"One act of obedience is better than one hundred sermons" - German Theologian, Dietrich Bonhoeffer
Thuawihna hi sermon za zet ai pawha a ṭhat thu sawitu hi kan pastor khan a ngaisang hle tih a hriat. A thusawiah he German pa hming hi a lam fo a, hriat zui ve châkin ka bih dun dun phah.
Kum 2012, October ni 20 a Prism in 'Eiruk Duhlo Punkhawm' a buatsaih tum khan kan pastor hian inthlahrung taka tel ve a nih thu leh eiruk a duh loh em avanga huai taka tel erawh a nih ve thu a sawi te kha a thihna nghawng avangin tu emaw zarah ka lo hmu ve tlaikhawhnu a! Hemi ṭuma a thusawi tlip nan, a theologian ngaihsan em em khian kha tih laia Juda mi maktaduai 6 chuang Hitler-a hoten an suat laia Kohhran an ngawih reng lai khan a dodaltu tlem te zinga a tel thu a sawi a nih kha! Nazi lamin an khaihlum zui ta reng a. Wikipedia-ah: Cause of death - Execution by hanging a inti kalh nghe nghe!
Hrawk phiar ṭawng ṭawngin kan pastor leh mi tlem tê, ram hmangaihna dik tak avanga au au ṭhinte an kiam hret hret a, ram leh hnam veina em em pawh nei lova dam sen ṭul hi a inthlahrunawm ru ta viau!
Ka hmuh thiam phak ve dân (dik lo se ka ti!) chuan Mizo pa tam tak hi chuan sorkar hna emaw eng eng emaw eizawnna neih a. Nupui fanau te nena mahni in leh lova khawsak a, tuma huatthu em em pawh sawi lo leh, a him china mipui nawlpui che vêl thlir a, puithu zeta inchhung dunga kuthnungsuiha muang fân ruih a vei khauh khauh a. "Kan ram hi a dam lo a ni" tia tukverha dah paha mahni ram chin thlek du du hi kan ram damlo kan vei dan len zawng a nih ka ring!
Kan social media tualzawlah te hian a rethei leh a â a hi kan indem tawn vêl mai mai a. Mi lian, kan chhoh en leh chung en te dik lohna leh, kan chanai ei thau mum tung tung te erawh khin chu sawi loh, an kianga selfie stick vuan pha chin vêla tel ve kan châk leh lawi thung si, huiham. A fing deuha inhria te lahin en liam an thiam em em a. A fing pangai te thu leh hla lah bengkhawn tumna aiin hriam leh zum fê fê in keini mi â ho hian kan hnial luih luih a. Heti ngawt tur hi chu kan ni lo a sin le!
Youtube lama LPS kuthnathawktu huangin viewer a ngah loh zia hi thalaite ngaihsan loh zawng hriat nan a ṭha viau bawk tak ang a. Fb user ṭhalai ngaihtuahna fim chin hmang tam tak te pawh hian, anmahni ngamtlakte nen an huanga nuih dur dur bak loh chu thil dangah an lang ṭha duh mang der lo! Mahse, ram leh hnam vei lo an ni ngawt bik lo. Engnge a chhan ni ber ta ang? Huat leh mal tlat ngam khawpin kan thil veiin min la tur na lo tihna a ni thei mai ang em?
Ngaihzawng ngah ve tawh tak, Taylor Swift te erawh hi chuan ram a vei viau thung a, Donald Trump te kha a ngai thei der lo! A mal bawr vêla kan châm chhungin ani chuan a duh loh mihring chu a thal thak mai hi! Ekhai, a sei ta. Engmah ni bik lo nasa lutuk hian kan pastor hi ka ngaisang em a, a thuchah te hian thinlung a vit ngat ngat a tin ni, ka'n puah vek tak phawng ni!
Political party ṭan lam nei lem lo, ka thianpa pakhat hian FB ah hian ram a vei thu a ziak fo. Nuihtu leh â titu zu han nei ṭeuh a!
"Ram leh hnam vei loh hi Pathian huatzawng tak a ni!" - Rev. Lalhmingchhuanga Zongte
Tpa Bunghai