Open letter to Engineer in Chief Mizoram Public Work Department

Subject: Vaiawt, Chamring kawng siam tura ngenna

Ka pu

Dt 27/03/2021 khan Sailam khuaah kan kal a. Ni dang - hun dang ang bawkin Aizawl lam aṭanga kala Chamring khaw pelha accident hlauhawmna hmun, Vai truck a chetsual nasat em avanga Mizoin ‘Vaiawt’ an tih hmun kan thlen chuan, kan titi kal lai thlakin, MPWD in helai hmuna accident laka invenna intar leh kawng intih zauh beithamzia kan sawi leh mar mar a ni. 

Kan haw lamah kan han hawizau deuh a, motor lian pahnih chesual a lo awm ngei a, an chhe nasa hle a, a khalhtute an thih loh hram kan beisei a ni. Kawng kual lai ko pang lam inlaih zauh belh hnuah pawh an la chesual tho tihna a ni a. Tih theih dang i nei tawh lo nge, tih ngaihna in hre tawh lo?  

Ka pu, saw laiah sawn motor engzat nge chesual tawh a, nunna hlu tak eng zat nge a lem tawh chu ka hre lo. Hei erawh ka hria. In tih tur in tih loh vangin motor lian, cheng nuai tam tak man, tam tak a chhe tawh a, an bungraw phurh, Mizoram mamawh, mimal leh mipui/sawrkar ta an phurh cheng tam tak man a chhe tawh a, mihring nunna hlu tak tam tak kan chan tawh bawk tih hi. 

Indian Roads Congress-in accident hlauhawm bikna hmuna lirthei chetsualna venna tura tih tur a tihte in ti ṭha lo hle a. Chu chu sawlai hmun kan tlan pelh a piangin kan hmu a ni. Ka pu, road safety hi lamlian hmangtu zawng zawng tan, nang leh kei tiamin a pawimawh. Accident hlauhawm bikna hmun te inngaihthah a, lirthei chetsual venna in dah mumal lo a. Chamring khawdaia motor lian accident-mekna ngeiah pawh lei a inchhung pawng ri ngawt a. Saw tiang sawn naupang bicycle khalh chak deuh pawh a dang thei dawn em ni? Tin, kawng chinchang hriattirna (signages) in dah mumal lo hle bawk a. State danga kan kala Accident hlauhawm bikna hmun a ni tih hriattirna de chhuai chhuaite kan awt hle a ni. 

Ka pu, India ram state hrang hrang aṭangin truck driver ten kan mamawh chakkhai phurin mel sang tam tak an rawn kal a, an tum ram an thleng lek lek tihah kawng kawi ulh vang chauhin accident an tawk ṭhin a. A pawi takzet a. Hmun danga zualko ngai loa a rang thei ang bera hma la turin ka ngen a che. 

I rintlak,