Zan curfew hlih a hun e

Nikum March 23 aṭanga Mizoram pum (India ram pum) total lockdown a nih hnuah tunah chuan kan nunphung a zalên leh ta hle mai a, Mizoram páwn, India ram state dangah a zalên lehzual.

Covid-19 hripui kaihhnawiha Mizorama kan nunphung a la pangngai lohna langsar zualte chu - zan lama khawpuia curfew, inkhawm dan, zirna in hawn chungchangah leh mipui punkhawm theihna huaihawt danahte a ni deuh berin a lang. Thil dangah chuan nunphung a pangngai ang a ni ber tawh.

Kan nunphung a la pangngai lohna zingah hian mipui punkhawmna huaihawt hian zawm a hlawh lo ber. Thupek bawhchhia, a bikin sawrkar hotute telnaah phei chuan zawm a hlawh lo lehzual a; a hrem theitute pawhin hrem an tum hek lo a, an hrem ngam lo.

Biak inah inkhawm phal ni tawh mah se, sawrkarin a la khuahkhirh hle a, zai pawh a phal lo. Kohhrante pawh a fimkhur thei ang berin an kal tih a hriat. Chutih laiin, February 19, tun Zirtawpnia Vanapa Hall-a political party pakhatin AMC councillor atana thlan tlin tharte an lawmnaah zaipawl hla an zaitir a, chumi zawm chuan kalkhawmte an zai hup hup a, an lám bawk a; sawrkarin a hrem thu leh pawisa a chawitir thu kan hre zui chuang lo. TV news-a lang chiang chin, a hma lamah ṭhutna (seat) inkar thlâkin ṭhu ve bawk mah se, TV-a lang chian lo chin, a hnung lamah chuan chutiang a ni zui chuang lo.

March 23, 2020 aṭang khan zan lamah curfew a la ni ta char char a; hripui lèn nasat zual lai kha chuan a ṭul pawh a ni ang. Tunah erawh chuan zana curfew tih reng hi eng nge maw a ṭulna le? Eng ang takin nge hripui lakah mipui a vèn? Chhûn lamah kan heti huai huai tawh a, chutih laia zana curfew tlat hian Covid-19 hi a véng dawn em ni? Chhunah hripui a kài theih loh a, zanah kài a awl bik em ni zawk? Zan curfew avanga hripui laka kan him phahna (a awm a nih chuan) zawng zawng hi chhûn lama kan nun dan hian a chawk chhe leh vek zel tho si.

India ram leh Mizoramah ngei pawh nunphung kan thlahdul tawh laia zana curfew tlat reng hi kan nun zel dan tur a ni thei dawn em ni? Mihring zalenna inrahbehsakna a kâwk tawh zawk lo maw? Sawrkarin a chakna (power) hmanga mihring dikna chanvo leh zalenna inrahbehsakna hi he Kristian ram, democracy ram hian a kalpui ta tlata ngai an pung tial tialte hi ngaihtuah ngun a va ngai ta em. Tunah hian eng nge kan hlauh? Kan hlauh laka invenna atana hmalaknate leh inkhuahkhirhnate hian hripui lakah min veng rêng em, tihte hi ngaihtuah a ngai e.