RISK... RISK....RISK

Kan tlangval ve lai khan a ruka zu in kan ching a. Thawhchhuah nei lo ta kha chuan zu man tur neih loh chang kha a awm fo a. Chung hunah chuan kan ṭhian zingah khan risk huai deuh pahnih an awm a. Anni khan zu an han lam a, kan in zo ta maw tihah pakhat te te in kan chhuak a. A hnung berah an rawn chhuak a, engtin tin emaw in sawifel dan kha an rawn zawng a, an ṭawngkam thiam a chhuah a, an rawn chhuak leh mai ṭhin. 

Tih chi hi kan ti khawp mai a, kan hlimpui viau ṭhin. Hun alo kal deuh a, khatihlaia zu tamna hmun, Tuikual te, Tuichhunchhuah vel leh Canteen kual, Zodin Square velah khan kan ṭhianho mai bakah, Mission venglam tlangval zuin ho kha zu hmunah kan tlatlum ta lo khawp mai a. A man pelawk lo chuan zu in tur kan hnawng ta deuh a. Hmeithai zu zuar hmaah khan khawngaih dilin kan bawkkhup lo chauh ta ṭhin a - Risk kan chin vang a ni. 

MNF leh India sawrkar inremna tur atana ṭhahnem ngaia MZP ten kan beih avanga lungin kan tan laite khan, lehkhaden kha kan uar viau a. Jail aṭanga kan chhuah hnu pawh khan cheng nga chawiin kan indeng fo a, mahse phakar deuh, 'Risk' ching kha kan awm ṭhin a. An tel tawh chuan, tel ve duh lo kha an awm fo. 

Risk lak hi tih fuh chang a awm thei a. Mahse, tih fuh loh chuan mualpho thlak tak a ni. (Tihfuh aiin tih fuh loh a awl zawk lehnghal) A len viau phei chuan chhiatna zakhua a thleng thei. Mahni tan chauha risk lak ai chuan chhungkaw pa berin a risk lak chu, ngaihtuah ngun a ngai lehzual. Ram pum tana Risk ngat phei chu hlauhawm tak a ni. 

Kan Chief Minister chuan mau chin chung changah Zofate risk min lak pui a. Eng tak ang i maw? Kum nga hi an hun neih a ni a, a bak hi mipuiten an thlan leh thlan lohah a inghat. Chumi chhung chuan Mau hmanga intodelh tur hian eng chen nge min kalpui dawn kan sawrkar hian? 

He zawhna chhan­na hi tuna neih mai theih a ni lo. Kum 1966 a Independent min sual pui ang deuh khan, hun lokal turin a tih fiah chi a ni ang.  Tun hnua han ngaihtuah let hian, Independent kha min Risk pui a, mahse a fuh chiah lo a ni em? Chuti zawnga ngaihtuah chuan, MNF sawrkar hian Risk min lakpui hnem tawh a, mahse fuha ram a la awm hleithei lo ni te hian a hriat. 

Zofate hian tuna Mau a Risk min lakpui hi chu hlawhtling hram se kan ti tawhin ka ring. A stake, Vai/ Mizo ṭawngin dahkham emaw, thap emaw hi Zofate leh kan ram hi niin a lang si a. A hlawhtlin leh hlawhchham inkar a zau hle dawn a ni. 

Ltka, Msv