, kan chhungkaw ro min relsaktu atan kan thlan ṭhin vang a ni.

Thingtlang mipui te entawn tur Lunglei mipui
Lunglei mipui te hi fak loh theih loh an ni. An khaw pa, an ṭhenawm pa, an chhungkaw ei bar zawn dan pawh hretu, an kohhrana Pathian ram pe ngei, thlasik nilum an ai pui paha an veng chung mamawh an titi pui ṭhin ngei mai kha, an MLA (Pu Lalthanliana, Pu Joseph Lalhimpuia, Pu S.Laldingliana) atan an han thlang riap mai hi an fingin an entawn tlak a, an khua an hmangaihzia, thua an sawi ṭhin chu, tisaah an chantir ngam ta a ni.

Mahni veng/ khaw pa ngei mai MLA han nei ta chu hmuh theihin hma an sawn a tih loh theih awm lo ve. Lunglei hian a khua ang mai ni lovin, mimal leh kohhran ang zawng pawn nasa takin hma an sawn zel dawn niin a lang.

Mikhual pa kan siam hausa, a zarah kan reithei!
Thingtlang mipui te’n MLA atana kan bial chhung mi leh sa ni lo, mikual pa kan thlan tlin chiah hian kan khua a sum lut tur te, thingtlang pa in contract hna kan thawh ve tur tam takte kha, kan mikhual pa, MLA atana kan thlan tlin tak khan an veng/ khuaa a chhungte, a ṭhenrual ṭha te, a ṭhenawm khawveng te

ṭhahnem tak a pe a, kan zarah an hausa ta thur thur a. Keini thingtlang ho, a thlangtlintute chuan a bangnawi kha phun nawi ngam si lovin, mi pahnih pathum inkawpin kan thawk ve ta a, kan siam len kan MLA khan keini a thlangtlintute aiin a awmna khua/ veng mipuite a ngaihtuah zawk avangin tlang hri leng ang maiin retheihna chu thingtlang chhung tinin kan vei ta a, chu retheihna chu chhung tin tan cancer natna ang maia tihdam harsa leh manganna thlentu a lo ni ta ṭhin a ni.

Kan biala mi ngei,
kan khua a mi ngei...

Thingtlang mipui te kan harh a hun. Khawpui pa rawng hi bawl reng turin Khuanu hian min ruat bik miah lo. Mahni ke a din kan zir a, MLA-ah kan intodelh a hun ta e. Kan khaw pa, kan bial chhung mi leh sa ngei, kan khaw mamawh leh kan khaw harsatnate tuara hre vektu, kan khaw tui tlan vetu ngei mai kha kan hruaitu (MLA) atan kan thlan a hun.

Kan khaw chhung mamawh hrilh chawp reng ngai, tlawn lungawi chawp ngai hruaitu (bialtu MLA) kan neih chhung chuan hmasawnna (development) hian kan khua a thleng phak tak tak ngai dawn lo tih kan hriat a hun ve ta e.

Thingtlang politician-te harh ru!
Thingtlang lama kan politician te, lehkhachaih ang maia Congress Bhavan lam leh Hnam Run (MNF Headquarters) lamin min chaih kual mai mai ṭhin hi kan tih tawp a hun viau. Keini Thingtlang tel lo chuan Bhavan emaw Hnam Run hian sorkarna a siam dawn lo a, a siam thei hek lo tih kan hriat a hun ta. Bhavan leh Hnam Run in lehkhachaih ang maia min chaih hi a nih dan tur pawh a ni lo.

Thingthlang politician te hi Bhavan leh Hnam Run chaihtu tur zawk chu kan ni, kan tel lovin an kal thei lo a, kan tel lovin engmah an ni lo.

Kan party MLA candidate chu kan khaw pa ngei hi a ni tur a ni, kan bial chhung mi leh sa ngei hi a ni tur a ni. Kan khaw kohhrana Pathian ram pe ve ngei mai hi a ni tur a ni(h), kan tih ngam a hun ta. Kan party aiin kan khua hi kan dah hmasak a, bialtu MLA atan kan khaw pa ngei mai hi kan vote a hun e.

Thingtlang mipui te, hawh u i ṭhangharh ang u. Tuna hma kan lak loh chuan nakinah chuan kan tlai palh ang tih a hlauhawm. Kan tu leh fa te tan kan khua hi chenna tlakah kan siam a hun ta. Kum heti leh chen hi mikhual in ralkhat aṭangin min enkawl ta a, retheihna chauh a ni min thlen tak ni. Kan khua/ bial ṭheuh siam ṭha turin keimahni ṭheuh kan pawimawh a, kan khaw/ bial enkawl turin mikhual ni lo, kan khaw/ bial mi leh sa ngei kan thlan a hun ta.

Lalnuntluanga