Budget in tih hi ka bo tawlh tawlh mai!

Miin 'BA ngat' an tih chin pawh hian budget kalphung hi kan hrethiam lova, Mizo zingah hian budget hrethiam hi an tlem hmel si a, kan sum indaih loh kal kual dan vel hi mithiamte hian chanchinbu kal tlangte hian mipui hi min zirtir fing se tichuan budget aṭanga hmeh bel pahin kan Mizoram sorkar sum awm dan chu kan lo zir ve thei ang.

Tunah hi chuan 'pawisa kan indaih lo' tih hi kan hriat zin ber a ni ta a, kan indaih loh dan leh kan mamawhna pawh hi kan hrethiam ve lo a nih hi.

Chhungkaw rorel chu ni se Rs 10,000 la lut ṭhin ni ta ila, ṭum danga hri dona lama kan chhungkuain kan hman ngai loh Rs 3,000 zet mai kan chhungkuain kan hman chhuah a ngaih tak zel avangin Rs 3,000 ka hmanna dangah ka insum a ngai tih hriain ka insum mai ang.

Ṭum dang angin sa kan hmeh thei tawh lo vang a, sa manah Rs 500 ka la ṭhen thei tihna a ni a, thawmhnaw kan lei tlem sawt ang a, thawmhnaw man aṭangin Rs 1,000 kan la leh thei ang; a bakah pawh tlem tlema insumin Rs 1,000 vel chu kan pawt leh thei ang. Kan pawisa neih ṭhin aia Rs 3,000 lai mai hri dona atan hman a ngaih si avangin thil danga insum vangin Rs 2,500 vel chu kan hmu chhuak thei ang a, midangin min do pui ve phei chuan Rs 3,000 pawh pen hi pawh pen lo ang maiin chhungkua ka enkawl thei dawn a ni.

Mizoram sorkar kal dan leh budget hi hrethiam ve lo ta chuan hetiang chhungkaw rorel ang hian kal thei mai se pawisa mamawh dan hi tun anga buai leh lutuk lova kal dan hi chu a awm theih mai rinna kan lo ralkhat neih ve ringawt a ni.

He rawtna kan siam hian kan hriat lohzia mi dang hnenah kan inpuang lek pawh a ni thei, chuti chung chung chuan sorkar insumna tur leh inrenna tur dang hi sawi chhuah ve hrim hrim a ngai a ni.

Sorkarin pawisa a renna tur No. 1 chu 'con­struc­tion work' lamah a ni. Hei hian inkalpawhna kawngpui tuna khawih lova min/ ping mai tur a huam lovang, a bak zawng party worker vulhna chi- side drain siam, retaining wall lung rem, community hall sak, office building tur sak bakah Sports lam thila construction work zawng zawng hi chu titawp nghal vek se, chumi pawisa chu hri dona atan hman phawt ni se.

"Heng pawisate hi a hmanna tur awm saa central aṭanga rawn kal, tih danglam theih loh," tiin min hnial a nih chuan budget hi kan duh chuan kan kang ang, kan duh chuan kan bai ang tih sawitu kha hnial hmasa phawt se. Pawisa ren theihna chu sorkar officer POL man sorkara chhun luh tir hmang hian a ni thei a, kum khat chuang office kal mang lo hi officer 50% aia tam an nih hmel a, chuvangin POL man tur kha sorkarah chhung lut se RTPCR khawl leina atan a hman theih ngei ngei ang.

Pathum lehnaah chuan "sem tur" atana pawisa dah ṭhat SEDP lama mi hi tunah hian hri dona atan hman ni se. Lockdown avanga harsatna tawk miharsate hi a pawisa faiin tunah hian sem se, 2023 inthlan dawn boruaka sem lovin tun hi miharsaten pawisa an maawh lai a nih avangin SEDP aṭanga pawisa dah vaibelchhe engemawzat hi hri dona atan hman ni rawh se.

Kan rawtna mawl tak hi a tih hlawhtlin theih loh chuan budget kan hriat loh lutuk vangah min pawm sak mai dawn nia - budget kan theih, bai theih hi min hrilhfiah teh u khai.

K Lalrinpuia, Chaltlang