KUM 2021 MBSE HNUAIA HSLC EXAM RESULT ṬHAT CHHAN

Nikum 2020 ah khan Hripui avanga Lockdown hmain HSLC exam an zo hman hram a, HSSLC phei chu subject ṭhenkhat zo hman lovin Lockdown avangin zo thei lovin kan awm reng a nih kha, April 2020-a sikul lut tur kha hripui avangin sikul luh theih a ni lova, October thlaah rei lo te kalin, kum 2021 Januray ni 22 atangin School a ka la zir tak takna chu neih theih a ni chauh nachungin Board exam hmachhawn a ni a, chuti chung chung chuan vanneihthlak tak maiin HSLC Exam result duhawm tak mai kan nei hi Mizoram pum tan pawh a lawmawm em em a ni. Hetih lai hian mi ṭhenkhatte'n fiamthu leh deusawhna rawngkai deuh lek lekin kumina Board exam-a pass tharte tana hriat nuam lo tur ṭawngkamte an nei hi a pawi em em a, mi ṭhenkhat phei hi chuan mi ṭhenkhat fiamthu hi tak tak emaw lo ti tawk an lo awm ve lehzel nen, nikum 2020 lam zirna kalpui dan leh zirna hun a tlem chung chunga HSLC Result tha tak kan neih theih si chhan leh a behbawmte hi mipuiin kan hriat theih nan ka hriat ang ang han ziahlan ve hi a ṭulin ka hria a, ka theih ang ang ka han tar lang ve ang e.

Kumin 2021 a HSLC exam-te hi nikum 2020 a admission tia zirte an ni a, COVID-19 hripui avangin School luh hunah lut thei lovin rei tak sikul khar a ni a. Rei tak inkharkhip a nih hnuah kum tawp dawn lamah school hawn ni lehin thla hnih vel chang chang sikul hi kal ni lehin, exam neih a ni a, exam an beih lai pawh hian hri kai an tam sawt viau a, mahse exam titawp em lovin Board exam chu zawhpui hram an ni a, exam zawh hnu lawkah Lockdown erawh a kal leh nghal a ni. Mipui zingah chhunglam leh zirna kalpui dan hre lo tan chuan kum pui lingleta zir tur kha zirna hun awm si lovin ‘engtin nge heti taka ṭhaa an pass theih si?’ tiin kan rilruin kan inzawt hlawm niin a lang.

Hetianga Result tha neih anih theihna tur atan hian chhan lian tak tak a awm a, chung chu lo tarlang teh ang:

Nikum a hri avanga school kal theih loh a khar a han nih veleh khan School Education Director, Pu James Lalrinchhana chuan hma la nghal vatin, Zirtirtu, Aizawl khawpui huam chhunga mite eng emaw zat chu subject hrang hranga zirlaite tana Tutorial Video siam turin a hnuaia officer-te a kohkhawmtir nghal thuai a, an ni hian a bikin Class IX zirlai subject hrang hrangte chu a pawimawh zual Cover vekin, Education Media Cell te chuan Tutorial Video siam hna chu chhun leh zan pawh sawi lo tak meuhin an bawhzui nghal char char a, Chhun lamah Video an cover a, a ṭhenin an lo Edit nghal char char bawk a, thawktute an tlem si a, chawlh pawh an nei hman meuh lo a ni ber e. Class IX zirlai bakah Class X zirlai pawh siam belh a ni a, a hma kum 3 kal ta velah khan Director hmasa, Pu Lalthawmmawia, IAS chuan a bik takin Mathematics leh Science subject a zirtirtu nei ṭha lo zirlaite'n an chhawr theih turin Tutorial Video hi a lo siam tirin, chung chu Youtube a upload a lo ni tawh a, hetiang a COVID-19 hripui avanga Class kal mumal theih loh a nih khan hengte hi a lo ṭangkai leh zual ta hle a ni.

