MI TUMRUH – MIZO – IAS ZORAMIN A LA MA MAWH

Tumruhna te, taimakna te , tel lo chuan hlawhtlinna a thleng thei lo a, tumruhna ngat phei chuan dinhmun sang takah hlawhtlinna a rawn thlen ṭhin. Tumruhna hi taimakna lungphum pawimawh tak a ni. Mi taima chuan a thil tihte chu dinhmun sangtakah inhlankai nan hman a tum tlat chuan chumi hmang chuan din hmun sang takah a inhlangkai thei mai ṭhin a ni. 

Hlaphuah thiam Rokunga chuan ‘’Mizo kan ni kan hmel a ṭha, kan tum a sang bawk si’’ a lo ti. Mizo ni si, taima lem lo leh hlawhtling taka thiltih tum nei lote pawh a awm theih a, chung hote tan chuan he hla hi mahni inen letna ṭha tak a ni thei ngei ang. Kan Mizo hranghluite, zirna lama mi hrat khawkheng, kan IAS val rualte kha an va ngaihawm ṭhin em! An lo upa in an lo chawl zo ta si a. An finna leh theih nate Zoram tan an lo hmang nasa ṭhin a. An ni lehkha zir hun lai khan All India Service, IAS a in hlan kai tum hrim hrim kha tam tak an awm tlat mai.

Vawi khat beih a hlawhtlin lohte kha chu engah mah an ngai lo, an tum a ruh a, an exam nawn leh ngat zel a, an lo hlawhtling ta mai ṭhin a ni. IAS written exam dan te, interview dante chu thu ngaihnawm tak, tualte vanglai chanchin an sawi ang mai in interview tawh ten an sawi a, an bul a zirlaiten ngaihnawm ti takin an lo ngaithla a, an inhrilh chhawng zel a, chung thilte chuan zirlai dangte hnenah entawn tur ṭha tak a rawn hnutchhiah zel ṭhin a ni. Zirna lamah an taimain an tum a ruh.

Tunlai ṭhangthar lehkha thiamte hian Engineer leh Doctor tih vel bak hi hna sang dang an ngaihven ta meuh lo a, All India Service a inziah tlin tum an vang ta em em mai a, chu mi avang chuan Mizo IAS kan Department lian neih ve chhunte rawn kaihruaitu tur kan nei ta meuh lo. Hei hi chu Zoram tan thil pawi tak a va ni em! Chakma te hian ram an nei lo a ni tih hre rengin an hnam survive nan nasa takin lehkha an rawn zir chho ta si a, kan ram sorkar department liante hruaitu hna hi hnam dang kutah a tluk luh zel lohna turin zirlaite an ṭhan harh a hun a. Mahni inchawmna tur ringawt nagihtuah loin, All India Service ah an inhlankai theihna tur in All India competitive exam an hma chhawn chur chur hi a hun ta hle mai.

Tunah pawh hian kan Top Official-te hnamdang an tam ta hle mai. Zirlaite hnen ah’ engnge nih i tum?  tia inzawt mai loin, All India Service competitive exam hmachhawn turin kan infuih a hun ta a ni. Intodelhna vangin mahni dinhmuna lungawia ṭhu mai loin kan ram tan zawk hian engnge ka tih theih ve tiin ngaihtuahna thar nei ila, zirtirtute pawhin resource person te nen naupangte an fuih thar a hun ta hle mai.

Mizote hi kan lungawi hma em em a, hnathawh tur kan hmuh tawh chuan kan duh tawk a, chutah chuan kan rilru kan dah hahchawl a, hmalam thlirna kan nei peih tawh ṭhin lo. Tunlaia kan zirlaite pawh hi hnam dangte lakah chuan sazupui leh satel intlansiak ang chauh an ni zo ta. Kan ṭhenawm Manipur State-ahte chuan tlang mi ram nei lo zawk te pawhin All India Service-ah kum tin inhlangkai ṭhahnem tak an awm zel a, keini a hnam ang pawhin changkang zawkte hi lang pha kan tlem telh telh ta. Mahni state chhunga hnathawh hi lungawi mai loin, hnathawk lai la naupang, rilru la in-fit ṭhate chuan heng competitive exam-te hi thar thawh ṭha leh a tan an va duhawm em! Kan ram damna tur a ni tih hre reng hlawm teh se.