Rawngbawl leh ngaihna chuang reng kan hre tawh lo!
Pathian zawn chhuah ramah hian Pathian rawng han bawl leh ngaihna reng kan hre tawh lo. Kohhran bera pawh budget milin a kal a, FOD lahin budget tlin tura thawhchhuah bak kan thiam tawh bawk hek lo.
Kan ngam chuan i han inbihchiang teh ang u. Ṭhalaite kan thawm a nâ ber bawk a, ṭhalaite aṭang hian kan dinhmun i han en teh reng ang u hmiang. Kum tirah budget kan han siam a, chumi tuak chuan kan buai kumtluan ta ringawt mai a ni.
Thlarau bote man turin budget siam kan ngam hlawl lova. Engvangelical Cell kan din pawhin mi kutah kan dah hmiah a, mahni tih turah kan ngai hauh lo. Kumtluana kan tih zawng chu, hla zir leh sum thawh chhuah dan ngaihtuaha kawmiti a ni ta ringawt mai a nih hi!
Kohhran pui hnatlang chu mi tih turah kan dah a. FOD hnatlangah erawh loh theih lohna avangin kan tel a ni ta chauh a. Thlarau bo veina nei pha khawpa Thlarau Thianghlim pawlna dawng pawh kan awm hlei thei meuh lo. Nimahsela, a kum tluanin kan buai êm êm lawi si!
Kum khat chhûngin project lian tham pakhat kan nei ngam ṭawk a. Kum a lo thar a, budget hlui aia sang deuhin budget kan siam leh a. Chu mi tlin tur chuan kan thawk kumtluan leh ringawt kum tin ta mai a nih hi!
Chu mi zat thlarau bo kan man, chu mi zat mi hlate kan ko haw ti ngam FOD pakhatmah he Zoram kohhran hrang hrangah hian kan awm lo! Prawkrem tihhlawhtlin bak kan ngam hlawl lo! Tihtur hriat loh luatah Pathian faka inelin thiam ber nihna kan inchuh ta vel mai mai a ni.
Kohhran pawhin khawmpui buatsaih leh ilo vel bak tih tum a nei ta lo. Kan member hlate team hmanga koh haw tumin kum khatah camp kan buatsaih a. Chu pawh kan la ṭawiawm ṭha peih lo zui! Nuamsa takin Pathian rawngbawl kan ni ta fur mai a ni.
Kan thiam ber chu hla zir, sum thawhchhuah leh hnatlan a ni kum tin ta vek ringawt mai a ni! Kan hla sak avanga piangthar an awm kan hre ngai lova. Kan sum thawh chhuah avanga thlarau bo man sawi tur nei pawh kan awm ta mang lo.
Buai taka rawngbawl siin kan rawngbawlna hian thlarau bo reng a man thei lo a lo ni e.
Lalremliana Pachuau