Two wheeler taxi permit

Aizawl khawpuiah hian taxi an intlàn chhâwk a, Aizawl taxi zinga hmun thuma ṭhena hmun khat chu ni tin an ding ṭhin a, hmun thuma ṭhena hmun hnih (66.67%) an tlân ṭhin. Hei hian a entir chu, Aizawl khawpui hian taxi a mamawh tâwk aia tam fé a nei a, taxi awm zat aṭanga 66% vel hi khawpuiin a mamawh tâwk chauh tihna a ni. Taxi awm mek zat aṭanga 33% vel chu mamawh chuang liam a ni tawh a, awm lo mahse khawpuiin a buai phah dawn lo tihna a nih chu. 

MNF sawrkar hun hmasa lamah khan a ni tain ka hria, taxi permit an pe chhuak vak mai a, chu vang chuan Aizawl khawpuiah mamawh tâwk aia tam taxi a awm phah ta niin an sawi ṭhin. Taxi permit an pek chhan ka hre ve lo a, mi ṭhenkhat chuan vote zawn nan leh an party mite tihlâwm nan a nih thu an sawi. Tak tak ni maw? Congress party kum 10 an sawrkar chhung khan taxi permit an pek chhuah belh em ka hre lo a, an hotute chuan an pek belh lo tih an sawi ṭhin niin ka hria. Chuti chung chuan, pe chhuak lo tawp chu an ni bik lo mai thei a; mahse, MNF sawrkar ang em em chuan an thei sem ve lo a ni mahna le. 

Congress sawrkar laiin Aizawlah two wheeler taxi tlântir ṭan a ni a, a tirah phei chuan duh an awm mang lo a, a duh tur an zawng zawk mah a ni âwm e. Mahse, a lo hlâwk ta phian si a, eizawnna ṭha tak a nih tâk avangin miin neih dan kawng an zawng leh ta sup sup si mai niin a lang. Two wheeler taxi hi khawpui (Aizawl chauh ni loin) leh a chhunga chengte'n an mamawh hrim hrim (necessity) a ni lêm lo a, veivahnaah awlsamna thlentu erawh a ni ngei mai. Public transport vehicle dang - bus, taxi, etc. erawh hi chu khawpuiin a mamawh a ni a, chu avang chuan, hmân aṭanga tun thlenga la awm ta zel a ni. Tunah hian two wheeler taxi hi nuarin, hun rei tak chhung tlân lo pawh ni se, khawpuia mipui nunphung a buai phah lutuk lo ang, two wheeler taxi a awm hma pawhin kan buai lem lo. City bus leh taxi-te erawh chu, tun hmain an lo nuar zauh zauh tawh a, mipui chêt velnain a buai phahzia kan lo hre tawh ṭhin. 

Eng pawh ni se, two wheeler taxi a awm ta hi a ṭha a, a lawmawm. Chutih rualin, permit pek chhuah kawngah khawpuiin a mamawh tâwk ngaihtuah tel a, khawpui mamawh tâwk mila pek chhuah a ṭul khawp mai. Taxi mai bakah, city bus pawh khawpuiin a mamawh tâwk aia tam a nei tawh a, tunah hian indin chhâwkin, ni tin bus eng emaw zat an ding ṭhin a ni. Taxi leh city bus aṭang hian inzir fing tawh tur kan ni a, mahse, kan la inzir fing ta chuang lo a; tun hnaiah two wheeler taxi permit sang chuang fé sawrkarin a pe chhuak leh tawh zu nia! 

Tun hnaia Mizoram sawrkarin two wheeler taxi permit a thei sem chur chur chhan hi 'Aizawl khawpui hian a mamawh e,' tih vang lam niin a lang lo. Ministry chelh mektu party-in an mi leh sate leh an duhsak zawngte tihlâwm nan leh ni berin a lang. Chu pawh, an party mite leh an duhsak záwngte chu two wheeler taxi hmang hian eizawnna bul lo ṭan rawh se, tih lam a kâwk chuang lo, a chhan chu permit an pek tam tak chuan an zuar leh nghal tlat. 

