SERAMPORE COLLEGE INRELBAWL DAN TLANGPUI

Mizo Kristiante chuan Serampore College chan­chin leh a dintu Pathian rawngbawltu ropui William Carey hi kan hre tlangpui awm e. Tunah hian kum 202 na a hmang mek a. William Carey hi ‘Father of Modern Mission’ ti-a hriat anih bakah educationist, social reformer, botanist a ni bawk. Amah leh thih thlenga a thawhna College hi khawvel kristian leh kristian ni lo zingah ngaihsan leh hriat reng a ni tawh ang. 

Serampore College chan­chin hi kan hriat tlanglawn viau lai hian a nihna dik tak erawh chu hre chiang kan tam loin a rinawm. Kei leh ka thawhpui Mizo ordained minister-te hi Serampore College chanchin a nawlpuiin an hriat piah lam hre chiang lehzual duhte’n zawhna chi hrang hrang min rawn zawt ve ṭhin a. Hengte avang pawh hian Serampore College inrelbawl dan hi hriat chian lehzual duh te tan tarlan ṭulin hriat a ni ta a ni. 

Pathian hruaina-in kum nga (w.e.f. 1st November 2015) lai Principal hna ka thawh ve hnu hian, a kalphung leh a dan (law) te uluk taka ka zirchian aṭangin Serampore College dinhmun, nihna, kalphung leh thuneihna te hriat fuh loh leh a dan (law) te a nih anga hman a nih loh avangin he college nihna dik tak hi kan hre chiang lo niin ka hria. 

Ka awm ve tawhna apiang­ah ka phak ang angin inrelbawlna fel leh dik ‘Syste­matic Administration’ hi ka ngaih pawimawh ṭhin a nih avangin he College ropui tak hi a nih tur ang taka kal tir turin hma ka la a. Tunah hian tam tak chu siam dik leh siamṭhat a ni tawh a ni. 

A chanchin tlanglawn chu kan hriat tlangpui avangin, a tlangpui chauh han tarlang hmasa ila. Serampore College hi William Carey, Joshua Marshman, William Ward te’n kum 1818 a an din a ni a. A tir aṭangin Pathian thu leh khawvel zirna (theological & secular education) kalpui nghal a ni. 

A tirah zirlai 37 awmin European deuh vek an ni. Sanskrit, Persian, Arabic, Botany, Sacred Scriptures, General History, Chronology, Geography, Astronomy, Hindu Law leh Buddhist System te zirtir an ni. The Royal Charter: Kum 1827 khan Denmark Lal, King Frederick VI-na chuan Serampore College hnenah hian Royal Charter a pe a (a original hi Principal Quarter-ah Lal seal nen thlap vawn ṭhat a ni). He Royal Charter hian Serampore College hnenah thuneihna tam tak a pe a, chung zingah chuan Pathian Thu (theology) ah degree pek theihna a tel. A petu atan ‘Council of the College’ pawh a din nghal bawk. He thuneihna hi kumkhua (forever) atan tiin ziah a ni. Chuvangin, theology degree pek chhuah zawng zawng hi Serampore College Degree a ni tih kan hriat chian a ṭha awm e. 

Degree pek pawh hi Coun­cil thuneihna liau liau a ni. He thuneihna hi an aiawhtu lo kal leh zelte (successors) hnenah hlanchhawn zel a nih thu pawh ziah tel vek a ni. The Royal Charter-in Serampore College hnena a pek thuneihna hi hmun dang/ thil dangah transfer theih a ni lo. He Royal Charter-in thuneihna a pek hmang hian Serampore College chuan kum 1915 khan a hmasa ber atan mi pathum hnenah Bachelor of Divinity degree a lo hlan tawh a ni.  

Khawvel zirna lam pawh 2nd May 1857 khan Univer­sity of Calcutta-ah affiliate a ni a. University of Calcutta hi hemi kuma din niin, Serampore College hi affiliation pek hmasak pariat zingah telin, non-government zingah a hmasa ber a ni bawk. 

