ZORAM POLITICS THLIRNA - David Sailo

Vice President pahnih an thlak ṭhawt khan boruak a nei hat a, a thuneitu bâwrte sawi dan a inkalh deuh vek mai khan rinhlelh a tizual a; "Kan inlungrual" tih sawi chhen a ngaih phah. Hetiang sawi a ngaih fo hi chuan a rual tawk lo fo zu nia. MNF-a lut tharte boruak vanga Vice President thlak nia sawi hi rin thu sawi mai mah ni se chhui zawn theih tak a ni.

MP-ah an che chhe hle a, CAB hian MP mai ni lo, MNF dinhmun a phet hniam chiang a; naktuka inthlan tur ni se, party chhungah chuan an phur viau mai thei a, tlinna ber zawk neutral vote an hui lo viau mai thei. Hun her zelah boruak a daih ve mai ringin an hruaitute pawh CAB chungchangah an reh hmak phawt a. Krismas leh CAB boruak avangin mi nawlpuiin State Games a awm tih kan hriat chuan an lo khar der tawh a, chuti he hu chuan boruak a nei lem lo.

Assembly Election dawn lai khan party hrang hrang ka thlir a, bial tina dingte ka thlir leh a, MNF kha chak ber turah dahin, an MLA lak tur zat pawh pakhat chiahin ka ring sual. Mahse, an chak chhan tura ka chhut kha vawiin thlengin a la danglam lo. MNF ṭhat em vang lam aiin, an bitumte chhiat zar an zo a ni. ZPM kha inthlan hmachhawn tur khawpin an solid tawk lo va, Congress kan ning tlang tawh bawk nen, tluk luhna dang awm mang loh lai takah an vannei ta a ni. An chakna hi MLA zat zawnga chhut chuan a nghet a, an chakna boruak erawh tun thlengin derthawng tak a la ni reng.

CM hi tun thlengin a principle ber hriat a la harsa. SEDP, rua/mau, kawng chhawng, etc. Khawi lam ber nge a hawi hriat a harsa a, a hawi rual ṭhup a, a ti hleithei lo pawh a ni thei. A zia a la danglam lo va, zan khata tuipui thut thil sawi vul chuk a la ching reng.

CAB chungchangah an sawi an sawi a, ZPM phei chuan sawihonaa kal lote an tawng an tawng a. Sawiho ringawt a ni lo, a taka theih tawka pen chhuak an awm leh si lo. Ṭhalai ṭhahnemngai zual kalkhawm phenah Congress leh ZPM ṭhalai hruaitute hmuh tur an awm zuk zuk a, an lem ngei mai. Boruak siam tumna an neih mang loh chhan hi inthlan politics (election oriented) buaipui tawk lek bawk an nihzia a lang a, inthlan kuma thil thleng ni se vuak hial an tawk hreh hauh nang! Inthlan a la hla a, a him chinah khu an chhuah zeuh zeuh chauh a nih hi!!

ZPM hian politician hauh lo president an nei khauh mai hi an nawina pakhat a ni. Pa ṭha tak ringawt hi politics-ah bawm hlawhna a ni lo va, an CM candidate a duh thala a che thei lo hi an ṭhatpui aiin an thawm a zawih phah tih a lang. Party aiawha official-a ṭawng turin rin ber neih a har a, a changin CM candidate, a changin secretary general, a changin president an ṭawng a; inkaihruaina mumal tak an nei lo.

Congress hi an tlakna a la rei lo va, vúng chhuah tum ṭhin mah se, a sawp chu nasa tak a ni tih kha an la changchawi viau. President an la thlak lo va, doctorate vel an la buaipui tawk viau. Ka mimal ngaihdan tlang taka sawi ka duh chu - Pu Hawla leh Pu Zorama te hi chuan Zoram tan an theih tawk an ti zo tawh a, an tu leh fate awpin hahdam ve tawh se, mi ṭha tam tak tan hmun kian ve tawh se ram tan thil ṭha an ti a ni mai. Hmasawn ngaihna an awm tawh lo va, beisei tihsan vak theih a ni tawh lo.

Opposition-te hian role an play thiam chuan kum 5-ah sorkarna hi inthlak thei dinhmunah a ding rengin ka hmu.

Rajya Sabha MP hi a reh vung vung a, tu ber kha nge kan tih mai mai laiin UPA thlawp a nih vangin NDA/BJP agenda CAB chu free takin a do thei a, a hun tawp lamah thangṭhat a lak phah dawn ta a ni.

Pu C. Lalrosanga hian hotute thurawn pawh ni se, 'Campaign lai khan mipuiah ka lo intiam tawh si a, party chuan in tih tihin min ti mai ru, ka vote thei lo a ni,' huai takin lo ti tlang se chu a dam chhungin a hming a chher tawh ang a, MNF hian mipui thlir ranin an ban ngam bawk lo ang. Lo ban pawh ni se, MP inthlan ṭhatah Congress aṭang pawhin ding se, mimal taka mipui duhsakna avangin a tling zui tho ang.

A vawi khat activity-ah a thlangtu mipui aiin ticket petu party a dah lian zawk a, hmingṭhatna kawng ṭhenkhatin la um zui mah se, CAB sawi a pianga Zofate tithinurtu a ni kumkhua tawh ang. Amah mai ni lo, 'Lâm durh durh' rin lohna thlengin a chawk chhuak si a ni.