Electric bill pek chungchang

Tun hma leh tun hun
Thla a lo thar a, P&E Department lam aṭangin a thawktute in tinah rawn kalin electric bill an rawn siam a, ‘due date’ a awm avangin a rang lama pek a lo ngai a. A bill-a chu eng zat pawh ni se, kan hman zat azira teh a nih avangin a rethei ber ber tan pawh, electric connection kan duh ve a nih si chuan, a na lem lo va, lo inring lawk kan nih avangin buaina a awm vak lem lo. Amaherawhchu, thil buaithlak tak, huphurhawm tak a awm a, chu chu a bill pek hna hi a ni.

Tuna mipui nawlpuiin kan pek dan chu, a bill lo thlen aṭanga kan hman remchan hmasak bera bill pe tura electric department office pan hi a ni. Bill pekna counter-ah mi tam tak an intlar ni tin a, rei fe intlar hnuah pawh vawiina pek hman dawn loh avangin beidawnga haw an awm ṭeuh zel a. Tun hnaia bill pekna counter bula ka han kal pawhin pa pakhat hi hlim deuhvin a rawn chhuak a, a hmelhriat pakhat hnena a sawi dan chuan a ni thumnaah a pe ve thei ṭawk a lo ni a, han hlim lo chi ziazang a lo ni lo.

Kawng awlsam a inhawng ta!
Hetia bill pea ni leng lenga mipui han intlar nghuk reng mai hi tunlai khawvel atan chuan a changkang tawh lo em em mai a; thla tinin hna tam tak kan ṭhulh a ngai a, a petu mipuite tluk zetin counter nghaktute tan pawh a ninawm na rawh. Kawng awlsam zawk a awm ta.

India sawrkar hian nasa takin e-governance a buaipui a. Chuvangin, nikum lama Mizorama P&E Department lamin an la tih fel hman loh, ‘online payment’ chu kumin aṭang chuan a lo theih ve ta. Tun hnaiah mai khan kei pawh bill pe turin ni hnih ngawt ka han kal hlawhchham pek a; a ni thum ni-ah erawh chuan office chhungah ‘online payment’ a theih dawn hnai tawh em tih ka zu zawt a, mi lo chhangtu chuan a theih tawh thu leh pawn bangah ‘internet link’ pawh an tar thu min hrilh a. Pawn banga an ‘link’ tar chu ka va en a, ‘www.powerbilling.mizoram.gov.i...’ tih hi a lo inziak kalh a.

Chu veleh ka hmaa mi khati zat intlarte chu awt duh hauh lovin ka haw a. In ka thlen veleh an link tar lan chu mobile phone-ah ka han luhchilh a. Mahse, a link an tar chu an lo ti dik famkim tawk lo va, ‘www.’ aiah ‘https://’ tih zawk tur a lo ni a. Tichuan, ka lut ta zel a, kar lovah mahni in lum aṭangin electric bill chu ka pe fel ta mai a, ka lawm em em a ni.

Kawng awlsam hi zawh ve teh le
Hetia zau taka kawng awlsam em ema inhawn reng lai hian thil dang tih ṭhulh ṭhakin mipui tam tak zingah i la intlar reng peih dawn em ni? A atthlak mah mah tawh a nia! Ka sawi tur hi lo chhinchhiah la, awlsam tein bill chu lo pe ve rawh le.

A hmasa berah chuan, computer emaw, smart phone emaw hmangin bill chu i pe thei a, chutih rualin ‘internet connection’ erawh i neih a ngai. Mobile phone aṭanga pek mai pawh hi a awlsam a, chu chu keia pek dan pawh a ni a. Tun ṭumah hian phone aṭanga pek dan kan sawi ang a, computer aṭanga pe duh tan pawh a kalhmang chu a inang deuh reng.

Aw le, mobile data (internet connection) i han ‘on’ hmasa phawt ang a. Chutah, internet browser-a ‘address bar’-ah emaw, ‘search’ button-ah emaw chuan https://powerbilling.mizoram.g... tih chu han chhu phawt mai teh le. Tichuan, direct-in ‘Pay Bill’ page (phek)-ah i lut fel ta der mai a. Chu phekah chuan ‘Enter Consumer Number’ tih a lo awm ang a, chutah chuan i ‘consumer number’ (i electric bill lehkhaa inziak kha) i chhu lut ang. Chumi page-ah tho chuan, a hnuai chiahah ‘I’m not a robot (Captcha)’ tih, nangmah (mihring) ngeiin internet chu i hmang mek a ni hriat hran nana fimkhur thil atana an dah chu i han hmet a. Chutah chuan milem thlan chhuah tur a lo awm dawn a, a thu azirin chung milem tam tak zinga ṭhenkhat chu i thlang chhuak ang.