The Serampore College Act, 1918: Serampore College kum za (centenary) na, kum 1918 khan khatih laia British India khan Bengal Legislative Asembly hmangin The Serampore College Act a pe a. ‘The Serampore College Act, 1918’ hi Bengal Act IV of 1918 ti-a hriat a ni bawk. He dan hi Bengal legisla­tion hmanga pek a nih avangin West Bengal sawrkar chauhin legislation hmang vek chauha a siam danglam/ siamthar (amend) emaw ṭhiah (repeal) emaw theih a ni. 

He dan hian Serampore College thuneihna a nem­nghet a. A hnuaia peng hrang hrangte inthlunzawmna zawng zawng hi Serampore College-ah a nih avangin he College hnuaia kal (function) vek hi an ni. He dan hi Rev. George Howel Principal laia pek a ni a. He dan hmang hian Council of the College chu siam len a ni bawk. 

COUNCIL OF THE COLLEGE: Hei hi Serampore College ah a thuneitu ber (apex body) a ni a. Master, Serampore College hi Council-ah hian President a ni nghal a, kum nga chhung atana thlan a ni. Term khat dang atan thlan nawn leh theih a ni. Principal hi Council-ah hian Secretary a ni ve nghal bawk. Council member te hi India rama Kohhran lian (Catholic tello) atangin Council-in a ruat thin. Chungte chu – Baptist Kohhran atang hian members paruk ruat tur an ni; Baptist Church of Mizoram (BCM) leh adang pang te niin, Council Member dang te chu heng atang hian pakhat theuh ruat tur a ni, chungte chu - Church of North India (CNI), Church of South India (CSI), Lutheran Church, Methodist Church in India, Orthodox Syrian, Presbyterian Church of India (PCI), Mar-Thoma Church, te an ni. Kum 2018 atang khan Presbyterian Church of India (PCI) atanga ruat thin piah lamah Mizoram Presbyterian Kohhran mi leh sa ruat thar a ni bawk. Hei hi Serampore College a thil thleng ngailo, thil thar a ni.

Master leh Council member te hi an mahni kohhran theuha hruaitu lian Bishop te, Metropolitan te, Moderator te, General Secretary te leh nihna pawimawh tak tak chelhtu an nih avangin an hna ah an buai tlang hle a. Council meeting hi a pawimawh em avangin an rawn tel hman hram a ni. Meeting zawhah an mahni hna theuh ah an buai leh nghal veka. Principal kutah a bawhzuina leh hmalakna zawng zawng te chu a innghat vek a ni.

The Serampore College Act, 1918 hian Council hnenah Serampore College hnuaia peng pahnih (body) din phalna a pe a. Chungte chu;

1.    COLLEGE FACULTY: College Faculty hi College inrelbawlnaa mawhphurtu niin, Council thuneihna thenkhat emaw a vaiin emaw hlan chhawn (delegate) a ni a. College Faculty ah hian Principal chu President atan dan hmanga ruat nghal a ni a. He committee ah hian Secular leh theological education aiawh te leh Senate of the College aiawhin Registrar of the Senate chu member atan bye-laws hmangin ruat an ni. College Faculty hi ‘Governing Body’ niin College inrelbawlna zawng zawng a ngaihtuah thin. UGC, West Bengal sawrkar, University of Calcutta te nena inzawmnaa thil tul leh College programme zawng zawng leh tul dang te a rel thin. 

2.    SENATE OF THE COLLEGE: Senate of the College ah hian Principal chu Convenor niin member dang sawmphnih aia tlem lo, sawmpariat aia tam lo awm turin danin a ruahman a. Heng mite hi ‘Senator’ ti-a kan hriat te an ni a. Principal chiah hi ‘Permanent Senator’ niin, member dang te chu Council ruat (appoint) tur an ni. He body thutkhawm hmasak ber (1918) ah Principal chu ‘Permanent President of the Senate’ atan ruat a ni a. Executive Committee ah pawh President atan ruat nghal a ni bawk. Kum 1966-a India mi Principal hmasa ber alo awm khan initsikna leh boruak dang tha lo avangin kum 1967 atang khan Senate President atan Principal nilo midang ruat alo nitaa. Hemi chungchang hi Council-in Special Council Meeting ah ala ngaihtuah leh dawn a ni.

