KOHHRAN A NGAWI EM NI ?

Tunhnaiah Mizoram chhungah thil duhawm lo tak mai a thleng a. Rawng taka mi nunna lakin a awm a, hemi chungchangah hian mi ṭhenkhatin kohhran a ngawi tlat hi an dem ta deuh emaw ni. Mi ṭhenkhat chuan hetiang thilahte kohhran inrawlhna chi em ni dawn le ti tawkte pawh an awm mai thei e. Amaherawhchu, heti hian ka ngaihtuah a, kohhran hi a duhnaah chuan a ṭawng chhuah a, Pastor leh Upate'n inthlan chungchangah te, ram rorelna chungchangte an sawi ve tur a ni dawn em ni tih a nih laiin, ram rorelna hi kohhran mipuite rinna khawih a ni a, kan member-te nun khawi thil hi chu kan sawi ve a thiang tih changchawi deuhin hetiang thil hi an sawi ve ṭhin. Chuti a nih chuan, tunah pawh hian a member te, an enkawlte ngeiin pawi an khawih a, an enkawlte ngeiin an tuar a, mahse kohhran ngawi leh tlat tur em ni dawn le? Duh china inrawlh a, duh china ngawih leh tlat hi kohhran tihtur em ni dawn le? tih ngaihdante pawh a awm thei a ni. Chuvangin kohhran hian tihtur leh inrawlhna chin a thliar fel fo hi a ṭul hle awm e.

A nih leh kohhran chu eng chinah nge inrawlh tura kan beisei a, eng chin nge a sawi ang le? Mi tam tak chuan kohhran hian sual a haw tawk lo hian an hre fo ṭhin. Sual do kawngah kohhran hi a ngawi thei riaute hian an hre ṭhin. Bible chuan sual huat hi Pathian tihna a ni e a ti a. He khawvela kan awm lai hian kan tihtur pawimawh tak chu Pathian tih a ni. Thil dangin Pathian hi tih kan tum ṭhin a, kan duh dana Pathian lo tih kan tum fo ṭhin. Mahse, Bible chuan sual huat hi Pathian tihna a tih avangin Bible sawi ang hian Pathian kan ṭih reng em tihte hi kan inen let a hun viau a ni. Tunah pawh hian Mizorama kan mu tan ber eirukna chungchangah pawh hian kohhran hi a ngawi tlat ti tawkte an awm ṭhin. A dikna chen a awm em? Chuti ni se kohhran hian sual a haw tawk lo tihna em ni? Eirukna kan hua a nih chuan eiruk pawisa pawh hi kan it lo ngam tur a ni lawm ni? Mahse, thawhlawma sum thianghlim lo thawh chungchangah hian kohhran hi a ṭawng tam tawk lo viau em ni le ?

Mi tam takin kohhran an demna chu thawhlawmah hian a ni a. Thawhlawmah pawh hian sum thianghlim tawk lo chungchang hian sawi a hlawh fo ṭhin. An demnaah chuan eiru leh sum thianghlim lo thawhlawm pawh an duh tho tih a ni. Mi an sum lakluhna kan hriat aia nei nung zawk, hausa zawkte hi an eiruk loh pawh in an lakluh dan a dik tawk loh a nih chu kan ring ṭhin. Mahse, kohhran chuan chung ang te sum chu an thawhlawmah kan hnawl ngam lo an ti ṭhin. Mimal anga a thianghlim vak kan rin loh hi a finfiahna kan nei loh bawk nen, a huho chuan kan pawm leh mai chu a nia. Mi thawhlawm chungchang ve chhui emaw va zawh emaw hi chu a ṭul miah lo nain kohhran hian eirukna hi a haw takzet a nih chuan pulpit tlang aṭangte hian eiruho pawisa hi kan duh lo, Biak inah pawh rawn keng suh u ti ngam a, ti tur a ni dawn lo'm ni? Chutiang sawi ṭhin chu Pastor emaw Upa zingah emaw kan tam lo viau a ni ang e, hetiang lam sermon hi hriat tur a tam lo rih em mai. Khawi maw laiah Speaker lo sawi tawkte chu an awm mahna le, mahse a berampu takte hian kan sawi tawk emaw ni dawn le? Sual hi hua ila, eiruk hi haw tak tak ila kan thawhlawm pawh hian tuar dawn se la kan ngam takzet em le?

