OIL PAWLH DAL HI...

Oil kan tih hi Mizoṭawng chuan dah dawn ta ila ‘lei hriak’ kan ti thei ang. A petroleum scientific chuan hydrocarbon an ti a, hydrogen leh carbon hlawm titih tena an siam a nih avangin hydrocarbon an ti. Lei chhung aṭanga laih chhuah a nih hian gas te, oil leh crude etc an lo ni ta zawk a ni. 

Hetiang oil kan tih hi Alkene Series an ti a, C-Carbon atom a tam chho zelin C-1 Methane aṭanga C-2…C-4 (Butane) ti chho zelin C-6 aṭanga C-13 vel thleng hi petrol an ni tlangpui. C-11 aṭanga C-15 vel hi Kerosine niin, C-13 aṭanga C-21 thleng tur awmang vel hi diesel a ni ve thung a, C-21 chunglam hi chu sakhat deuh grease leh alkatra kan tih ang chi te hi a ni chho thung. 

Oil kan tih mai crude oil pawlh dal lohah hian carbon 80% leh hydroden 15% vel awm anga chhut a ni a, a dang tlem te te sulphur, nitrogen leh oxygen te a awm ve bawk. Oil hi organic origin niin kum maktaduai 400-250 bawr vel daih tawha lo insiam ṭan tawh nia chhut a ni a, cretaceous period an tih kum maktaduai 40-65 bawr vel kha a insiam runpui bera ngaih a ni. Tuna Mizoram leilung upat zawng, insiam hun lai bawrvel hi a ni awm e. 

Ka sawi duh tak zawk chu oil pawlhdal hi a ni. Oil pawldal nan hian khawnvartui hman a ni ṭhin a, petrol man te aia kerosine (khawnvartui) man a tlawm zawk fe avangin a pawlhtu leh zuartu tan chuan hlawk tur tak chu a ni na a, dan phal loh a nih tlat avangin tih miah loh tur a ni. Supply Depot/ Refinery-ah a nihna ang tur thlapa pawlh tawh leh siam danglam tawh hnua retail outlet, zawrh chhuah tura pek a nih ṭhin avangin lo pawlh nawn leh hi a him tawh lo hle. 

Mizote chiah hi petrol pump oil pawlhdal ṭhin kan ni mai awm mang e a tih theih. Hnamdangin an chin hi hriat tur a vâng hle a, black market-ah erawh an in man sak ve fo. Mizote hian eng hun lai aṭanga oil pawlh dal hi ching nge kan nih hriat a har hle a, kum 2003 bawr chho vel pawh khan oil kan pawlh dal nasat avangin Director General, Oil Adulteration, Govt. of India hial a lo kal a nih kha. 

Tunhnai a Legal Metrology Inspector-ten him lo leh ṭha lo an tih, addl. DC-in a lo chhuah ngawt mai leh, mipui hnena hralh zawh vek a ni mai hi a zia lo hle a, state danga thleng chu ni se engtin tak in ti ang maw? A man theitu leh a check-tu technical concern department tan tak pawh a tlawm thlakin a zahthlak hle ang. 

State dangah chuan petrol leh diesel quality hi unload hma leh unload hnu, underground tanky-ah check ṭhin a ni a, a ṭul dan azirin surprise checking te pawh neih ṭhin a ni. Mizoramah erawh engtin nge an kalpui ve ka hre thui lo. Petrol pawlh dal leh dal loh hi specific gravity hmangin Legal Metrology Inspector-ten an teh ṭhin a, hydrometer hmangin petrol density hi endik ṭhin a ni. 

A tehna .0030 (zero three) hi adulterate permissible limit a ni a, hemi ai sang .031, 32, 33… leh a chung lam kha pawlh dal nasat chu a ni. Zero point one a san pawhin man tur tihna a ni. Kan Legal metrology hovin an man, point three laia sang leh pawlh dal, kan Addl. DC-in a hniam lutuk tia a chhuah ngawt hi mi ram leh state dangah chuan sawi tur a vâng fu awm e. 

Petrol pawlh dal a nih hian engine a tichhe hma a, a pawh chak tur angin a pawh chak theih loh phah a, oil hman ral a ti tam a, environment a tihchhiat nasat bawk avangin ram dangah chuan an ngai serious hle ṭhin. Kan thawh vena ṭhin, India rama oil leh gas ngah ber pawl Gujarat state-ah te chuan black market leh oil pawlh dal hi hriat tur a vang hle. 

Mizoram pawh kan ram leilungin a zir avangin oil leh gas te pawh nei ve ngei turah in ngai ila. Tun dinhmunah erawh duhthusam kan pha lo hle. Gas kan nei ve tih te pawh ONGC lam chuan Meidum-ah a awm tih min confirm sak tawh a, chu erawh Tight Formation, Permeability, a hip chhuahna leh kal kual velna ṭha lo min tihsak bawk si. Oil te pawh kan la hmuh belh ve zel turah ngai ila a, pawlh dal lam kan lo sim vat hi a ṭha hle mai. 

Dan phal loh, mihring leh environment, nungcha dangte tana thil pawi leh keimahni khawl ngei tan pawha thil ṭha lo tak a nih avangin oil pawlhdal hi Mizo Christian takin i sim ang u.