Principal baka Senate member te chu heng atang te hian ruat tur an ni. (a) Anglican, Baptist, Congregational, Lutheran, Methodist, Presbyterian and Syrian – hengte hi a theih chin chinah Council-in tul atih angin a ruat ang. (b) Member hmun thuma thena hmun hnih te chu Serampore College a professors, officials or thawktu dang te (functionaries) nilo te atanga ruat tur an ni. (c) Member hmun ruka thena hmun khat te chu College Faculty members atanga ruat tur an ni.

Senate of the College mawhphurhna hi Serampore College-in Pathian thu zirna a kalpui ah academic lama mawhphurtu a ni a. Council kaihhruaina hnuai (subject to the control of the Council) veka kal tur a ni. Zirlai (courses) buatsaih te, examination leh result buatsaihte hi a hna chanpual a ni a. Result hi Council-in a pawmpui (approve) hnuah Serampore College Degree chu Serampore College Convocation-ah Council-in a hlan thin a ni.

PRINCIPAL DINHMUN LEH PAWIMAWHNA: Principal hi he College dintu ber William Carey thutna (chair) luahtu a ni a. Chief Executive Officer a ni. A dinhmun hi a pawimawh hle. Serampore College pumpui hi Council ta a ni a, heng sum lam (finance), a hmunhma leh bungrua (properties), laksawn theih leh theih loh (movable & immovable) zawng zawng hi Principal enkawl leh mawhphurhna (oversight) a ni. The Serampore College Act, 1918 ah hian Master leh Principal chiah hi ‘designated post’ atana ruat an ni bawk. Principal hi India ram leh ram pawna Kohhran (churches) te, Missionary Societies, Universities, sawrkar leh a department hrang hrangte leh Ecumenical organizations te nena thawhhona, inzawmna (co-ordinate, liaison and represent) zawng zawnga Serampore College aiawha hmalatu tur leh mawhphurtu ber a ni. Chuvangin, Principal hian a official programme ah Serampore College-a thawkho India ram kohhran hrang hrang te aiawhin a thawk chhuak a ni. 

Serampore College pumpui ah hian Principal chiah hi pension thlenga thawh phalsak (pensionable) a ni a. Tun dinhmunah hian kum 65 hi pension kum a ni mek. Principal hi UGC norms anga Council ruat niin kristian nih angaih bakah theological degree neih tel a tul. Government of West Bengal in pawmpuiin, a service leh a hlawh pawh Government of West Bengal inkaihhruaina zulzui a pek a ni bawk. West Bengal sawrkar hian ‘civic rights’ a pek avangin Serampore College a secular education lama zirtirtu te hi politics khelh phalsak an ni a. Principal pawh he ‘rights’ hian a huam. Tunhma lama West Bengal sawrkar a an Education Minister pawh Serampore College secular education lama zirtirtu tanglai alo ni tawh nghe nghe a ni. 

CHALLENGES: Khawvel zirna leh Pathian thu zirna kal dun rial rial anih ang takin secular leh theological student pawl lian leh active tak awm dunna, India rama Kohhran pawl hrang hrang awmna, Kristian, Hindu, Muslim te leh sakhaw dangte awmkhawmna, tawng hrang hrang hmang awmna, culture leh practices hrang hrang awmkhawmna, hnam hrang hrang kalkhawmna anih avangin fimkhur leh thiam taka kalpui reng a tul a. 

