Ṭawngkam ṭhain Sial a man

Mi ṭhenkhat chu mi an han biak chang hian, “I va thau ve or i va tar tawh ve!” tih hi an ching. Mi an thau leh thau loh leh an tar leh tar loh hi kan hrilh an ngai lo. Sapho phei khu chu, “I va thau ve,” han ti rawk i la, an lawm lo viau a, inhmuhsitna leh deuhchhawhna-ah an ngai.

An lo dawn sawn dan chu, “I va mawlin insum theihna pawh i nei miah lo a ni maw? I hriselna pawh ngaituah lek lovin i hmuh hmuh i ei huam huam mai a nih hi maw le! Mi â leh koham tak i ni,” tihna tlukah an ngai. I va tar tawh ve, han tihpawh hi an lawm lo takzet. An be leh tawh ngai lo vang che.

Mi kum zat, a bikin nulate inzawh pawh hi an lawm lo. Mi changkangte chuan a ṭul vanga mi kum zat an zawh changte chuan, ‘How old are you? (eng anga upa nge i nih)?’ ti lo in, ‘How young are you? (eng anga naupang nge i nih?)’ an ti zawk ṭhin. An ti a lawm, nula senior deuh tawh hi a kum an zawt a, dawt sawi a duh si lo. Kum 17 leh thla eng emaw zah, a ti ta mai a. Thla engzah maw, an han tih chuan, thla 34 zuk ti daih a!

Ṭawngkam chauh lovah pawh, mi ṭhenkhat chu mi an lo inkawm laiin a pakhat zawk kha, ‘I dam maw?’ tih pahin an han chibai a. Mi’n eng thu nge an lo sawi, tih pawh ngaituah lek lovin an han ṭawng zui ta mai ṭhin a. An lo kawmate tan kha chuan a hrilhhaithlak ṭhin khawp mai.

Mi changkangte chuan mi lo inkawm laia tua-te pawh kha biak an duh chuan an zai ngaiin, la pawh mai loin an la nghak phawt a, an hmanhmawh a nih chuan hawihhawm leh in thlahrung tak chungin, “Mi’n lo hrethiam lawk u la, ka rawn tibuai lawk thei ang che u em?” an ti phawt a, rem an tih chuan an biak duh zawka kha an be chauh ṭhin.

Tin, mi in leh room-a luh dawna kawng­khar kik hmasa lo leh mi khum pindana luh mai mai hi chu kan ching ta lo viau. Thil mawi lo leh zahthlak deuh chu, inkhawm ban dawn, Lalṭawngtai/ Benediction sawilaia a hnuhnung hnung phungin seh, tih ang ziazanga Biakin/ Hall aṭanga chhuah hum hum hi mi tam tak chuan kan la ching. A mawi lo. Minit khat vel chauh la han nghah hram hi chu thil harsa a ni lo. Emergency thilah chuan thuhran.

Naupanlaia zirtir­tuin, “Ṭin tawh ru,” a tih ruala hmanhmawh taka tlan pah a, ‘Kei ka chhuak hmasa ber,’ tihlai hun nen khan an danglam lo.

LalaKhobung