I hmalam hun tur

Mihring hian hun chi thum kan nei - hun kal tawh, tun hun leh lo la awm tur. Heng zingah hian tun hun hi a pawimawh ber ang a, hun lo la awm tura mi hriat chak hian ai-te kan en a, kut zia, horoscope-te kan en ṭhin. Tin, zawlnei inti ṭhenkhatin an hrilhlawk bawk ṭhin - lungpui alo lum dawn, chhiatna rapthlak a lo thleng dawn, tih te, mahse kan vannei nge ni, vawiin thlengin kan la tawng lo. 

Tun aṭanga kum 5/ 10 ah chuan hetiang hi kan ti ang a, a letin kan tipung ang tiin tum (ambition) te kan nei ṭhin. Ruahmannate hi chu kan siam lawk chiam chiam thei, a hlawhtlinna thleng tak tak tur chuan a harsat leh hle ṭhin. Ruahmanna siam hi kan hma lam hun atana kan tih theih tawk a ni deuh ber mai. 

Leilung danah mi ṭha leh fel, dikte hi chu tluang taka kal chho zel tura ngaih an ni. Thil ṭha leh malsawmnate pawh dawng tura ngaih an ni. Hetih lai hian mi ṭha lo, hlep ruk ching, dawt sawi hmang, etc te chu a tawpah chhiatna/ manganna tawng tura rin an ni. Mahse, miṭha tak takte pawh hian chhiatna an tawng fo a. Mi ṭha lote pawh vanneihna ropui tak tawng ta tlat an awm ṭhin bawk a. Nia,heng mite hi chu khuarel piah lam (exceptional case)te a ni thei mai ang chu. 

Bible-ah hian chiang takin mihring­ten kan tuh rah kan seng zel dawn, tih min hrilh. Miin thil ṭha lo a tuh chuan  nakin­ah thil ṭha lo vek a seng dawn, chutiang bawkin thil ṭha a tuh chuan chu mi vek chu a seng leh dawn. Miin maian a tuh chuan maian a seng dawn, vaimim a seng daih thei lo. 

I hun kal tawh han thlir kir teh, zu in nan, hlep ruk nan, dawt sawi nan, hur nan te a ilo hman chuan i hma lam hun tur chu a eng vak thei lo ang. Ṭha taka hun i hman chuan hma lam hun chu eng turah ngai rawh - kan tuh rah kan seng dawn tlat a ni. 

Kan tun hun apiang kan hman ṭhat chuan a lo in khawl khawm ang a, chanchin ṭha tak kan lo nei thei dawn a ni. Eng tin nge kan tun hun chu kan hman ṭhat theih ang? A ruka hmu ṭhintu che Pathian hnenah inhlan ṭhin rawh. 

Bible-te pawh chhiar fo la, tichuan i nun kawng chhuk chhoah thurawn ṭha tak pe ṭhintu i nei tihna a ni mai. 

“…kum 100 dam tur angin hna thawk la, naktuka thi mai tur angin ṭawngṭai rawh” tih hi a pawimawh. Second khat pawh hi kan thu lo a ni. Pawisa khawl keuh keuh ang chi te pawh hi in hmakhua nan chuan thil ṭha tak a ni. Pawisa khawlna ṭha tak an tih bawk chu mamawh bak thil lei loh a ni. 

Khawvel chu a awm ngai rengin a awm ang a, keini erawh kan la ral dawn. Kan hma lam hun tur atan kan vawiin te hmang ṭha ila, tichuan, kan tu leh faten Zoram nuam an neih theih ngei nan.