KAWNG LOVA KAL CHU TLAN PAWH A SAWT LO

Kan hripui bawk hi maw le! Kan sorkar, leh damdawi lama thawktu zawng zawngte hian theihtawp takmeuh an chhuah si a, engatinge hri a kiam theih loh? Sorkar department danga thawktute pawhin mahni hma zawn ṭheuhah, thawhna remchang a awm chuan tlanchhe lovin an thawk vek bawk si a, engatinge hri hi a kiam theih loh?

Police leh force danga thawktu zawng zawng pawhin an thawk ṭha a, enga­tinge hri hi a kiam theih loh? Volunteer-a thawk, Task Force lam chi zawng zawng pawhin an thawk ṭha e, mahse engatinge hri a kiam theih loh? Sum leh pai leh bungrua a ṭang thei deuhte pawh an tlanchhe lo, an thawh nasa awk awk hle mai. Sum leh pai lam ni kher lo pawh, duty-te thingpui lo lumsak leh an hnawmhnawk lo thensak thlenga thawkte pawh an awm. Ṭan chu kan ṭang rual angreng hle alawm maw le! Kan kalkawng zawh hi chu dik awm tak chu a ni si!

Ram dang leh state dangah pawh hetiang baka tangtlang hi an awm bikin ka ring lo. Mizo mipui aia thuawih an awm pawh ka ring bik lo. Lockdown an ti emaw, inkhuahkhirh an ti emaw, kan ram aia rei a awm vak bik lo vang. State dangten an ṭhatpui ang zawng zawng hi kan ti ve vek a, anni aia nasa mah pawhin; mahse kan ṭhatpui ve thei lo niin alang. Engatinge? Pathian zawng zawngte Pathian ringtu ram kan ni a. Kan awmdan, kan ṭawngkam leh rilru thlenga min hre vektu kan nei a. Kan chunga a thikthu chhiat ang hian state dang chungah chuan a thikthu a chhe ve lo vang. Kan kawng zawhah hian tlan chu kan tlan nasa khawp mai. Tlan vak pawh a sawt lo khawp, kawng lova tlan phei chu bo thui lehzualna a ni. Daiṭhelh emaw tih hmaih emaw kan nei zawk em ni?

Hmanah khan Kohhran hruaitute leh mipui chuan ram pum huapa Pathian hnena ṭawngṭai rual kan duh tawh a. Bul kha lo ṭan fuhin Pathian au ta ila chuan kawng dik min zawhtir ka ring khawp mai. Tunah hian ram pum ṭawngṭai urhsun kan nei dawn a. Ka mimal duh dan chuan hei pawh hi ram hruaitute aṭanga rawn irhchhuak ni se a ropui lehzual turah ka ngai. Thuthlung hlui hunah phei chuan an Lalten an bawhchhiat chuan ramin a chhiat phah a, Puithiam thlengin an khawloh phah thei ṭhin a ni.

Technical mi ni lo mah ila, thuthar leh Chanchinbu aṭanga kan hmuh danin kan khawl hman hi sawisel an haw viau si a, ka sawisel lo ve. Khawl rintlak bera an sawi, RTPCR lah chu hman deuh khan ZMC ah a enkawltu an indaih lo va, tlaivar ten an thawk, an ti a. Chu chauh ni lovin district dang aṭanga sample thawn te a result kan hre har lutuk, tih te a awm bawk a. Tunah phei chuan khawl rintlak ber, RTPCR chu Lunglei atan mamawhna a awm lo, te an la ti ta deuh deuh a. A bial miten mamawh tiin High Court hial an thleng tawh a ni si a. Kan chhuanlam hi kawng dik a ni lo a niang.

Hripui do hi pawl pakhat do hneh chi a ni lo, ṭangruala zavaia thawh chi a ni. Tunah chuan ṭanrual a hnekin indo nan kan hmang zawk niin a lang ta.

