Rangvamual leh Serchhip

Mi ak ruala ak ve zel tum hi chuan mipui chai hut hut topic ah hian zuang lut ve chat zel ila, Mizoram Chief Minister leh MNF President ni kawp bawkin Serchhip khawpuia Serchhip mipuite hmaa Serchhip mipuiin MNF candidate an thlang tling lo a nih chuan miin â an tih tur thu leh Rangvamual pawhin â an tih tur thu a sawi avanga Serchhip mipuite vuivaina thu chhiar chiah hian, ṭawngkam chheh sual pawi zia a lo langnghal ṭhin.

MNF President hian a rilru chhungril ber ah pawh Serchhip hi hmusit zawnga sawi a tum dawn lo tih chu thil chiang tak a ni chungin tunah hi chuan Serchhip mipui rilru a hel laklawh tawh a, Aizawl khaw daia zu hmunpui leh Serchhip khawpui leh Serchhip bial pumpui han thlun zawm tak mai hi chu vote zawn laia thil sawi fuh loh tak chu a ni ve dawn chiang a ni.

Sawi duh loh sawi takah chuan ZPM hotupa pawh a ṭang ulh a, Serchhip lama by election awm tur hi Pathian pawl leh Setana pawl thil inchuh ang deuvin a sawi chhuak a, a sawi tum chu thil dang daih a nih pawh in tunlai khawvelah chuan kha a thu sawi chin chiah kha rek bung in social media ah video (Assembly House lama an demand voice record aia chiang) an thehdarh tawh si a, ZPM lam chu midang aia ṭhaa inlan tir tur angin an sawi zui bawk a, amah khan 'ka ngaihdan' a tih hlauh avangin party ang ni lovin mimalin a kal thei ta hlauh zawk a ni.

Ṭawng fuh lo leh bawk chu Congress candidate kha a ni bawk a, ani khan Serchhip biala din hi politics a khelh chhan ti zawng khan a sawi a, a hma khan bial dangah a lo in candidate ve tawha ṭawngkam thlum tak tak a lo sawi tawh ngei anga kha kha amah ngeiin Serchhip bial a din hma-a a sawi a nih vangin a chawk chhe leh ta tihna ang a ni a, Serchhip bial ni lova a din hun a la thlen leh phei chuan a buai zo dawn a ni.

Serchhip leh Rangvamual tih kan saw pawlh nawk nawk chhan tak chu inthlan dawna ṭawngkam chheh sual pawi zia sawi na lam a ni e.

Malsawm-dawngliana