Cheng vaibelchhe chuang senga zinte hi AMC enkawl zel tlak an ni em?

Aizawl Municipal Corpo­ration term hmasa sum hman dan an han lipse tak tak chu eiruk leh eiruk loh lam chu lo dah ṭha ta phawt ila, kha AMC-a MNF sorkar khan sum hman an thiam lo hle tih chu an sum hman danah chiang kek kawkin a rawn lang chhuak a, zin veivahna (Tours & travels) term khat chhunga cheng vaibelchhe chuang Rs 1,15,33,037 Aizawl mipuite pawisa hman ral a nih hi a rilru nat thlak em a ni. 

Zinna Senso heng pawisate hi MNF Councillor te hman chu a ni vek bik hauh lovang tih chu thil chiang ni mah se a tam ber hi chu anni hman ral tih pawh chiang tel thova ni, chuvangin tuna AMC inthlan lo awm leh turah hian thlan tlin leh zel tawh loh hi a ṭhat zawk a rinawm tlat a ni. 

Heng zin veivahna senso tam tak hi chu India ram khawpui dang leh foreign khawpui changkang tak taka kan Councillor leh tu tute emaw zinna a nih hmel a, an zir chian ber chu an bawlhhlawh sawngbawl dan, an tui chhe paih dan tihte a nih thu an report ah chuan an tarlang a, mahse Aizawl khawpuiah a takin an rawn paw haw mang si lova, ram dang khawpuia zin khawthawng kher lo pawh hian Aizawl khawpui bawlhhlawh sawngbawl dan hi chu a zir theih tho awm si.

Ward 19 a awm a, chutah chuan Councillor 19 kan nei a, office hnathawkte chu lo telh lo ta phawt ila, MNF chauh ni lovin MNF leh Congress Councillor-te pawh huam tir pawhin Councillor pakhatin an term chhunga zin veivahna sensova an hman zat chu chawh rualin Councillor pakhatin Rs 6,07,001 an hmang zel anga chhut theih a ni a, cheng nuai 6 vel zel Aizawl khawpui tana pawisa chu zinna sensovah an hmang ral a ni. 

Heng zinna senso hi a uihawm bik nachhan chu AMC chu Aizawl enkawltu an nia, thingtlang lamah official duty in an zin ve a ngai lova, an zinna senso hi chu Mizoram pawna an zinna deuh vek a nih hmel a, Aizawl enkawl tura kan thlante Vai ram khawpui leh Sap ram khawpuiah an zin chhuak nasa lutuk hi chu Aizawl mipuiten kan pawisa hi kan ui ve a ni. AMC pawisa zinna atana an hman nasat em avang hian zin vak vak tawh lo tur Councillor thlan mai hi a ṭha zawk lo maw? A party chu eng pawh lo ni se tuna AMC enkawltu ni lo a thar hi thlang ve ta ila, an zin tlem deuh chuan kan sum save hi a tam tham dawn a ni.

Hei bakah hian zinna sensova an telh loh, pawisa an hmanna dang lian tham pakhat chu Petrol & Diesel-ah Rs 92,64,596 an seng ral a, cheng nuai 92 hi Aizawl khawpui chhunga kan Councillor te leh AMC office lirthei Diesel leh Petrol manah min han hman sak hiau hiau mai a, hei hi kan AMC sum inenkawl dan fel loh rah a nih hmel a, AMC Office enkawl thiam deuh thlan a ṭhat hmel khawp mai.

Street Lighting tih pawh hi chhui zui chu a ngai khawp mai tih AMC pawisa hman dan aṭang hian a rawn lang leh ta. MNF enkawl AMC-in an term chhungin Street Lighting atan Rs 4,46,08,484 an hmang ral tih RTI Act hmanga zawhna an chhanna aṭangin a lo lang leh ta a, cheng vaibelchhe li zet hmanga Aizawl khawpuia eng an vuah dan hi tlemin i han chhui za dawn teh ang.

Aizawl khawpui kawtthler tam zawka light kan hmuh hi chu Power & Electricity Department in an vuah a ni tih kan hria a, tun hmaa AMC a pian hma pawh khan Aizawl kawtthler lun deuh chin hi chu an tieng vek tawh a, AMC lo pian hnua street light an vuah tam ber hi chu Solar hmang chi a ni a, hei hi Rs 3500 velin a lei theih tih chu mipuiin kan hre tawh a ni.

Tunah hian cheng vaibel­chhe li an hman ralna hi heti zawng hian han chhut chhin teh le - Street Light pakhat leina manah Rs 3500 zel lo seng ta ang se, Aizawl khawpuiah hian MNF AMC sorkar khan street light 12,745 zet a dah hman tawh tur ang a ni. Aizawlah hian Local Council 83 a awm a, chuvangin 12,745 hi veng 83-ah han sem leh ta ila, veng tinah street light 153 tal chu dah thar vek tur ang an ni a, chuti a nih chuan in vengah khan street light thar 153 an dah nge dah lo tih lo chhut ta che u. MNF khan AMC pawisa cheng 4,46,08,484 kha 'Street Lighting' atan sum an seng tlat a ni tih Aizawl mipuiin kan hriat thar a ṭha khawp mai.

Kum nga chhungin Mizoram pumpui hi enkawl dawn ta ula stationery-ah engzat nge in hman ral ang le? MNF chuan AMC term khat an enkawl chhung khan stationery-ah ringawt cheng vaibelchhe khat (Rs 1,11,17,640) an seng tling a, hei hi chu a mak takzet tih loh chu han sawi zui ngaihna a vang hle a ni.

Stationery tih hian a huam tlangpui chu office-a hman tur paper, pen, file, lehkhabu tih lam hi a ni a, Dictionary lam kan en phei chuan notebook, pencil, pen, white paper, envelope, stapler, paper clip tih lam hi a kawk a ni. AMC in heng leina atan hian vaibelchhia a hmang tak tak a nih chuan mawza manto ang khan pen manto, paper manto, envelope manto te kan hmu chhuak nawk nawk dawn pawh a ni thei a, mahse stationery hian computer leh printer te huam tir ta ila (telephone bill leh internet bill chu a huam lova, a chhan chu telephone-ah hian MNF khan AMC term-ah khan cheng Nuai 20 chuang an seng a, Internet ah pawh cheng nuai 92 chuang an seng tlat a ni) chuti chung pawh chuan stationery-a kum nga chhunga vaibelchhe hman ral hi chu a mak hle a ni. Local Council 83-te hian Stationery-a an sum senso hi insem ta se, cheng nuai chuang an la chang thei vek a, heti hian Stationery lama pawisa sen a tam zia hi a ti lang chiang thei awm e.

Tichuan hei bakah hian MNF kaihhruai AMC-a pawisa hmanna hlawm lian dang 'Miscellaneous' tih hi han en leh ta ila, cheng vaibelchhe chuang bawk (Rs 1,84,52,424) an lo seng leh daih mai a, cheng nuai 184 hi head nei lovin 'A dangte' tih hnuaiah an han ziak lut leh mawp mai chu a ni a, thil mak tak kan hmuh tel bawk chu an pawisa hmanna hlawm lianah hian 'Refreshment' tih awmin chutah chuan cheng Nuai 39 chu an seng ral leh bawk a, Refreshment leh Miscellaneous hi kan belh phei chuan cheng Vaibel­chhe hnih aiin a tam a ni.

Kum nga chhung MNF-in AMC lama an pawisa hman dan en hian, kum nga dang Aizawl khawpui pawisa hi kan enkawl tir leh ngam dawn em? tih chu mipuite chhan tur a ni ta a ni.