Hri vei zawn chhuah nan RAT hi an hmang tam ber a ni awm e, a awlsam bawk lahtak a. Mahse hri vei reng si hi hmuh theih loh a nei thei tlat mai a, chu tak chu a pawiin hri hluarna pawh niin a lang. Heihi a chianna chu May thla lama Siaha district lama an test khan hri vei reng si, vei lo hmuhin a hmu a, hri vei lo lenin an leng a, an hriat chhuah hnu chuan a ṭaidarh hman viau si a. Chutiang bawkin TNT ah pawh an rin dan kha a dik hmel a ni.

RAT khawlin an test zel a, a lo hmu thelh tlat si a, an camp-ah an awm bit bawk si a, nasa takin a pung ta hluai mai niin a lang. Chu chauh pawh a la ni lo, Assam leh Bengal a Assembly inthlana kan IR Police duty te pawh hri kai reng si hri kai lo chhuahin an chhuah zung zung a hei hi a chhan pakhat chu a ni thei ang. Heng lo pawh hi sawi tur tam tak a awm thei ang.

Kan thiltih thatte puanzar lamah chuan kan chak khawp mai, tih tur pawh a ni e. Vaccine la ṭha ber pawl paruk zingah kan tel kan ti a. Vaccine hi lak zung zung tur pawh a ni. Hri vei kiam theih loh chhanah mahniin mawh la ngam si lovin, chhuanlam tur kan zawng a, mipui fimkhur loh vang, kan ti a. Aizawlah raltlan awm mang si lovin a hri vei bukna ber chu kan ni lawi a.

Kan ṭawng kan thlahdah hma ludeuh hi tlan pawh sawt lova kawng kan zawh ṭhelhna bul chu niin ka hria. Nikuma hri kai kan tlem lai tak khan “Hri chu kan dang chat ta” tih te a awm a. Hnehna hlado kan chham hma lu deuh a ang, ka lo hlauthawng reng a. Central mithiamte chhut danin ni 1.1.2021-a Mizorama Covid-19 vei chu mi 6437 ni turin an chhut an ti a; chutih laia vei zat chu 4216 kan awm mek a. Heta kan lawm thu kan sawina lamah kan chakna ni hiala kan sawite kha chung lam duh loh zawng tak a ni palh ang a. Hotute lawm zawng sawi kan tumna luatah, kan hotute Pathian tih vangah kan chhal mai em ni kha?

Ngaihdam dil ngai khawpin Assembly House-ah pawh ṭawng kan fimkhur zo lo a ni a. Ṭawngkam duhtui lo tihah chuan midang ṭawngkam kan ṭawmpui duh si lo. “Mass detection drive” tih te, “Test runpui” neih a ṭha tih thu an sawi a, chung ṭawngkam te pawh chu kan tawm hreh emaw ni? Kan rilru hi a ropui lo lutuk, a ṭha hi chu zawm mai ila, a ropui zawk tur. Random test neih chuan kan hmu hnem lutuk ang a, a dahna tur hospital kan nei daih loh kan hlau leh bawk si.

Kan thupui ang khian, “Kawng lova kal chu tlan pawh a sawt lo’ tih ang khian, Pathian ringtu kan ni a, kan kawng zawh tur tak hi zawh ila a tha ang. Tunah hi chuan kan dai pelh deuhin ka hria. Thufingte 18: 21 ah "Lei (tongue) thiltihtheihnaah chuan thihna leh nunna a awm a. A ngainatute chuan chumia rah chu an ei ang” a ti a. Kan ṭawngka, kan lei (tongue) fimkhur lo tak rah hi kan ei em ni.

TF 21:23 “Tupawh a ka leh lei veng ṭha chuan manganna lakah a nun a veng ṭha a ni” a ti bawk. Kan bawhchhiatna te hi inngaidam tawn ila, kan thinlung thlerin Lalpa hmaah kun ila. Tichuan kan kawng zawh hi a fuhin tlan pawh a sawt thei mai ang.

V.L. Hruaia, Tuikual South