COVID ENKAWL DAN THAR HI THLAK LEH A CHI LOH MAW
Roreltu tan rorel thiam pawh a har ang, a ṭha ber tur nia kan hriat kan kalpui reng chu a nia. Mahse ka tawn tawhte thlir vang vangin, kawng tha zawk awm tlata hriatna ka nei a, hotuten lo ngaihtuah nawn ve leh teh u.
Enkawl dan tharah chuan, positive ni si, natna nei lo, ni 7 aṭanga ni 10 thleng natna an neih loh chuan, test nawn ngai lova chhuahtir tur a ni ta. Hei hi thil hlauhawm tak a ni thei tlat.
TEST-NA KHAWL HI: Mi thiam kan ni ve lo na a, covid test-na khawl hi, 100% dik thlap a ni lo tih chu mithiamho pawhin an sawi ṭhin. Rapid test mawlh mai hi, hmanah khan kan pu Modi pawhin hmang uar lo turin min chah tawh a, mithiamte thurawn a dawn a ni ngei ang. Kan mi thiamte lah chuan, a rintlak thu an sawi kur nguai bawk si a, keini lo thlir ve dan chuan, Rapid test +ve natna nei lo, enkawlna an dawn hnu pawha na zui chuang lova lo chhuak leh mai hi an tam riau mai a, hei hian a dik tawk lo a ni awm mang e ka'n lo ti ve a ni.
Enkawl dan tharah, ni 7 aṭanga ni 10 thleng natna a lanchhuah loh chuan test tawh kher lova chhuahtir rawtna a lo awm ta pawh hi, kan test-na hi kan rin tawk chiah lohna aṭanga, ngaihdan thar lo awm a ni thei ang em?
TEST RESULT-IN MIN TIH BUAIZIA HI: Test result +ve pakhat a awmin, a nghawng thui dan chu kan hre tlang vek, a chenpui mai ni lo, a contact zawng zawng chhui vek a ngai a, mi pakhat +ve enkawlna ringawt pawh hautak tak a ni. A contact zawng zawng kan test leh vek a, chung mite zinga 2/1 an lo positive ve leh a, chung mite contact zawng zawng chu kan test leh nghal char char a, kan pung tual tual mai ni berin a lang.
Test +ve result dik lo a lo awm ṭhin a nih phei chuan, a nghawng buaizia hi nasa tak a ni. Kan enkawlna lamah false +ve pawh lo awm se, an inhnawih pher thei zawk a. Hospital lama enkawltute pawhin, natna nei lova lo lut, an luh hnua natna nei ta an tam thu, News lamah kan lo hria a. Hetiangte a nih chuan, inhnawih pherh vanga kai ta zawk an ni thei ve bawk.
KAN RAWTNA CHU: Test +ve result nei, natna lang chhuak lova ni 7 aṭanga ni 10 thleng enkawl tawh chu, test leh kher lova chhuahtir chu, hrik kai awm khawmna hmuna kan dahkhawmte an nih avangin, an chhuah dawn hnaiah khan an lo kai palh thei zawk a, in lamah an na zui mai ang tihte a hlauhawm a. Hei aia ṭha nia lang chu, +ve contact zawng zawng hi, anmahni in lamah ṭha takin inkhung se la, test zung zung tawh lovin, ni 7 aṭanga ni 10 chhunga natna a lo lang chhuak ta a nih chauhvin test ṭhin ila, natna lang chhuak lo phei chu, ni 7 dang inkhung hrang leh se, chutih hun pawh a, natna a lanchhuah loh chuan, test ngai lovah ngai zawk ila, a him zawkin a rinawm.
Test-na khawl ber hi 100% rintlak chu ni se, a tam thei ang ber test pawh a ṭha. 100% result dik vek a nih loh vang tak hian, test-na hi hman thiam a ngai a ni. False -ve result a hlauhawm ang bawkin, false +ve result pawh hian nunphung a tibuai tho si. Inhnawih pherh lo thei ang bera invengin, in lama inkhung that hi uar zawk ila, kan himna kawng a inhawng zau zawk lo'ng maw?
Lalrinliana Colney