Hei mai ni lovin, Director ni mek hian kan media te–DDK, ZONET leh LPS te nen thawh dunna siam pui nghalin, anni hian subject hrang hrangte chu hunbi neiin an chhuah thin a. Chumai ni lovin, TV lama chhuak bakah School Education Department Media cell-te chuan, mi tupawh a mamawhtute'n an en a, an download theih bawk turin Yotube lamah Tutorial Video-te hi an dah vek bawk a. Theihtawp chhuah a ni chungin Class pangngai anga kim taka siam a harsa hle. Amaherawhchu zirtirtu a ṭha leh lar ber berte sawmkhawm an ni bawk a, heng tutorial video te hi naupangte tan en man a awmin, school kal lo mah se la, ni danga an ngaihthlak phak loh tam tak an ngaithlak theihna hun ṭha a nih phah ta a ni.

Mizoram Secondary School Teacher Association (MISSTA) Academic Cell te chuan he hun harsa kan hmachhawnah hian naupang ten School kal tha thei lo mah se la, in lam aṭang tala an zirlaite an lo inzir theih beiseiin an member te zinga zirtirtu hrang hrangte Tutorial Video siam turin an ti a, mahnia in lama lo siam theite chuan MISSTA hnenah an thawn khawm a, a ṭhen edit-sak ngaite edit sakin, mahni a Video cover thei lote a Cover sakin a edit sak bawk a, MISSTA Academic Cell Youtube Channel ah naupang ten an thlir theih turin Upload zel a niin, chung Video te chu MISSTA Group kaltlangin Teacher hrang hrangte hnenah an naupangte lo en tura share turin Social media (Whatsapp etc) hmangin thawn darh zel a ni a, MISSTA ACADEMIC CELL a Tutorial Video siamna tura hmala laite pawh hi Election Duty tur training zinga Positive lo awm avanga an inkaidarh hun laite kha a nih avangin heta hmalatu ho pawh a chang leh an han quarantine leh ren rawn hlawm ṭhin a, chuti chung chung pawha hmalakna avang chuan Tutorial video za tel chu kum danga kan la neih ngai loh kha he hun harsa, COVID-19 hripui leng avang hian kan lo nei thar ta a ni.

Central lamin hri avanga zirna kalpui a harsat avanga syllabus titlem tura an tih angin Mizoram pawhin textbook-a zirlai paih pawi lo deuhte chu paih ṭhenin, zirtur an titlem a, (hemi avanga zir vak loa pass duak phahna chi erawh a ni hauh lo, a ṭhenah phei chuan paih awm hian zirtur ṭhenkhatah a tiharsa mahin a lang a). Naupang tana ṭan loh theih lohin kan Education Minister zahawm tak, Pu Lalchhandama Ralte chuan Board Exam a nih tur thu leh exam pawh hri avanga namnul an tum chuan loh tur thu te, strict taka answer paper pawh en a nih tur thu a lo puang ve leh bawk nen, naupang leh zirtirtute tan chuan tan a na lehzual lo thei lo.

Board exam a hnaih deuh hnuah central lamin sample question siam tura an tih angin MBSE lam pawhin Subject tinah Sample question an siam chhuak ve leh a, hei hian naupangteah zir dan tur kawng hmang a hriattirin inbuatsaih dan a thiamtir a, chutih laiin ṭhenkhat ngaih dan anga sample question-a mi a ngai ngaia Board question hi tih chhuah a ni hauh lo thung.

HSLC exam hi a zirlaite an la naupan bakah, nu leh pa tam berte thlir a ni a, a hautak a, subject a kim em em a, hei vang hian naupang an fail hnem lutuk palh ang a, naupangte kumkhat hnathawh chu engmah loah a chang ang tih hlauin Zirtirtu pawl lian pahnih, MISSTA leh MISA te tang kawp chuan MBSE in sample question a siam bak sample question dang subject tinah set 3 an siam belh leh ta a ni.