Tin, eizawnna atana mamawhte hnenah pek a ni lo a, a mamawh lote hlei hleiin an nei thei zaw mah emaw tih tur a ni. Kei ngei pawhin eizawnna ṭha tak nei, sawrkar lai party mi ni si, two wheeler taxi permit awlsam taka nei mai thei sawi tur ka hria. Chutih rualin, sawrkar lai party mi, two wheeler taxi permit pek an tum, mahse, eizawnna ṭha pangngai tak a neih avanga lo hnar tate pawh hriat ka nei. Heng aṭang hian sawrkar hian two wheeler taxi permit hi khawpuiin a mamawh vanga pek chhuah chiam a ni lo tih a tichiang viau. Chutih rualin, ruling party mi an ni emaw, ni lo emaw, eizawnna mumal nei sa ni lo, eizawnna neih ve phah an awm a nih erawh chuan ka lawmpui em em thung. 

Sawrkarin two wheeler taxi a thei sem chur chur hma pawh hian two wheeler taxi hi Aizawl khawpuiin a mamawh tâwk aia tam a nei tawh a ni ngei ang. A chhan chu - hetianga an sem chiam tih kan hriat hmain two wheeler taxi-te chu khawpui tlangdung kawngpui berah intlân chhâwktir an ni leh dêr tawh tlat. Intlàn chhâwktir hnua permit thar sang chuang fe an pek chhuah leh tawh phei chuan, ni khatah a chanve zela intlàn chhâwktir pawh ni se, khawpuiin a mamawh aia tam mah a la ni hial mai thei. 

Two wheeler taxi permit pek chhuah belh chiam hi sawrkar lama hotu ṭhenkhat chuan eizawnna nei lote eizawnna siamsakna atana tih a nihna lam hawi zawngin an sawi a ni àwm e. Eizawnna nei lote kawng zawnsak hi a ṭha ngei mai a, mahse, eizawnna kawng thar zawh mamawh miah lo, eizawnna ṭha nei sate pawhin permit an neih fo dan aṭang leh party mi pek an tum dan aṭangin, eizawnna insiamsak tumna ngawr ngawr chu a niin a lang lo. Party mite leh duhsak zawngte tihlawmna hmanrua a ni ngei tih a chiang. 

A thu hrimah, eizawnna insiamsak chhuanlama a hnu lama harsatna awm phah theite ngaihtuah duh lo luia public transport vehicle permit pek chhuah chiam hi thil ṭha a ni lo. Aizawl khawpui tâwtzia kan hre tláng a, traffic jam nasatzia kan hre vek a; khawpui tihtâwt belhna tur leh traffic jam nasat zual sauhna tura permit pek chhuah hi mipui náwlpui ṭhatna duh vang a ni thei lo. A tuartu tur pawh mipui tho kan ni. 

Eizawnna insiamsakna chhuanlam tur ni tak tak se, taxi permit duh tam tak an awm, pek chhuah leh ṭheuh mai tur em ni ang? Ni lo - tunah pawh khawpuiin a mamawh aia tam a nei tawh. Mi tam zawkin city bus hmanga eizawnna an neih theih nan city bus permit hi pek chhuah leh ṭheuh mai tur em ni? Ni lo - khawpuiin a mamawh aia tam city bus a nei tawh. Miin eizawnna atan a duh leh mamawh vang ngawtin public transport vehicle permit hi pek chhuah zung zung chi a ni lo; khawpui leh a chhunga chêng mil tâwkin, mamawh mil tâwka pêk chhuah chi a ni zawk. 

"Sawrkar hotute u, Mizoram leh Aizawl khawpui hi in hmangaih tak tak a nih chuan, mimal leh party mite induhsakna atan chuan public transport vehicle permit inpek hi lo ti tawh lo lul teh u. Kan neih sa pawh kan kan mamawh aia tam a ni tawh a, in pek belh zel chuan buaina zakhua thlentu mai a ni zel dawn. Khawngaih takin insûm deuh tawh ula, permit hi pek chhuah belh tawh lo hrâm teh u," tiin Aizawl mipuiin kan ngen a che u.