Rev. Lalhmingchhuanga Zongte Sermon hnuhnung ber

“Full time-a rawngbawl tura a inpek hnua Rev. Lalhmingchhuanga Zongte rawngbawlna hmasa ber chu Kohhran Pawl bik inthliarna awm lo non-denominational Kohhran–Pune Mizo Christian Fellowship (PMCF) a ni a. Thuchah a sawina hnuhnung ber pawh non-denominational Kohhran PMCF-ah tho niin he leia a rawngbawlna chu a lo khar fel ta a ni.” Rev. Khiangnunfima Chaplain, Bangalore Mizo Christian Fellowship (BMCF).

Pune leh Rev. Lalhmingchhuanga Zongte
Zofate tan mi hlu kan chan tak Rev. Lalhmingchhuanga Zongte kha Union Biblical Seminary (UBS), Pune ah kum 1996-2000 chhung khan Bachelor of Divinity (BD) a lo zir tawh a. Pune ah hian sulhnu hlu tak tak a hnutchhiaha. Pune Mizo Christian Fellowship (PMCF) Chairman te pawh a lo ni tawh a ni. A ruang an thlah ruala an tlangzarh tak a lehkhabu hnuhnung “Mizo Buanpuite” ah pawh khan “Zakzum – Mizote Min Thukrutu” tiin Pune-a an awmlaia PMCF-a Rev. Dr. G. Isaiah thusawi tura an sawm thute pawh a thai lang tel a ni. Tin a lehkhabu pakhat, “Hmasang Kohhran Chanchin” a ziah pawh Union Biblical Seminary (UBS), Pune-a BD a zirlaia a buatsaih a ni nghe nghe a ni.

Engtin nge a Sermon hnuhnung chu Pune-ah daih a sawi theih?
Hripui leng avangin Pune Mizo Christian Fellowship (PMCF) pawhin Youtube kaltlangin online inkhawm a kalpui ve reng a, chutah chuan Guest Speaker te pawh kan sawm chang a awm ṭhin. PMCF Executive Committee chuan Rev. Lalhmingchhuanga Zongte pawh online inkhawma thusawi tura sawm ve ni se kan ti a. Tichuan kan Secretary te nen inbiain kan sawmna chu a pawm a. Mahse Sermon a record hma hian Covid-19 chuan an chhungkua a tihbuai thu kan hre ta tlat mai. Amaherawh chu Sermon chu a inbuatsaih zawh tawh thu leh recording a la hmabak thu kan Secretary a rawn hriattir a ni. Tichuan Sermon te tha taka a sawi theih nan kan ṭawngṭaipui a, a hnua kan hriat danah phei chuan Sermon a sawi lai pawh hian a lo damlo tawh reng mai a, nachhawkna eiin Sermon a sawi zawhah a mu leh a ni awm e. Sermon sawi tura min tiam tawhna chu tihpuitlin loh a duh loh avangin a rawn sawi hram niin kei phei chuan ka ngai hial a ni. April 25 Pathianni a kan online inkhawmah chuan Rev. Lalhmingchhuanga Zongte Sermon chu a Sermon hnuhnung ber a ni dawn a ni tih pawh hre miah lovin kan ngaithla a ni.

Rev. Lalhmingchhuanga Zongte Sermon hnuhnung ber hi kan ngaihlu em ema, Zofate hmun hrang hranga awmte'n ngaihthla vek thei ila tiin a Sermon khaikhawmna hetiang hian ka han dah a ni.

Thupui: Thinlung
Bible: Sam 51:10, Rom 12:1-2

Thinlung chu Rilru nen a thliar hrang lutuk lova, Sermon-ah ngei pawh hian Thinlung chu Rilru tih nen thuhmun angin a sawi a ni. Zofate'n Rilru thar leh Thinlung thar nei ṭheuh ila a duh thu ṭhahnem ngai takin a sawi a ni.

Rilru dik neih hlutna leh hlawkna

1) Nundan dik min neihtir theitu a ni

2) Nun nuam leh nun hahdama min nuntir theitu a ni

3) Rilru dik chu ṭawngṭaina a ni nghal a ni

Engtin nge rilru dik chu kan neih theih ang?

1) Rilru dik chu duhthlanna hmanga thlan ve ngat a ngai

2) A ṭha zawnga rilru hruai thei lamah kan inhawng tur a ni

3) Pathian hnenah thinlung dik chu dil mawlh mawlh tur a ni

Piangthar nunah hian activity aiin Thinlung a pawimawh a ti a. Infrastructural development nei tur chuan chuan Rilru developed hmasak a pawimawh, rilru sang, rilru changkang neih phawt a ngai a ti bawk. Development chungchangah chuan Rev. Hminga chuan Lei dawh tawrh ai chuan Rilru tih changkan phawt a duh a ni.

Rawtna pakhat a neia Moral-ethical development department siam ni se, chu chu Sawrkarin chak takin hma la se a duh thu a sawi a ni. Value system awmzia a sawi bawk a, value system chu judgment kuangpui a ti a. Kan rilru puthmang dik leh dik lo, ṭha leh ṭha lo, hlu leh hlu lo, mawi leh mawi lo bukna chhungrila kan neih hi a ni a ti a. Khawvel standard hi hmantlak a ni lova, Isua Krista standard hi hman zawk tur a ni tiin a sawi bawk.

Pathian Ram leh Zofate tana hlawk taka thawktu Rev. Lalhmingchhuanga Zongte chu tunah kan zingah awm tawh lo mahse, a thuziak leh a Sermon te hian Zofate te thinlungah hnathawkin thu sawi chhunzawm zel rawh se.

Vanlalthansanga