POET OF THE CENTURY UPA ROKUNGA KHA
Mizo zinga hla phuah thiam ber a thlan Upa Rokunga (Fam) hi ni 20.2.1914 khan Aizawl Venghnuai ah a lo piang a, a pa hming chu Thanghluta niin a nu hming chu Zaliani a ni. Kum 1927 khan Aizawl Sikul pui aṭangin Lower Primary a zo va, kum 1929 khan Middle a pass leh a ni.
Ni 2.1.1934 aṭangin Loch Printing Press tunna Synod Press ni ta ah sawn a thawk ṭan a, he a hna hi a dam chhungin a thawk a ni. Ni 9.4.1935 khan Pastor Chhuahkhama kutah Zamawii chu nupui ah neiin fanau malsawmna pawh an dawng nasa hle a ni.
Kum 1939 khan hla a phuah ṭan a, he a hla phuah hmasa ber hi Krismas hla niin Van hnuai khua vel sak hming chhiar in tih hla Kristian hlabu nambar 112 na a mi kha a ni. Kum 1940 khan Mission Vengah in sawnin kum 1945 ah khan Kohhran Upa ah thlan a ni. Upa Rokunga hla phuah hnuhnung ber chu Sualin bo mah ila tih hla Kristian hlabu nambar 163 na a mi kha niin he hla hi ni 7.5.1969 khan a phuah a ni.
Upa Rokunga khan kum 30 chhung hla 128 phuahin a hla phuah lam ṭhenkhat te hetiang hian han thai lang ila. Kristian hla 55 phuahin he kristian hla ah hian Krismas lam hla te pawh a tel nghal a ni. Khua rel lam hla 22 a phuah leh a, ram leh hnam hla 14 vel a phuah bak ah hla dang chi hrang hrang 37 a phuah bawk a ni.
Upa Rokunga kha a chanchin a kan hriat danin palian lem lo, hmel fel veng vawng zai dam hmel pu tak, a ṭawngkam a nemin a hawh a hawihhawm hle hle a, a rilru leh thinlung erawh chu khauh tak, a tih loh zawng ah chuan hneh mai mai a ni lo thung. Lungleng thei mi tak niin a nazawng a hla phuah mi ni lovin, a thinlung a hla lo kal hun a phuah mai chi niin hla thu har leh un pui pui hmang lovin hriat nuam leh tluangtlam tak, mi ngainat zawng taka hla phuah ṭhin niin mizona leh Kristianna hi amahah rem taka chuktuahin hemi aṭang hian hla a phuah ṭhin vang a ni ang, a hla phuah hian mizoteah sak a hlawh tlat.
Kum 1966 February thla a lo nih chuan damdawi in ah zai ngai in a lo awm ta a, hemi hnu hian Bilkhawthlir khua ah an in suan leh a, thla thum lai an khaw sak hnu in Aizawl ah an kir leh a, a hna ngai Press lam hna chu a thawk chhunzawm leh ta a ni. Ni 9.7.1969 aṭang chuan taksa lam ah in sawiselna nei ṭanin, ni 12.7.1969 lam ah chuan ni khaw hre lovin zual lam a pan ta a, hemi ni zan vek dar 10:15 ah khan Lalpan a nunna hlu tak chu a lo lak sak ta a ni. Tichuan ni 13.7.1969 ah khan a ma in ah thlahna hun neih niin Presbyterian Kohhran Mission Veng Biakin ah ropui tak a vui liam a ni.
Upa Rokunga hla phuah zing ah Ro min rel sak ang che tih hla kha mizoten hnam hla a kan neih mek a, mizo ten a hla ṭha tak tak sak tur kan neih theih nan a hla min lo phuah saktu Upa Rokunga Poet of the Century atan a thlan a ni hi a in hmeh tak zet a ni.
Upa Rokunga kha Zoram khawvelah hian a hming a dai ngai tawh lovang.
George L.Ralte