INLUNGRUALNA
Hun hian thil tam tak a liampuiin, a rawn thlen bawk ṭhin. Tun hmaa Mizote inlungrual tak ni ṭhin kha kan inlungrual tawh lo a, thilṭha tih pawh phurawm loh rawih khawpin a chhe ber thlengin kan inchirhtheh ta ṭhin a nih hi. Tun hnaia CYMA hmalakna Tax Deducted at Source (TDS) chungchangah te pawh kan inlungrual lohzia a lang. C.YMA hian Mizoten kan hamṭhatna kan ch^n lohna turin hma a la a, nimahsela CYMA hmalakna sawiseltute chu Mizo tho niin YMA member-te tho an ni si.
Mizo hnam hrang hrangte hi kan inpumkhata kan inlungrual loh chuan Mizoram hi a dingchhuak thei ngai lo ang. Mizoram ṭhatna tur kan duh a, kan ngaihtuahna kawngah hian kan duh dan leh kan ngaihdante pawh a inang vek lo a ni thei; mah se hei hian kan inlungrualna erawh tichhe lo thei se. Ram leh hnam humhalh kan tihte pawh hi kan inlungrual loh chuan engmah kan ni chuang lo ang. Midang thilṭha tih sawisel hian inlungrual lohna a thlen thei a, kan duh dan leh kan ngaihdan ang lo deuh a lo nih pawhin kan hnam ṭhatna tur a nih chuan kan pawm thiam a ngai.
Ruihhlo do kawngahte hian kan inlungrual a ngai. Kan ṭhalaipuite ruihhlo bawihah an tang a, a chhanchhuahna hna thawktute kan sawisel leh si. Ruihlo dotute kan thlawp lova, kan sawisel a, a sawiseltuten ruihlo do an tum chuan si loh chuan kan ram leh hnam chu a tluchhiain ang a, kan hmabak a thim hle dawn a ni. Kan sawisel khan midang thilṭha tih tum kan tihnual thei a ni.
Kan ram min chuhpuitu Chakma leh Tuikuk chungchangah pawh CYMA in hma nasa takin a la a, nimahsela Politician ṭhenkhat leh mi pamham ṭhenkhat, hamṭhatna um mi tlemte ten CYMA hmalakna hi sawisel ṭhin mah se la, CYMA hruaitute hian an tuang ti chhahin kan ram leh hnam tana hma an la zel hi an fakawm. Ramin hma a sawn dawn chuan rahbi tinah dodalna leh harsatna a awm ve zel a, mi rilru nghet leh huaisen, thu dik ṭan ngam hruaitute avangin harsatna leh dodalnate chu hnehin a awm ṭhin.
Mizote kan inlungrual ṭhat theih lohna pakhat chu kan inchhungkhur inkaihhruai dan hi a ni awm e. Mahni inchhung hi nungchang sikul hmasaber leh pawimawh ber a ni a, In chhung hian chetzia, rilru leh nungchang a chher a. Naupan tet laia ngaihdan kan rawn put kha puitlin hnu thlengin kan vawng reng ṭhin. Chuvang chuan inchhungkhur kan inenkawl dan hian kan ram leh hnam hmalam hun nasa takin a hril.
Hnam ropui tak ni turin lian tak nih a ngai kher lo. Kan inlungrual phawt chuan Hnam ropui tak kan ni thei a, nimahsela kan inlungrual loh chuan zawi zawiin kan hnam hi a ral dawn a ni.
Rammuanthanga, Dinthar II