Tlawmngaihna nun ze ropui Zonun timawitu ber

Kan pi leh pute nun tivultu leh tiropuitu chu tlawmngaihna a ni. Tlawm­ngaihna chuan ramri kham a nei ve lo va. A kianga mi leh ramdanga mi pawh a ṭul phawt chuan a ṭanpuiin a chhanchhuak mai ṭhin. Tlawmngaihna dik tak chuan phut let a nei ngai lo. 

Huaisenna, tuarchhelna, taihmakna, tlawmna nun te hi tlawmngaihna nun ze dik tak a ni. An tel lo chuan tlawm­ngaihna hi amahin a ding thei lo. Hmanlai pasalṭhate khan heng tlawmngaihna nun ze dik tak hi an chhawm nung tlat ṭhin. 

Pasalṭha Taitesena kha - Zanah Zawlbukah an riah laiin valupa-in a hma nia an lui kalnaa lung a hmuh chu lungtat atan a awhzia thu a sawi a. Taitesena’n a hriat chuan a zana zanin lung chu a va la ta mai a ni. Valupa-in a hriatin mak a ti hle a ni. Hmanlai pasalṭha te tlawmngaihna kha va hmuhpui ve a chakawm ṭhin! 

Tlawmngaihna thinlung pu tlattu chuan mi ṭanpui turte a zawng ru reng a, ṭanpui ngai a hmuh ve leh mi hmuh hmain a lo pui fel diam tawh ṭhin. Mite ṭanpuitu thinlung chu a hlim ber ṭhin a, mite ṭanpuina hian mihring nun a tiropuiin a tihlu a ni. Chhiatni ṭhatnia tlawmngaihna parvul kut che suau suau mai hmuh te hi a nuam em em a ni. 

Tlawmngaihna vuan nghet tlattu kut chu thiang­hlim hle mah se thlanlaihnaah chuan a lo balin a durh pheng phung ṭhin. Pasalṭha Taitesena nun kan en chuan tlawmngaihna chuan tlawmna nun a ken tel tlat avangin intihlar duhna leh chapona nen chuan a inrem lo hle. Mitthi lumennaa tlaivar te, mitthi vui niah ṭhutna ṭha lo taka ṭhut ngar ngar te, ni sensa hnuaiah engmah sawisel loa ni sa tuar te, inchhung chep taka ṭhut te, chutiang hunah chuan  tlawmngaihna nun ropui tak, zonun ze mawi tak chu a lo par chhuak ta ṭhin a ni. Nang leh kei hian chutiang hmunah chuan a hun taka tlawmna nun tlawmngaihna nun chu i chawi vul zel ang u. 

Ṭhalaiten motor chuan­naah upa leh chak lo zawkte ṭhutna an kian sang sang mai han hmuh te hi a va nuam ngai em - tlawmna nun chu an par chhuah tir a ni! Mimal leh ṭhian zahoten tlawmngaihna kan lantir bakah, zofate ram chhung leh ram pawna awm zawng zawngten zonun zemawi hi kan lan tir zel theihna turin tlawmngaihna puala din kan Inpui ber YMA-ah hian intelkhawm zel ang u. Chu chuan zoram nuam a thlen ang a, hnam dang lakah zofate nun chu hmuh nuam leh awhawmin a awm zel ang.