Zu zuar thawhlawm an kir leh tihte chu kan hria a, a tak tak ni maw? Zu zuar pawisa chu kan haw viau a, zu zuarte chuan engti kawng pawhin lo thawh ve mah se, a tam dawn lo. Eiru leh sum thianghlim lo nia kan hriat kir ṭhak ṭhak ngam kohhran hi engzat tak awm ang maw le? Zu zuar pawisa ai chuan eiru pawisa hi Pathian lakah chuan a tenawm fe zawk lo maw le. A mimal kan ngaihtuah chuan a dik tawk lovin kan hre vek a, kan kalkhawm a, tumahin kan sawi leh ngam chuang lova, sawi pawh ni ila kan kir kher awm lo ve. A nihna takah chuan eirute eiruk sum avang hian kan thawhlawm pawh hi a thawk na ta vak lo va, kohhran hlutna pawh hi a tlahniam chak reng a ni. Tun ai hian kan thawhlawm hi thianghlim zawk se, tlem deuh mah se kan thawhlawm hian tun ai hian hna a thawk na zawk ngeiin ka ring ṭhin.

Zu zawrh hi kan hua a, mimal ang leh kohhran ang pawhin kan haw ṭhin. Khawtlangin zu zuar an man te, sorkar phalnaa zu zuartu pawh kan phuar a, a nih leh sorkarin eiru tia thiam loh a chantirte hi kohhran hian a phuar ve tawh em le? Zu chauh hi sualah kan ngai a, a nihna takah chuan Bible chuan tangka sum ngainat hi sual tinreng bul a ti asin. Zu in mi ho ai hian kan ramah hian eiru te, thil nih tur ang ni thei lova tichingpentute hi kan ram ṭhanmawhbawkte an ni zawk awm e. Heng hi sual nasa zawk, kan huat tur chu a ni dawn lo em ni? Zu zuarte hian mi nunna an tih tawisak a, buaina leh harsatna an thlen a ni tiin kan sawi ṭhin a, a dikna chen a awm awm e. Mahse, kawng siam tur ang siam loh vangin kawng a chhia a, accident a thlen hian kawng siamtute'n dan anga an siam loh avangin miin an nuna an chan a ni lo em ni? Hengte pawh hi sual kan do ngam tur a ni dawn lo em ni le?

Kohhran hi pawl ropui Pathian aiawha leia ding a ni kan ti ṭhin. Lei leh van hawlhtlang khawih thil buaipui a nih avang hian a thianghlim a, a ropui a ni. Amaherawchu, he pawl hi eng ang pawhin sawi thianghlim teh mah ila a enkawltu leh a chhunga chengte kan thianghlim si loh chuan a ropuina hi kan hloh zel dawn a ni. Kohhran ropuina chu a dintu leh neitu Pathian duhdan anga a kal chiah hian a nihna dik tak a keng thei a, member tam leh thawhlawh thawh tamah hian a ropuina a innghat lo a ni tih hi kan hriat fo a ṭul awm e. Kohhran hian a tihtur dik taka a tih a ngai. Kohhran hi kan beisei huna a ngawih tlat a, kan beisei baka inrawlh chiamte pawh hi thil awm thei a ni. Chuvangin, kohhran hian a tihtur chin a thliar fel a, a inrawlhna tur chi a thliar fel a, sual do tura nasa leh zuala a insan mar hi a hun ta takzet a ni.

L. Vanchiau