Entir nan, ‘Select all squares with bridges. If there are none, click skip’ tih ang chi te a lo awm a. Lei (bridge) thlalak lanna chin zawng chu kan han thlang chhuak nghauh nghauh a, chutah a hnuaia ‘Verify/ Submit’ button chu kan han hmet a, phek dangah kan kal thei ta. Amaherawhchu, a chang chuan vawi hnih thum lai te thlan nawn a ngai a, a chi hran hran an rawn dah ṭhin a ni.

Chumi kal tlang hnuin phek hrang kan kai ta a. ‘Contact details’ huangah chuan email ID chhut luhna tur (enter email id) leh mobile number chhut luhna tur (enter mobile number) a lo lang ang a, chung chu i tih fel zawhin a hnuaia ‘Proceed’ tih chu i hmet leh ang.

Chutah, phek dangah bill details a lo lang leh ta a; customer name te, customer code te, bill date te, bill due date te, bill amount te a lo lang thla thliai thliai ang a. Chumi hnuaiah chuan, ‘Captcha’ phek hnuai lama kan hmuh tawh tho, ‘Convenience Fee for Online Payment’ tih chu a lo lang a. Chutah chuan online payment kan tih man chu, a ‘transaction system’ azirin a fee zat hrang hrang tar lan a ni a, a to lem lo viau. Chumi hnuai lehah chuan online payment atana fee chawi dan tur chu kan pawm a ni tih nemngheh a ngai a, ‘I agree to the terms & conditions, Privacy Policy and Refund Policy’ tih chu kan han tick leh zeuh ang a, a hnuai chiaha ‘Pay’ tih button kan hmeh leh hnuin phek dang a rawn lang leh ang.

Tunah chuan pawisa ti fel tura a pek dan tur kawng hrang hrang a lo lang ta a - Credit Card te, Debit Card te, Debit Card + ATM PIN te, Internet Banking te, Wallet/ Cash Cards te a lo intlar thla zai zai a. Chung zingah chuan Debit Card hi a awlsam viau a; a chhan chu, tunlaiah chuan ATM Card kan nei fer fur tawh a, chung chu debit card-ah a hman theih nghal a ni. State Bank of India ATM Card-ah chuan ‘Debit Card’ tih a inziak tlangpui. Hemi hmanga pawisa kan pe fel dawn a nih chuan a card number te, expiration date te, CVV/CVC te, card holder name te chhut luhna tur a awm leh a; chung information chu ATM Card-ah hian a inziak vek a ni. CVV taka hi a hriat loh theih deuh maithei a, ‘card verification value’ tihna a ni a, card hnung lama number digit sarih lo langte zinga a tawp lam digit thum, hmun hran deuhva va awm kha CVV chu a ni.

Tin, ‘internet banking’ hi a awlsam viau bawk. Hemi atan hian a hranpaa branch-ah internet banking account siamtir a ngai ve a ni. Hemi hmanga bill i pe dawn a nih chuan i bank hming te, i user name leh password te i chhut luh fel hnuah SMS i dawng ang a, ‘one time password’ (OTP) an rawn thawn che ang a, chumi nambar chu chhut luh a ngai bawk.

Khitiang khi a kal hmang tlangpui chu a ni mai a. He online payment tih theihna tur hian P&E Department chuan hma a la a, a ‘portal’ siam (develop)-tu tak tak hi chu Mizoram State e-Governance Society (MseGS) a ni thung. I bill chu pek fel a nih tawh chuan a hnuah pe leh dawn pawh ni la, ‘Already Paid’ (Pe Tawh) tih a lo lang mai a, a pek nawn theih tawh loh.

Chuvangin, hetianga awlsam tea electric bill a lo pek theih takah chuan mipui lam pawhin kan intihhmuh a hun a; hun tam tak senga intlar buai lem lovin rei lo te chhungin a fee pek man sum tlem te sengin mahni in lum aṭangin bill pek ṭheuh i tum ang u. Nangman i thiam lo a nih pawhin i fate emaw, i tute emaw, i ṭhenawmte emaw, i ṭhen leh rualte emaw paw’n an tihsak thei em em ang che. Chutianga lo buaipuisaktu che chu pawisa tlem azawng pawh pe la, intlar nana i hun leh tha sen nen chuan khaikhin tham pawh a ni kher lo vang.

Nununa Renthlei