Anihna takah chuan High School zirlai chinah hi chuan, zirtirtu Senior leh naupang an question kal ṭhin dante zir ngun peih pangngai tan chuan topic tinah hian a pawimawh, chhuak awm hi a hriat deuh ruak a, rin deuh 4 vel i chhawp chhuah chuan chung zinga mi pakhat tal hi chu, a ang chiah ni lo mah se la, a anpui tal chhuak lo hian a awm thei lo ti pawhin sawi ila a dik awm e. Chutih laiin naupangte tan pawh Subject tina sample 4 ami thiam vek tan chuan pass na khawp hi chu a awm ve hrim hrim a, heti zat zat an zir hi chuan hun pangngaia thiam tura beisei zawng zawng zat ni lo mah se la, pass na khawp hi chu a ni hrim hrim a ni. A bua mi thiam tura tih a, an zir peih loh hi, hetia sample question anga siam a nih hian naupang hi chuan phur deuh hian an zir leh peih phah ang lawi a, mahse kan sawi tawh angin phur taka an zir phahna lai kha a ṭha a, chutih laiin a subject a zirin sample a mi ang diak diak hian a chhuak chuang lo, Mathematics angah phei chuan a ngaia chhuak chi theorem te a awm, chumi ni lo chu hriatthiamna hmanga chawh chhuah tur a ni tho tho mai tih hi mipuiin hriatpui ila.

Kumin 2021 a HSLC Exam-te vanneih lehna em em leh result ṭhat lehna chhan pakhat chu–An zir hun chhung a rei loh avangin naupangte an mangang a, zirtirtu leh nu leh pate pawh an mangang a, hei hian ni danga fate zirna ngaihtuahpui lem lo tam tak pawh an fate an fail a hlauhtir a, chu chuan a lehlamah chuan ṭan a laktir khawp mai a. Govt. School pawh hri avanga hmui tuam ngai a la ni chungin School tam tak chuan hlau chung chungin Study Camp nen tan an la a, hei hian thawktu leh naupang, leh nu leh pate he hun harsa karah pawh Board exam hmachhawn tura an beih nasatzia a tilang a.

A tak takah chuan Kumin 2021 a exam te tluka Mizoram Sikul naupangte zingah in lam aṭanga Tutorial en tur neih ṭhat ṭum hi tunhmain a la awm ngai lo ti ila kan sawi sual awm lo e. Hun harsa leh khirhin min nan avangin remchang nasa takin kan neih phah a, hei hian nasa takin Exam turte a pui a, tin, zirlaite'n Social media pawh zirna atana kan hman ṭangkai nasat ṭanna kum tak a ni hial awm e.

School kal theih loh mah se, Zirtirtu tam takin mahni in lam aṭangin ZOOM/ Google Meet, etc. hmanga class laa ṭan la an awm a, Whatsapp kaltlanga pdf leh thildang hmanga zirna ṭanpui tur inthawn a tam hle bawk a, hei hian nasa takin Exam turte a pui ngei tih a lang.

Engpawhnise la, Kumin 2021-a HSLC result ṭha tak nei school zawng zawngte ka lawmpui rualin, zirlai naupang pass awm lohna school te ka tawrhpui a. Hetiang hun harsat bik lai pawha Board exam certificate nei thei ngei tura exam buatsaihtute chungah hian, zirlai nu leh pate tan chuan lawmthu sawi mawlh mawlhna chi a ni a. Tin, he exam-a tiṭha, mark sang tak tak hmu, letter leh 100% hmu phate ‘an thiam tak tak lo vang’ tia rin thua lo sawi maite kan awm pawhin lo sawi chhunzawm tawh lo ila. A chhan chu an exam tur kha school kal ṭha rei hman loa exam ni mah se la, in lamah entawn theia exam an ni lo a, kum dang ang thoa exam centre-ah strict taka venna hnuaiah exam a ni a, an thiam avangin mark tam tak an hmu a ni zawk e, thiam lo tan mark a hmuh ṭeuh theih loh, a tak takah chuan letter mark leh 100% hmu chinho ngat kha chu hun pangngaia exam phei chu ni se an tiṭha lehzual ngeiin a rinawm. Chuvangin, hun harsat lai ber pawha bei ṭang ṭang a, zir ṭang ṭang, inthlahdah ve mai mai lo zirtirtu leh zirlai tam tak kan lo nei a ni tih hriat nan kum 2021 HSLC Exam hi Zoram mipuite hian hriat chhuah nan hmangin, puitling zawk, eizawnna danga kal tawhte pawh hian hri avanga Lockdown leh khuahkhirhna hrang hrang kan la hmachhawn mek a nih pawhin awm mawl tawp lo va, kan hun neih ang angte hmang tangkai theuh zawk turin kan insawm e.

KVL Liana