Secular education ringawt pawh hi university tam tak aia lian a ni a. Hei bakah hian secular education lam bikah hian political party lian te thuneih an inchuh rengna niin, Minister, MP, MLA, local politician te pawh inrawlh an tum reng thin a ni. Secular zirtirtu te hi selection committee siamin Principal chairman na hnuaia lak niin, Council-in appointment pe-in West Bengal sawrkarin a lo approve leh thin. Theological education lamah pawh hian Church Politics leh Regional Politics te hi a nep chuang lo. India rama state lian, mihring tamna leh politics virvel nasatna West Bengal mai nilo, national leh international thlenga inthlunzawm leh thawkho anih avang leh heng zawng zawng hi thiam taka kalpui leh thunun (deal & control) a ngaih avangin Serampore College Principal hna hi administration harsa ti-a hriat a ni reng a ni. Thil hote a ngaihah pawh boruak lian tak awm thei mai a ni.

SERAMPORE COLLEGE IN ZIRNA A KALPUI DAN:

(a)    FACULTY OF ARTS, SCIENCE & COMMERCE (ASC): Khawvel zirna kan tih mai ah hian zirtirtu 100, zirlai 3400 leh non-teaching staff 30 an awm meka. Hei bakah hian casual staff engemaw zat an awm bawk. Under Graduate ah hian department 20 awmin Post-Graduate department 3 (Human Physiology, Zoology & Botany) a awm. Heng department hrang hrangah hian Serampore College din tirh atanga la awm ngai lo Kristiante tana 30% seat reservation policy chu kum 2017 atang khan siam a ni a. Kristian engemaw zatin an chhawr tangkai tawh pang a ni (Kristian te hian admission an lo hmu thei ngai meuh lo a ni). Hei hi India rama Kristiante tan chanchin lawmawm tak a ni. A bikin a ram mi Kristiante an lawm lehzual. Hei bakah hian Council-in tul atih ang admission a la pe thei. Amaherawh chu dan ang thlapa dil tur niin admission atana tulte (minimum criteria) neih a ngai. A bakah chuan strict takin ‘merit’ hmanga admission hi tih vek a ni. Sawrkar inrawlh pawh phal a ni lova, inrawlh pawh an inrawlh ngailo.

(b)    FACULTY OF THEOLOGY: Hei hi a bik takin Mizo Kristian te’n Serampore College kan hriatna ber a ni awm e. Zirlai hi 180 vel an awm tlangpuia, zirtirtu hi 13 an awm mek. India ram hmun hrang hrang atangin, Kohhran hrang hrang atangin zirlai leh zirtirtu an kalkhawm thin. He College a zir te chuan India ram Kohhran hrang hrang te kalphung, culture, tradition te an hriat chian phahin hnamdang te thlir dan dik pawh a takin an zir tel bawk.

Heng bakah hian Bishop’s College nen tangkawpin Post Graduate leh Doctorate zir theihna turin North India Institute of Post Graduate Theological Studies kalpui a ni a. Faculty of Theology a zirtirtu indaihlohna phuhrukna turin Mizoram Presbyterian Kohhran leh Baptist Church of Mizoram ten ordained minister-te zirtirtu atana min hawhtir a, sum leh pai pawhin min tanpui bawk a. Anni bakah hian Evangelical Church of Maraland leh Lairam Isua Krista Baptist Kohhran atang te leh mimal thahnemngaite hnen atangin tanpuina kan dawng bawk.  Naga leh Khasi kohhran atang pawhin zirtirtu thenkhat hlawh tur min rawn tumsak ve bawk.

(c)    SENATE OF THE COLLEGE: Hei hi Pathian thu zirna lama mawhphurtu a ni a. Zir tur (courses) buatsaihin examination lam a buatpui bawk. Tam tak chuan Senate hi university emaw an ti mai thina, tin degree te pawh hi Senate degree emaw an ti mai bawk. Mahse, Senate hi university ni lovin, Serampore College peng (body) pakhat mai niin degree te pawh hi Serampore College Degree a ni. Chu chu The Royal Charter leh The Serampore College Act, 1918 in thuneihna a pek dan a ni. Chuvangin, India rama affiliated college zawng zawng atanga zirchhuak te hian Serampore College Degree an dawng ani tih hi hriatchian a tha awm e.A chian lehzual nan entirna han tarlang ila, Mizoram University hnuaiah hian peng hrang hrang a awma, a khawimah hi University a ni theilo, tin, examination department te’n examination te leh result te an buatsaiha, mahse examination department result ni lovin Mizorom University result a ni. 

Serampore College Act (Preamble) in a tarlan dan takah phei chuan degree te hi Serampore College zirlai te hnena pek tur a ni a (…including the power of conferring upon the students of the said college* degrees of rank and honour according to their proficiency in science) tih a ni. Hei hi mi thenkhatin sawrkar hotu te hnenah pawh sawichhuakin an nawra. Mahse Principal-in dan hre mite (Supreme Court thlenga experience nei) rawnin, Serampore College Act in a huam chin chungchang chu, India Constitution awm hmaa dan te (pre-Constitutional law) chu an huam chin (extra-territorial effect) thu-ah Explanation II under Article 372-in a humhim (protected) tlat a ni tih document nen sawrkar ka hriattir hnu-ah sawrkar lam pawh an hmin ta a ni. Tin, sawrkar hotu te nen hian kan inpawhin min duhsakna hi kan hlawkpui khawp mai. 

Faculty of Arts, Science & Commerce (ASC) leh Senate of the College te hi chu an dinhmun (sum leh pai lamah pawh) a tha thawkhata. Pathian thu zirna ber Faculty of Theology hi tun dinhmun thleng hian tuam hlawm ala ngai hle. Kohhran emaw pawl emaw enkawltu bik neilo anih avangin Student fee chiah hi a sum hnar a ni. Kohhran leh mi inphal te puihna ala mamawh hle. Tunah hian theihtawp chhuahin mahni ke-a a din theih nan hmalak a ni a. Tun atanga kum nga ah chuan mahni ke-a ding thei tawh tura hmalak chhoh mek a ni.

Serampore College hi a bik takin theological college tam tak alo din hnu hian mitam tak chuan college dang pakhat anga ngai mai an awm. Mahse, Serampore College hi heng college te nen hian ngaih fin tur a ni lo. Principal pawh hi affiliated college-a Principal te nen a in anglo tih hriat a tha. Serampore College hnuaiah (umbrella) ah hian Council of the College, College Faculty leh Senate of the College te hi an awm (function) a. Heng hnuaiah hian India rama theological college leh seminary 58 lai an awm veleh a ni.

Serampore College hian tun kum nga kal ta khan heng a hnuai ami te nen hian thawhhona thuthlung (MOU) a ziak.

1). William Carey University, USA. 2) Princeton Theological Seminary, USA. 3). Regent’s Park College, Oxford University, UK. 4). National Museum of Denmark. 5). Ambassador of Royal Embassy of Denmark, New Delhi. 6). Maulana Azad Urdu University. 7). Sensabyte Edusoft Pvt. Ltd. 8). Christian Relief International (Barnabas Fund), UK. 9). Synod Mission Board, Mizoram Presbyterian Kohhran.

Presbyterian Church of Korea (PCK) te nen thawhho tumin hmalak mek a ni a. Pandemic zawha bawhzui turin PCK hruaitu leh Principal te’n an dah a ni. Serampore College hi pandemic hma khan kum tin India ram pawn khawvel ram hrang hrang atangin mi 800 velin an rawn tlawh thina. Heng zinga a chanve aia tam hi South Korea mite an ni.

Hetiang taka pawimawh anih avang hian India rama Pathian Thu zirna nghet a awm zel theih nan Serampore College hi a pawimawh tak zeta, chak taka a kal zel a pawimawh hle. Kristianna ngaimawhtute an rawn len chhoh mek lai hian nekchepna laka kan him theih nan kan inkaihhruaina tura dan kan neih mekte hi dik leh fel taka kan zawm a pawimawh deuh deuh dawn a. Chutianga kan kal zel theih nan chuan min lo tawngtaipui zel turin ka sawm che u a; Mizorama Kohhran hrang hrangte pawh thahnemngai taka min thawhpui zel turin ka sawm a ni.